Тӑм оӆ лыпӑт хойты тыӆӑщ 2-мит хӑтӆӑн Югра мўв ӆуваттыйн иса ӑшколайтн линейка ӆэщӑтӆы. 2024-2025-мит вәнӆтыйӆты оӆн 25038 няврєм мєт оӆӑӊ пўш парта вўтпия омӑсӆ. Иса вәнӆтыйӆты няврємӑт оӆӑӊӑн путӑртты ки, щит 240891 арат хуят округ ӑшколайтн вәнӆтыйӆты питӆ.

Щи кўтн аӆӑӊ сӑты оӆӑӊмит ӑсмена щирн 76,3% арат, хӑтӆ ӆєтут вєр пийн 23,7% арат Югра мўв няврємӑт вәнӆтыйӆӆӑт.

Няврєм вәнӆтӑты ёх оӆӑӊӑн путӑртты ки, щит муй арат учитель мосӆ, щи арат хуят няврємӑт пиӆа рәпитты питӆӑт. Щиты 2024-2025-мит оӆн округ ӆуваттыйн 38305 арат учитель айӆат ёх вәнӆтӑ­ты питӆ.

«Земской учитель»

Округ ӆуваттыйн феде­ральной поступсы щирн «Земской учитель» нємпи вєр ӆэщӑтман вәӆ. Тӑм вєр унтасн Югра мўв ай па хўвн вәӆты кәртӑта ан тӑрумты няврємӑт вәнӆтӑты нєӊӑт-хәйт рәпитты вохӆыйт па ӆыв м нётупсы вухн сухуптӑӆыйт. 

Щиты 2023-мит оӆн ок­ругевн «Земской учитель» щирн 17 хӑнннєхә рәпитӑс. Рә­пата оӆӊитумн кашӑӊ хуят 1 миллион арат нё­тупсы вухн сухуптӑсы. Тӑм оӆн няврєм вәнӆтӑ­ты 20 хӑннєхә «Земской учитель» вєрн 20 мил­лион арат нётупсы вухн катӆуптӑӆы.

Учебникӑт, сыр-сыр вәнӆтӑты вєр пӑта нєпекӑт оӆӑӊӑн путӑртты ки, иса муй мосӆ, щитӆаӆ нюр 100 процента ӆэщӑтман вәӆ.

Йиӆуп ӑшкола

«Современной ӑшкола» поступсы щирн, 2024-мит оӆ сухнум еӆпийн Югра мўвн 13 щурӑс йиӆуп ӑшкола пўншӆы. 

Россия мўв президент ики партупсы хўват тӑм оӆ ван хӑтӆуп тыӆӑщ 31-мит хӑтӆ вәнта округевн 9 йиӆуп ӑшкола пўншӆы па 2 ӑшкола йиӆпатӆы. Щиты лыпӑт хойты тыӆӑщн 2-мит хӑтӆӑн Ёмвошн юхан хо­нӑӊӑн «Ӆаӊаӆ-2» нємпи хӑрн 1725 няврєм пӑта мєт вән йиӆуп ӑшкола пўншӆы.

Щи тумпийн лыпӑт хой­ты тыӆӑщ 1-мит хӑтӆӑн Кондинской район Ушья кәртӑн ар оӆ ӆавӆум ӑш­кола-ясли сад пўншӆы.

Когалым вошн 900 няврєм пӑта па и ӑсменайн вәнӆтыйӆты щира ищи йиӆуп ӑшкола омӑсӆы.

Урай вошн 1А микро­район хуща ищиты 900 няврєм пӑта йиӆуп ӑшкола тӑм ванӑн щи етшӑӆы. 

Сәрханӆ мўв Белый Яр вошн 1100 няврєм пӑта йиӆуп ӑшкола хуӆна омӑсӆы. 
Сәрханӆ вошн 20 А микрорайон хуща 1500 эви-пух пӑта ӑшкола хуӆ­на ӑн етшӑсы.

Щиты тӑӆаӊтєӆн 2025-мит оӆ вәнта округ хў­ваттыйн 15 йиӆуп ӑшкола ов пуншӑӆ: Когалым вошн – 1, Нефтеюганск - 2, Нягань – 1, Сәрханӆ – 1, Урай – 1, Ёмвошн – 3, Сўмӑтвош мўвн – 2, Манстӑр район хуща – 2, Сәрханӆ мўвн – 1.
2024-2026-мит оӆӑтн Югра мўв 12 муни­ци­пальной тӑхетн 19 ӑшко­ла йиӆпатӆы.
2024-2025-мит оӆӊӑ­нӑн Покачи, Югорск, Ёмвош, Нягань, Сәрханӆ, Мегион па Нижневартовск вошӑтн, Кондинской, Ём­вош, Манстӑр па Со­ветской районӑтн 13 ӑш­кола йиӆпатӆы.

2025-2026-мит оӆ­ӊӑнӑн Нягань, Югорск па Сўмӑтвош районӑн 6 ӑшкола йиӆпатӆы.

Тӑӆаӊтєӆн Югра мўвн хӑтӆ мӑр пушхӑт ӆа­вӑӆман тӑйты 275 тӑ­хи, 314 ӑшкола, 26 кол­ледж, дополнительной вәнӆтӑты вєрӑт тәты 111 тӑхи, негосударственной дополнительной вәнӆтӑты вєрӑт тәты 245 тӑхи па 5 вуз рәпитӆӑт.

Щи тумпи нємасыя вәнӆтаты вєрӑт тәты 15 казённой тӑхи, 1 мӑӆты па лекщитты вєр тәты вәнӆтӑты тӑхи вәӆӆӑт. 
Мәш тӑйты 13355 няв­рєм аӆ няврєм иты ӑш­колайтн вәнӆтыйӆты вє­ритӆӑт, щи кўтн 4406 инвалид няврєм.

Округ ӑшколайтн вәнӆ­тыйӆты няврємӑт тӑм вәнӆтыйӆты оӆн щиты рўтьщӑты питӆӑт:

- сўс рўтьщӑты хӑтӆӑт – васы мӑнты тыӆӑщ 28-мит хӑтӆ вўш эвӑӆт Ас потты тыӆӑщ 4-мит хӑтӆ вәнта;

- тӑӆ рўтьщӑты хӑтӆӑт – ван хӑтӆуп тыӆӑщ 30-мит хӑтӆ вўш эвӑӆт Ас хӑӆты тыӆӑщ 12-мит хӑтӆ вәнта;

- тови рўтьщӑты хӑтӆӑт – ай кєр тыӆӑщ 24-31-мит хӑтӆӑтн;

- ӆўӊ пура рўтьщӑты хӑтӆӑт Ас нопӑтты тыӆӑщ 23-24-мит хӑтӆӊӑн вўш эвӑӆт оӆӊитӆыйт.

Хӑнты ясӑӊа тулмащтӑс: 
Ирина Пословская