Тăм ванăн Ёмвош «Югра-Классик» хотн Югра мўвев кәща нє Наталья Комарова округевн мсыева па вещката рәпитум хӑннєхуятӑт сыр-сыр мойӆупсэтн мӑсӆэ. Ӆыв кўтэӆн айкеӆӑт ӑкӑтты па хӑнты мир моньщӑт хӑншты хә Владимир Енов вуӆаӊ нємн кантсӑӆэ па мевӆ посн катӆуптӑсӆэ. 

Владимир Енов 22 оӆ мӑр кор­респондент щирн Югра мўвев округ иха пиӆтӑщум «Хӑнты ясӑӊ» па «Луима сэрипос» газетайӊӑн хуща айкеӆӑт кӑншты хәя рәпитӆ. Щи вєр тумпийн ӆўв «Ӆух Авт» газетая Ямал мўва ищиты ар оӆ мӑр сыр-сыр әмӑщ па тәс айкеӆӑт хӑншӑӆ. 

Мосӆ лупты, хуты Владимир Егорович сыр-сыр увӑс мўв йирӑтн араттєӆн 38 оӆ мӑр арсыр рәпатайт вєрӑс. Советской лащ оӆӑтн хўӆ веӆпӑсӆуман па хотӑт омӑсты тӑ­хетн Асов кәртӑн Ӆорвош районӑн рәпитӑс. Ӛхӑтшӑк Томской область Васюган хӑнтэт увӑс мўв хуща рўщ  няврємӑт 10 оӆ мӑр рўщ ясӑӊа па литературая вәнӆтӑсӆэ.  

Ёмвоша юхӑтмаӆн, сыры те­ле­виденияйн арсыр айкеӆ вєрман рәпитӑс.
Еша вәс округ «Хӑнты ясӑӊ» газетая мӑнӑс па тӑмхӑтӆ вәнты щи тӑхи хуща рәпитӆ. Айн-айн щи вєрӆ сӑмӑӊа тӑйты питсӑӆэ. Ин па «Хӑнты ясӑӊ» газетаева касум мўв хӑнтэт путрупсыйн, «Ӆух Авт» га­зетая ӆор­вош хӑнтэт путрупсыйн ай­кеӆӑт вєрӆ. Россия ӆуватн вәӆты газетаита муй журналӑта рўщ ясӑ­ӊӑн сыр-сыр айкеӆӑт ищи пура-пурайн китӆ.

Тӑмхӑтӆ Владимир Егорович тәс ясӊӑӊ айкеӆӑт ӑкӑтты па хӑнты  моньщӑт хӑншты хәя йис. Ӆўв Россия хон пєлӑк «Союз журналистов» па «Союз писателей» тӑхеӊӑна пирисы, литература щирн Югра мўв кәщайн лауреат нємн моньщӑӊ нєпекӑӆ пӑта мӑсы. 

Владимир Енов Югра мўв кә­щайн «Лауреат премии Ханты-Мансийского автономного округа – Югры «За развитие культуры малочисленных народов Севера» (за значительный вклад в возрождение и развитие культуры и искусства малочисленных народов Севера) вуӆаӊ нємн катӆуптӑсы.

Югра мўвев «Хӑнты ясӑӊ» па «Луима сэрипос» газетайӊӑнӑн рәпитты хӑннєхуятӑт м вўща ясӊӑт ӆўвеӆа путӑртӆӑт: «Еӆӆы тумтака па мсыева нӑӊ вәӆты вєрӆӑн ат мӑн­ӆӑт, хӑнты мирев пӑта ищиты әмӑщ айкеӆӑт па моньщӑт еӆӆы пєӆа хӑнша!».