«Муй хурасӑӊ ӆор мўвие,
Муй хурасӑӊ Ас мўвие,
Сўмӑт хн иса єнмум,
Вусты ваншийн иса єнмум!»

Тӑмӑщ хурамӑӊ па хошум ясӊӑт пиӆа сєма питум па айтєӆн єнмум Ай Асэв рәт мўвӑӆ пєӆы ай кєр тыӆӑщ 28-мит хӑтӑӆн 2022-мит оӆн Ёмвош Издательства «Новости Югры» хот йитн моньщӑт хӑншты хә Владимир Енов йиӆуп киникайӆ єсӆӑс. 

Щимӑщ тарнӑӊ йис пу­тӑр «Ӆўй пӑ­ӆат­кєм кӑт пухлєӊки» ӆўв сырыя 1975-мит оӆ вўш эвӑӆт па иса 1985-мит оӆӑт вўш вәнты пирӑщ рәт ёхӆаӆ эвӑӆт хәӆьӆийӆсӑӆэ па мсыева, муй щирн щи вєр вәс, ӛхӑт па тӑӆаӊтєӆн ӆўв нумса вўсӆэ.   

Тәп тӑм ванӑн йис путӑр хӑнты ясӑӊӑн ӆўӊтарӑт щирн нух хӑншсӑӆэ. 
Щӑӆта щи ӆўӊтарӆ иса рўщ ясӑӊа ушӑӊа-сащӑӊа ӆўӊӑттыя тулмащтӑс.

Щи тумпийн, вантэ, Муши вошн па Тєк кәртӑн ищиты 2005-мит оӆӑтн рәта-щира ӆўӊтӑсты ёхӆаӆ эвӑӆт хәӆьӆийӆсӑӆэ. Сырыя ӆўв тӑм «Хӑнты ясӑӊ» па «Ӆух авт» газетайӊӑн хуща нух хӑншийӆсӑӆэ. Ӛхӑтшӑк нумӑс вєрӑс па тӑм тарнӑӊ йис путрӑӆ киникайӆа тўӊщирӑӊа ӆэ­щӑтсӑӆэ, ӆәӆн хӑнты мирн хәнты аӆ юрємӑсы па ка­шӑӊ пўш нумӑсн тӑйсы, еӆ тәсы.  

Мосӆ лупты, хуты рўщ щирн предисловие нєпек Югра мўвев писатель па поэт хә Павел Черкашин тӑм йиӆуп киникая ушӑӊа-сащӑӊа хӑншӑс. 
Щи пӑта Владимир Енов ӆўвеӆа ин м вўща ясӑӊ китӑӆ па ӆӑӊхӑӆ, ӆәӆн  еӆӆы щи хәев сыр-сыр м па хурамӑӊ нєпекӑт ат вєрӑс, тумтака ат вәс.

Щитӑӆ тумпийн монь­щӑт хӑншты хә Мордовия мўв поэт нєӊа Татьяна Мокшановая вўща ясӑӊ китӑӆ па вән пәмащипа лупӑӆ щи пӑта, хутыса ӆўв рўщ ясӑӊӑн рифма вєрӑт тәса вєрӑс па ӆў­ӊӑтты щира ӆэщӑтӑс. Ӆыв пеӆн Владимир Енов вән пәмащипа ясӊӑт Марина ай эвеӆа тӑмхӑтӆ па ки­тӑӆ. Вантэ, ӆўв тӑм йиӆпа єтум киникайӆа мєӊк ики хурасӑт ма па шєӊк хурамӑӊа нух хӑншӑс. Щиты хәӆум хӑннєхә ӛр-щом унтасн «Ӆўй пӑӆат­кєм кӑт пухлєӊки» нємуп хӑнты мирев йис путрӑӊ нєпек тӑта мосванӑн тўӊ­щирӑӊа щи ӆэщӑтсы.

Ма щирємн, мосӆ луп­ты, муй щирн ин тӑм йи­ӆуп киникайӆ єтты вєрӑӆ еӆпийн Владимир Енов хӑнты мирев хӑннєхуятӑ­та рәт ясӊӑӆн сыр-сыр вәйтантупсэт вєрӑс, хута йис путрӑӆ оӆӑӊӑн ар пўш сыр-сыр тәсыева мӑнты айкеӆӑт тәс. Югра муй Ямал мўвӊӑн тумпийн ӆўв сыры оӆӑтн «Ӆўй пӑӆат­кєм кӑт пухлєӊки» путраӆ рўщ ясӑӊӑн рўщӑт па Рос­сия мўв арсыр финно-угорской мирӑт еӆпийн ар пўш щи ванӆтупсэтн ӆўӊтӑс. Щи пӑта сӑран ёхн, коми-пермякӑтн, уд­муртӑтн, марийцӑтн, мордва мирӑт поэтӑтн па писатель хӑнєхуятӑтн тӑм хӑнты мирев йис пу­тӑр па ӆыв рәт ясӑӊӆаӆа хурамӑӊа рифма щирн тулмащтӑсэӆ па нух хӑнш­сэӆ. 

Тӑмхӑтӆ хӑнты мирев моньщӑт Россия хон пє­лӑк арсыр мўвӑтн кашӑӊ пўш сӑмӑӊа тӑйӆайт па ӆўӊӑтӆайт. Щи вєрӑт ун­тасн хӑнтэт вәйтӆыйт,  ушӑӊа-сащӑӊа вєрӆыйт па м ясӑӊӑн лупӆыйт.  

Йиӆпа єтум киникайӆ Владимир Енов хӑнты па рўщ ясӊӑтн хӑншӑс па ин еӆӆы щи нєпекӑӆ ванӆтупсы Ёмвош округев киникайт ӆўӊӑтты хот йитн ӆэщӑтты вўтьщӑӆ, хән 20 оӆ вўша айкеӆӑт ӑкӑтты, моньщӑт нух хӑншты па наука сыр-сыр вєрӑт кӑт ясӑӊӑн вєрты щирӑт иха юхӑтӆӑт. 

Путӑр хӑншӑс: 
Владимир Носкин