Рәт ясӑӊ вәты мосӆ, щит ӑӊкен па ащен путӑртты ясӑӊ. Кашӑӊ  тыӆӑщ Кӑсумн мирхот вєрӆы, ӑктӑщум ёх рәт ясӑӊ оӆӑӊӑн путӑртӆӑт, муй вєрты, ӆәӆн рәт ясӊев еӆӆы ат вәс. 

Тәнӆуп тыӆӑщ 21-митн Касум вош кини­кайт ӆў­ӊӑтты хотн вошӑӊ мир ӑктӑщийӆсӑт рәт ясӑӊ хӑтӆ постӑты щира. Алсу Хасимовна Назырова м па хошум ясӑӊ ӑктӑщум хуятӑта лупӑс. «Кӑсум ёх» тӑхи хуятӑт касум мўв мирева м вўща ясӑӊ лупсӑт. 

Тӑм оӆн щимӑщ хур вєрсӑт, Надежда Ран­дымова хурамӑӊ эвиет хӑншӑс – щит хӑнты эви, сӑран эви, юрн эви, щи нєпек унтасн иса хуятӑта м вўща ясӑӊ китӆўв. 

«Рәт ясӑӊӑн пўтӑр­та!» акцияя ӑшколайн нӆмит классӑн вәнӆ­тыйӆты няврємӑт Лю­бовь Викторовна Заха­рова вәнӆтӑты нєӊӑӆ пиӆа юхтыйӆсӑт. Щи няврємӑт хӑнты ясӑӊ сӑмӑӊа тӑйӆӑт па ма, тәса путӑртты тывӑӆ. Ӆыв стихӑт ӆўӊӑтсӑт, моньщ моньщсӑт, амӑ­мӑтщет сора уша вєрсӑт. Иса юхтум мойӊ ёх рәт ясӑӊӑн путӑр хӑншсӑт.

Тыв мойӊа хӑнты мирев поэт Владислав Молданов вохсы. Ӆўв пиӆӑӆа вәйтантты, сти­хӑт па путрӑт хәӆӑнтты ар мир юхтыйӆсӑт.

«Хӑрсурт  ёх» хоттєӆ ёх ванӆтупсы вєрсӑт, кәр­тӑӊ ёх оӆӑӊӑн путӑртсӑт, муйсӑр юнтутӑтн йис пурайн няврємӑт юнт­сӑт, муйсӑр вәнтӑӊ войт мутшӑсӑт. Щӑӆта мойӊ ёх уша вєрсӑт, муйсӑр сый сащӑӆ, щит тухӆӑӊ войт сыйт па тумран па нарӑсъюх юнтты сыйт. Елена Терентьевна Фе­дотова «Хӑрсурт ёх» тӑхийн ух нєӊа вәӆ, Дмитрий Тарлин на­рӑсъхн па тумранӑн юнтты вәнӆтӑс.

Евгения Даниловна Салахова ай ариет хӑншӑс. Щит мєт ай пухиеӊӑн Коля Канев па Данил Белкин арисӑӊӑн, Коля – ай ӆаӊ­ки, Данил – вўӆы. Ка­тя Канева вухсар олӑӊӑн арийс, Кира Гагаева – лўк оӆӑӊӑн, Даша Щеглова – шоврие оӆӑӊӑн. Лола Асалова нарӑсъхн юн­тӑс. Няврємӑт хӑнты ясӑӊӑн ар арисӑт, щи тумпийн хӑнты ясӑӊӑн путӑртты вәнӆтыйӆсӑт.

Мӑнум оӆн ван хӑтӆуп тыӆӑщн «Касум ёх» па «Пўпи» тӑхеӊӑн хуятӑт вошӑӊ няврємӑт пӑта кӑсупсы ӆэщӑтсӑт. Кӑсуп­сы вєр­ӆы, ӆәӆн рәт яс­ӊев нух аӆумты па ӆа­вӑӆты, ӆәӆн няврємӑт рәт ясӑӊӑн тәса хӑнш­ты ат вәнӆсӑт. Ӆывеӆа йиӆуп оӆ мӑӊхӑтӆӑн «Ищки икия» хӑнты ясӑӊӑн пищма хӑншты мосӑс па пәщтая Ищки икия китты. Ар няврєм пищ­ма хӑншӑс. Щӑӆта Ищки Ики вєрты мо­сӑс, муй хурас ӆўв тӑйӆ. Няврємӑт хоттєӆ ёхӆаӆ пиӆа Ищки Ики акань арсыр пурмӑсӑт эвӑӆт юӆн вєрсӑт. Арсыр Ищ­ки ики тывӑс –  ущхуӆь, хурамӑӊ!

Нух питум няврємӑт щи хӑтӆӑн ишӑксыйт па м мой­ӆупсэтн катӆуп­тӑсыйт.  Кира Гагаева мєт вуӆаӊ мойӆуп­сыйн мӑсы, щит телефон. Данил Белкин повербанк утн мойӆӑ­сы, Нина Шишканова – колонкайн. Щӑӆта няврємӑт мавӑӊ мой­ӆупсэтн, анӑтн, сәнӑтн, юнтутӑтн мӑсыйт. Мўӊ ищи няврємӑт пиӆа щи хӑтӆӑн ӑмӑтсўв.

Вән пәмащипа луп­ӆум щи хуятӑта, хуйтат мирхота юхӑтсӑт, мўӊ иха муй иса вєрӆўв, ӆәӆн щимӑщ хурамӑӊ рәт ясӑӊ еӆӆы ат вәс, няврємӑт рәт ясӊев ат вәнӆтӑсӑт. Мосӆ лупты, тӑм мир­хот ӆэщӑтты пӑта, рәт ясӊев ӆыӆӊуптӑты па еӆӆы тәты щира «Ильби­горская» община хуятӑт грант вух ёша  хоӆумсӑт па щи вухӑтн щи вән мирхота ӆэщӑтыйӆсӑт.

Светлана Рандымова