10-мит апрельн тӑм хӑнты ими Марфа Дмитриевна Немысова 75 тӑӆа йиӆ. Вәӆупсы кєн ӑнтәм вәс. 1941-мит оӆн икеӆ Вуӆаӊ Отечественной ӆаӆя тәсы. Па щӑӆта юхи ӑнт юхтӑс щи пурайн ӆўв хәӆум няврєм пиӆа хӑщӑс. Эвеӆ па пухӑӆ єнмӑӆтӑс. Эвеӆ Нина Ивановна Немысова ар оӆ рәпитӑс Октябрьской районӑн Киров нємуп колхозн зоотехника, ин ӆўв иса пенсия вўты ӆувата йис.

Марфа Дмитриевна нюр ӑӊкеӆ хурасуп, ӆўв шеӊк сӑмӑӊ мир пєӆы, мосӑӊ щиты вәӆмаӆ пӑты щи ӆўв нётӑс няв­рємӑт єнмӑӆты. Мосӆ лупты, ӆўв єнмӑӆтӑс нӆ няврєм, щит ӆўв хиӆнєӊӑӆ Галя Немысова, орт­нєӊӑӆ Аля Лельхова па кӑт Ярлин няврємӊӑн, Ваня па Толя. Тӑм няврємӑт ин хўӆ вәна йисӑт, вән пєлкӑӆ хуӆыева щемьяяӊа йисӑт, няврємӑӊа. Ӆыв ӑнт юрє­мӑӆэӆ ӆывеӆ єнмӑӆтум имеӆ Мар­фа Дмитриевна Немысова.
М.Д. Немысова сӑмӑӊ тәс юӆ ёнт­ты, тәс хӑнты пурмӑсӑт вєрты. Ӆўв хошӑӆ тәс пурка ёнтты, тәс пун вєрты па ӊӑтты. Ар пўш ар хуята Поӆнавӑт кәртӑн ӆўв вухсар сух тӑнӆыӆӑс. Тӑм пуӆяӊ ӆўв Галя хиӆнєӊӑӆ пиӆа вәӆ, ош тӑйӆӑӊӑн. Галяйӆ питы вухсар єнмӑӆты тӑхийн рәпитӆ.Тӑм хӑтӆӑн Марфа Дмитриевная китӆӑт вўща ясӑӊ па ӆўв хиӆнєӆаӆ ар тӑхи эвӑӆт. Ӆыв ӆӑӊхаӆӑт ӆўвеӆа тӑӆаӊа па ма вәӆты, м нумӑсн па тәса ещаӆты сєма питўм хӑтӆӑӆ, тӑӆаӊ ёш, тӑӆаӊ кўр. Еӆӆы па хўв вәӆа.

Т. Себурова
«Хӑнты ясӑӊ» газета, №14(2263),
6-мит апрель, 1991-мит оӆ