Ӆапӑтъяӊ вет тӑӆ тӑм пўш тӑрмӑс,
Хуты вән ӆаӆь етшум эвӑӆт.
Щи Победа тыв хән юхтӑс,
Нәмты хуят ӑнтәм хуӆна.

Атум ясӑӊ хуӆамеӆ пийн,
Ёхӆўв воша вохӑнтсайт.
Куратова вән каякна
Ащиӆўв ӆовӑӆман щи тәсыйт
Хута хоӆӆуп, хута ўв,
Шәка питсӑт иса ӆўв.

Кўт эӆты щи кӑншаньщӆӑт,
Велщи єнмум ёх няврємӑт.
Рўщ ясӑӊӑн ӆыв хән хошсӑт,
Пушкан ӆаӆясты ӑн катӆысӑт.

Воша, таӊха, ясӑӊ юхтӑс,
Ёхӆўв юхӆы єсӑӆсайт.
Вән ӆаӆь юхтум пийн,
Кашӑӊ хуят хота кепа.
Йиӆуп щирн вәӆты питсӑт,
Атӆ-хӑтӆ ӆыв рәпитсӑт.
Кашӑӊ мўвн: аеӆ-вәнэӆ,
Тӑӆӑӆ-ӆўӊӑӆ оӆум такӆа,
Шӑӊк йиӊк кўтн – иӆ питтыя,
Щиты щи ӆыв рәпитсӑт.

Ма нумсємн щи хуятӆўв
Мосӆ нємӆаӆ нух хӑнштыя,
Йиӆпа єнмум рәт хуятӆаӆ,
Амтӑтьӆяты пӑта.
Тамара Пырысева