Ёмвош округ кәща ими Наталья Комарова 2020-мит оӆн товийн васы веӆпӑсӆӑты вєр оӆӑӊӑн поступсы нєпек хӑншӑс. Щи постановления нє­пек щирн, Югра мўвн вән кєр тыӆӑщ 13-мит хӑтӆ вўш эвӑӆт Ас нопӑтты тыӆӑщ 24-мит вәнта йирӆ­та юхтум ёха тӑта веӆпӑсӆӑты ӑн рӑхӆ.

Вантэ, Югра мўвн вәӆ­ты нєпек ӑн тӑйӆӑты ки, тӑм мўва ӑн рӑхӆ йи­ты васы па тухӆӑӊ вой веӆпӑсӆӑты щира. Тӑ­мӑщ нєпек ӆэщӑтса щи щира, ӆәӆн па мўв эвӑӆт мир ӆавӑрт мәш ӊхты мӑр тыв аӆ ӑкумсӑт. 
Щи хуятӑта, мӑта ёх Ёмвош округн вәӆӆӑт па нєм нєпекн тӑйӆӑт тӑта вәӆты поступсы ут, вәӆты мўвӑнӑн васы па тухӆӑӊ вой веӆты рӑхӆ. Веӆпӑсӆӑты нєпек ин и пўш тови мӑра мӑӆы. Щи посн вәнтыты тәп нын вәӆты районӑн хуща рӑхӆ. Щӑӆта атум турӑх мәш вәӆты пӑта веӆпӑс пӑнта мӑнтӑнӑн вошӑта па кәр­тӑта хойӆяты ӑн рӑхӆ. 
Югра мўвн ин ӆєваса па вєр такӆа ӑн рӑхӆ нє­мӑӆт тӑхия ӊхты. Щи пӑта веӆпӑс ёх юӆтаса ин пӑкӆӑт ӊхты тәп васы па тухӆӑӊ вой веӆпӑсӆӑты щира нєпек ӆэщӑтты. Ӛхӑт нєпек ёша павӑтты пийн тәп веӆпӑс пӑнта ӊхты рӑхӆ.  
Югра мўв вәнт тў­тӑт питӆӑт ки муй па округ мєт вән санитарной тохтур веӆпӑсӆӑты ӑн єсӑӆты нєпек хӑншӑӆ ки, тухӆӑӊ вой веӆ­пӑсӆӑты вєр иса лӑп тәхӑрӆа. Щи пурайн веӆпӑс пӑнта мӑнты рӑхӆ тәп хӑнтэ­та, вухаӆята, юрнӑта па щи ёха, мӑта хуятӑт федеральной щирн веӆ­пӑсӆӑты нєпек тӑйӆӑт.  

Хӑнты ясӑӊа тулмащтӑс 
Ульяна Молданова