Ас потты тыӑщ 22-мит па 23-мит хӑтңӑнӑн Сәрхан вош пўңӑн вәты Барсово вошн хӑнты, вухаь па юрн айат ёх ӑктӑщийсӑт. Эвет па пухӑт Сәрхан район ай вошӑт Угут, Русскинской, Тром-Аган, Сытомино, Нижнесортымской, Ульт-Ягун, Лянтор, Когалым па Ёмвош эвӑт юхӑтсӑт. Яха ӑктӑщме юпийн етн оӑңа мирхот эщӑтсӑт. 
ыв щӑта Сәрхан район әхтыйн Ас-угорской айат ёх тӑхия кәща ӑңкӑр хуят пирисӑт. Щи тӑхия каркам эви Виолетта Сопочина питӑс. ўв Сәрхан вошн государственной университетн естественной па технической вєрӑта кимӑт о вәнтый. Тӑм эви Русскинской вошн сєма питӑс па єнмӑс. Аще па ӑңке вәнт шушийн авие тӑйман вәӑңӑн. Виолетта ӑшколай яма етшуптӑсэ. «Тәрум юхан хәсые» нємуп нєпека ванкўты айкеӑт хӑншиӑс. Щӑта хӑнты ясӑңӑн эщӑтыйты арсыр кӑсупсэта путрӑт рәт щирн хӑншӑ. ўв ар пўш тәса хӑнты ясңӑн хӑнштӑ пӑта нух питыӑс. Щимӑщ апрӑң па нумсӑң эвие ай ёхн пириса. ўвеа нётты хуята Ефим Тайбин йис. Тӑм айат хәев Лянтор вош хонӑңӑн вәнт кәртӑн вой-хў вепӑсуман вә. ўв мўв вуй нух таты ОАО «Сургутнефтегаз» тӑхийн рәпит. Яма вәэ, муйсӑр авӑрт суртӑт айат хуятӑт вәупсэн тӑйӑт. Ин тӑм кӑт хуят ай ёх вәупсыйн тывты арсыр нўшайт эщӑтты питӑт. 
Еы эвета па пухӑта «Пўпи кӑт» нємуп ӛращты вєр оӑңӑн Сәрхан вош вәна ювум хуятӑт «Совет старейшин» кәща хә Егор Романович Кельмин ай павтӑс. ўв вантӑсэ, муй иты тәса кашӑң хӑннєхәя ы авӑты мос. Вантэ, вәнтӑн шәшийтанӑн хәрєсман вәаты. Щӑта эвет па пухӑт уша вєрсэ, муй вўрн тәса кулащты мос. Егор Романович вантӑсэ, муй иты вўы оңӑт, арсыр кўнш па юх нўв унтасн хӑннєхә вәньясты пӑк. ўв тӑм вєрӑт йис икет эвӑт Иван Каюков, Михаил па Роман Кельминңӑн эвӑт уша вєрсӑэ. Ин тӑм пищӑт айат ёха путӑртсӑэ. 
Ӛхӑт хӑт аӑңая ма кӑрӑщ вәншєп ёхум хўват «Барсово» нємуп сӑңхум оӑңа шәштєм сахӑт Сергей Васильевич Кечимов пойкщӑты ясңӑт хәсум. Хўв єпсуп вән вәншет тый эвӑт оньщие амӑтман вотн иӆы пуса, нюр иса мўвев-йиңкев, Наев-Вәртэв тӑм пори пӑсан авӑсэ. Єтӑр аӑңӑн Сәрхан ёх Найң-Вәртӑң ики Сергей Васильевич тўр сый хўва сащӑс. Мир пойкщӑты тӑхия юхӑтмємн имет хонӑңа рат пўңӑа оьсум. Мўң яха вўы нюхи ант йиңк пўтэв кавӑртсэв. Хә няврємӑт Сергей Русскин, Владислав Сопочин, Сергей Морозов па Данил Тайлаков иса пойкщӑты вән хуятэ хонӑңӑн вәсӑт. Щӑта тыв юхтум кашӑң айат хӑннєхә вәнт юха еңка йирты щӑшкан, карты вух па єтут пўлӑт пӑнӑн тўвме. Тӑмӑщ вєрӑт вантман эвет па пухӑт йис ясӑң па вәупсы ӑн юрємӑэ, питэ еы тәты. 
Щи юпийн айат ёх па щи вән мирхота ӑкӑтсайт. Щӑта «Орт Ики» нємуп оса тӑхи кәща нє Валентина Шадрина путӑртсӑэ, муйсӑр нётупсы вухӑт студент няврємӑт кєша вәӑт. 
Ар мир ӑкмум хотн политолог, социолог па «ЮГРА-СОЦИУМ» нємуп тӑхи кәща ики Илья Верховский ай павтӑс хӑнты, вухаь па юрн мирӑт әңхӑт па вәупсы оӑңӑн. Щӑта айат ёха путӑртсӑэ, муй вўрн юрӑңа па мосман шуши мир вәупсы па нумӑс тӑйты мос. 
Еы Сәрхан район Ресурсный центр кәща ими Полина Лебедева эвета па пухӑта грант хӑншты вєр оӑңӑн путӑртӑс. Щӑта няврємӑт нётсӑэ арсыр нўшайт тўңматты щира проектӑт хӑншты. Ай ёх нәмӑссӑт, муй иты вәна ювум хуятӑта, ар няврємӑң хоттэ ёха па па хӑннєхәйта нётупсы вєрты рӑх. 
Русскинской вош эвӑт юхтум айат хә Владислав Сопочин иньщӑссєм, муй ўв тӑм мирхот оӑңӑн нәмӑс:
– Шєңк әмӑщ арсыр нумсӑң ёх пиа путӑртты. Тӑм мирхотн арсыр мосты вєрӑт оӑңӑн ясӑң мӑнӑс. Щӑта политолог ики Илья Верховский мєт тәс нумсӑт мўңева лупӑс. ўв ясӑңа юпийн нәмӑсум, муй пӑта ма нуви хӑта юхӑтсум, муйсӑр ям вєр мӑнєма мос эщӑтты. Еы хӑнты ясңєм па мирєм вәупсы арсыр ёх кўтн юрӑңа тәты питєм. Щи тумпи уша вєрсєм, муйсӑр нётупсэт вәнтыйты ёх кєша вәӑт. 
Вәнт кәрт эвӑт юхтум айат ики Ефим Тайбин лупӑс:
– Ин йиуп вәупсыя вәнт шушийн питсўв. Ма уша вєрсєм, муй вўрн хӑнты ясӑң еы тәты щира нєпекӑт па грантӑт эщӑтты мос. 
Щӑта Сәрхан районӑн оса тӑхет пиа рәпитты кәща ики Олег Стипанюк ай павтӑс:
– Мирхота айат хуятӑт щи кєша ӑкӑтсӑўв, ән сыр-сыр вєра ат вәнтыйсӑт. ыв шуши мир вәупсы вәнььты поступсэт оӑңӑн уша вєрсӑт. Щӑта эвет, пухӑт оса тӑхетн тармашӑк ат рәпитӑт. Ар ай ёх вәнт кәртан йис вәупсы тәты вєрӑт этнотуризм мухты вантӑты ӑңхаӑт. ыв арсыр воньщумутӑт, вўы нюхи па хў тыныты вєрӑт иньщӑсӑт па уша вєрӑт. Щит ывеа вәупсэн мосмӑт. 
Мос лупты, Сәрхан мўв айат ёх вән мирхот «Орт Ики» нємуп оса тӑхи па Сәрхан район кәща ёх эщӑтсӑт.