Йиӆуп оӆ!

Йиӆуп оӆ! Йиӆуп оӆ!
Йиӆуп оӆа щи па йис!
Иса мўвев йиӆпа йис!
Нуви ӆоньщӑӆ, 
тарум ищкеӆ

Кашӑӊ оӆн тарма йиӆ.
Муй щи ищки тәты акєм,
Тарум ищки мўва тәс.
Юханӑт, ӆорӑт така иса 
потӑӆтӑсӆэ.

Нуви ӆоньщӑн ёмӆўв иса 
лӑп щи пєнсӑӆэ.
Вәншэт, сўмтӑт, нёрум 
хӑрэт,
Нуви ӆәмӑтсухӑн 
ӆәмтумсӑӆэ.
 

Вўӆы әхӑӆ кирум ёхӆўв,
Авие тӑйты ешӑк ёхӆўв.
Вўӆэӊ әхӑӆӆаӆ 
кирумсӑӆаӆ.

Ләӊханьщупӑӊ вўӆыеӆаӆ.
Нуви ащен сый щи хәӆӑс…
Йиӆуп оӆ! Йиӆуп оӆ!
Щипа юхӑтсӑн йиӆуп оӆ!
Мирые мурта амтӑтьӆяӆӑт!
Мирые мурта әмщиӆӑӆӑт!
Йиӆуп оӆа хәнты йис…

Йиӆуп оӆа хәнты йис…

Оӆӆам еӆӆы хәхӑӆмӑсӑт.
Кўш щи юхӆы ма вўратӆум.
Кўш щи нәпӑтӆам ӑн 
тєрматӆӑӆӆам.

Ӛрєм щив па ӑнт юхӑтӆ.
Тєрмат мӑнты хӑтӆыеӆам…
Муӆты пӑта тєрматӆаюм?
Сырсыр хурам нумсыеӆам
Тывеӆт хӑтӆӑт,
Тухеӆт хӑтӆӑт…

Нуви Тәрум партум нумӑс,
Нуви Тәрум партум 
вәӆупсы,
Щи вәӆупсы щирн ки ма 
омӑсӆум.
Мосӑӊ, сӑмєм така тӑйӆєм,
Мосӑӊ, нумсєм еӆӆы 
тәӆєм!

Паста мӑнты кашӑӊ оӆ,
Йиӆуп нумсӑт, мосӑӊ, тәӆ.
Йиӆуп вәӆупсы, мосаӊ, вәӆ.
Вәӆум оӆєм юхӆы хӑщӑс,
Щи оӆӑӊӑн нумсєм тыштӑс.
Катра нумсєм мосӆ хӑйты,
Шумаӆь путрєм юрємӑӆум.
Йиӆуп оӆ пєӆы ма иса 
таӆасӆум.

Йиӆуп оӆ пєӆы ма иса 
вўратӆум!

Нина Тарлина