Тӑм товийн Москва хон воша ӊхмємн ма хӑнты нє Нина Семёновна Жукова пиӆа вәтаӊа йисум. Ӆўв «Сокровища Севера» ванӆтупсыя Владислав пухӆ пиӆа юхтӑс. Ӆўвеӆа арсыр мирӑт йис вәӆупсы, культура, ясӑӊӆаӆ оӆӑӊӑн уша павӑтты әмӑщ вәс.

Владислав Санкт-Петербург вошн сєма питӑс, ин нивӆ оӆ мӑр Москва хон вошн хотӑӊ ёхӆаӆ пиӆа вәӆ­ӆӑт. Әмӑщ уша вєрты, ху­ты щимӑщ вән вошн вәӆ­маӆн пухие хӑнты ясӑӊ вәнӆтӑты ӆӑӊхаӆ. Ӆўв Зоя Степановна Рябчиковайн онлайн щирн хӑнты ясӑ­ӊа вәнӆтӑӆы.  
Нина Жукова рәт мўвеӆ – щит Югра мўвев Манстӑр район Нягань вош. Ӑӊкеӆ – Раиса Андреевна Евла­хо­ва – Санкт-Петербург вошн А.И. Герцен нємпи университетн Увӑс мирӑт институт етшуптӑс, щи пийн Нягань вошн няв­рємӑт рәт ясӑӊа вәнӆтӑс, ӆўв и пєлӑкн хӑнты нє­ӊа вәс, и пєлӑкн – ву­хаӆь. Мосӆ лупты, Нина Семёновна аӊкаӊкеӆ – Нина Никифоровна Евлахова – вухаӆь ясӑӊӑн арӑт ма арийс, ӆўв вухаӆь мир йис вєрӑт, культура тәса вәйтӑс, рәт ясӑӊӑн ма путӑртӑс. Аӆпа, щит пӑта Владислав ин ищи хӑнты ясӑӊ па культура пєӆы сӑмӑӊа вәӆ. 
Нина Семёновна эко­номической наукайт кан­дидат нєӊа вәӆ. Щи пурайн, хән Татьяна Степановна Гоголева Москва хон вошн Государственной Дума депутата вәс, Нина Се­мёновна Жукова ӆўвеӆа нётман рәпитӑс. Интӑм ӆўв Москва вошн оса тӑхийн экономиста рәпитӆ. Ӆўв Владислав тумпи па ай пухие тӑйӆ – Кирилл, ӆўв ищи ӑӊкеӆ рәт мўв ёх культура па йис вєрӑт пєӆы сӑмӑӊа єнмӑӆӆы. 

Путӑр хӑншӑс: 
Надежда Новьюхова