Тӑм оӆ вән кєр тыӆӑщ 13-мит хӑтӑӆн Манстӑр район Шӑнш­вошн ар оӆ мӑр няврємӑт пиӆа рәпитум вәнӆата вум имие Галина Ивановна Трибус 75 оӆа йис. Ӆўв вуӆаӊ ӆаӆь пийн, щит 1947-мит оӆн Лохтоткурт Микояновской районӑн вой-хўӆ веӆпӑсӆӑты хоттєӆ ёх хуща сєма питӑс.

Айтєӆн Галина Ивановна шуши мир йис вєрӑт сӑмӑӊа тӑйл. Кашӑӊ утые ма па тәса вәӆ.  
1953-мит оӆн Галя эвие Лохтоткурт ӑшколая мӑнӑс. Нӆ класс вәнта рәт кәртӑн, еӆӆы Шӑншвошн вәнӆтыӆӑс. Ӑшкола етшуптумаӆн 1963-мит оӆн Ёмвош педучилищая юхтӑс. Еша вәс, айӆат нєӊие ай няврємӑт вәнӆтӑты хуята йис.

1967-мит олн диплом нєпек ёша павтумн Галина Карымкары кәрта рәпитты китсы. Хәӆум оӆ мӑр апрӑӊ нєӊие няврємӑт вәнӆтуман вәс. Щӑӆта Шӑншвош шуши мир няврємӑт вәты-хоты хот кәщая павӑтсы. Щиты 1972-мит оӆ вўш эвӑӆт 2006-мит оӆ вәнта Галина Ивановна рәпитӑс.

Щи кўтн шуши мир культура, шўк­щӑты вєрӑт ӆыӆӊуптӑс. Тӑм апрӑӊ хӑннєхә унтасн па ӛрн 1982-мит оӆн Шӑншвошн йис пурмӑсӑт ӑкӑтты па шавиман тӑйты хот пўншсы. 

Сырыя Галина Ивановна тӑта оса щирн рәпитӑс. Мойӊа юхтум ёха шуши мир пурмӑсӑт ванӆтӑс па иса культура вєрӑт оӆӑӊӑн айкеӆ тәс. Щиты Галина Ивановна Трибус хӑнты мир культураев аӆумты вєра сӑмӑңа нётӑс па кашӑң утые ӆўв вещката ӆэщӑтӑс.

Рәт хӑнты ясӊев Галина Ивановна айтєӆн ма вәӆӆэ. Юхи хӑщум оӑтн хӑнты вәупсы щирӑт вәйтты хӑннєхә рўтьщӑты вўша йис. Рәпитмаӆн ӆўв айат эвет сӑк кӑрӑтты, ёнтӑсты па иса шўкщӑты вєра ма па тәса вәнтӑс. Щи тумпийн хӑнты имие рәт па рўщ ясӑӊӊӑн путрӑт, арӑт па ӆўӊӑтты арӑт хӑншты вєр ма тӑйӆ.

Иха ӆўӊӑтты ки, Галина Иванов­на Трибус 43 оӆ мӑр няврємӑт па айӆат ёх вәнӆтуман вәс. Вещката рәпата тўвмаӆ пӑта ӆўв «Югра мўв вәнӆтӑты вєрӑт тәты заслуженной рәпатнек» нємн кантсы. Ӆўв интӑм вәнта апрӑӊа вәӆ. Ипўша сыр-сыр вәйтантупсэта, ванӆтупсэта, якты хӑрӑта, ӆўӊтупсэта па мирхотӑта амтӑӊа ӊхӑӆ. Кәртӑӊ мирн ӆўв сӑмӑӊа тӑйӆа. 

Сєма питум хӑтӆ пӑта Галина Ива­новная тӑӆаӊ вәӆупсы ӆӑӊхаӆўв, уӊа-пищӑӊа айкємн еӆӆы вәӆты! Мўӊ, «Хӑнты ясӑӊ» газетайн рәпитты ёх, ищиты Галина Ивановна Трибус сєма питум хӑтӆӑӆ пӑта м па хошум ясӊӑт лупӆўв, тӑӆаӊа, амтӑӊа па ищиты йис вєрӑт ӆавӑӆман па ар оӆ вәӆты! Рәт ёхӆаӆн ӆўв ат ӆавӑӆӆы па кашӑӊ хӑтӆ уй па амӑт ат тәӆ! 

Пойкта нэ

Хӑнты ёх, манси ёх,
Хотсахӑт нӑӊ уттын.
Ар тӑщ тӑйты
Сорни мўвен
Хотсахӑт нӑӊ тӑйтен?
Лопа сора, лопа сора.
Ар вой тӑйты
Сорни унтӑн
Хотсахӑт нӑӊ версӑн
Лопа сора, лопа сора.
Ар хўт тӑйты
Ешиӊк йиӊкен
Муя щит щи тӑйтен
Лопа сора, лопа сора.
Йис рут утты
Сорни куртув
Хота нӑӊ си тустан
Лопа сора, лопа сора.
Ар моньщты мосиӊ ёхтан
Хота нӑӊ си тустан.
Лопа сора, лопа сора.

Ма мўвем 

Вўща ута, ешиӊк мўвем,                                             
Ӑӊкем, ащем сорни мўв!                                               
Тўв ӑнт ай, па кама тюпӑӊ                                         
Ат ёрема тўвты нӑӊ.                                                   
Вўща ута, ар вой тӑйты 
сорни мўвем,                       
Вўща ута, хўт тӑйты мўвем,                                        
Ар вощ тӑйты сорни мўвем!                                     
Ма щи уттум тӑта.                                                        
Тохтыӊ пурты ешик мўвем,                                      
Лук хыйиты сорни мўвем                                           
Уны вой хухты уны вәнт                                        
Ма щи хуттэм сорни мўвна!                                     
Вўща ута, ешиӊк унтэм,                                            
Вўща ута, ешиӊк йиӊкем.                                          
Вўща ута, сорни турмем,                                              
Тӑта сэма питсум нӑӊ па ма.                                    

Галина Ивановна Трибус, 
2010-мит оӆ

Валентина Пащанина хӑншум путӑр
хӑнты ясӑӊа тулмащтӑс: 
Ирина Самсонова