Вотас тыӑщн Сәрхан район Русскинская кәртӑн А.П. Ядрошников нємпи мўв-авӑт па хӑннєхә музей хота пиӆтӑщум увӑс мир вєрӑт тәты тӑхийн тӑм мўв вєртутӑң хуятӑт ёнтӑсты хӑра ӊхмємн Сәрханӆ мўв шўкщӑты вєрӑт тәса вәты имиет пиӆа вәйтантыйӆсум. Щи вєрӑӊ хуятӑт кўтн нәптэӆ ӆапӑтъяӊа вум имие пиӆа вәтаӊа йисум. Щит Альбина Григорьевна Русскина. Вет оӆ юхӆы пєӆа ӆўв вәнт кәрт эвӑӆт Русскинская кәрта Ольга Покачева эвиеӆ хуща вәӆты-хоӆты касӆӑс. 

Ӆапӑтъяӊ оӆ юхӆы Ас хӑӆты тыӆӑщн Григорий Петрович Мул­танов па Анна Ефи­мовна (эви опращ нємԯ Покачева) хӑнты хоттєӆ ёх хуща ай пушхие сєма питӑс, Альбина нємн мӑ­сы. Григорий Мултанов – Касум ёх эвӑӆт вәс, Анна Ефимовна – Тәрум юхан хонаӊӑн сєма питӑс. Ар няврємӑӊ хӑнты хоттєӆ ёх хуща нӆ эви па кӑт пух єнумсӑт. 

Пушхӑт айтєӆн вән ёхӆаӆ пєӆа вантман иса муй вєр тәса вәсӑт, вўӆы тащ ӆавӑӆсӑт. Щӑӆта эвет ёнтӑсман, ӑӊкеӆа нёт­ман, пухӊӑн вой-хўӆ веӆ­пӑсӆуман вәсӑт.

Вәӆупсы еӆӆы мӑнӆ. Пу­шӑхӆўв єнумӆӑт, айӆат ёхӆўв вәна йиӆӑт. Вәнӆата вум хуятӆўв айӆтыева хўв пӑнта мӑнӆӑт. Мєт амтӑӊ, хән айӆат ёхӆўв кўтн вәна пєлка вум мут­райӊ рәтӆўв хуӆна вәӆӆӑт. Мосӑӊ, ай пурайн тәх мӑрн ӆыват ӑн хәӆӑнтсўв, интӑм па кашӑӊ ясӊие, кашӑӊ путрие, моньщие па арие мєт ма хәӆӑнтты ӆӑӊхаӆўв, вантэ, тӑм сор­ни путрӑт хўват иса шуши мир вәӆупсэв оӆӑӊӑн уша вєрты рӑхӆ. Ӆәӆн йис хуятӆўв ястум ясӊӑт сӑм­ӆўва веккеши ат хойсӑт…

Айӆат нє вўша вмаӆн Альбина Григорьевна икия мӑнӑс. Пиӆыеӆ – Иван Алексеевич Русскин. Йи­ӆуп хоттєӆ ёх кӑтӊӑн хәӆум пух па кӑт эви Ну­ви Тәрума тәсӊӑн. Ар няв­рємӑӊ Русскинӑт ёх ищи­ты вўӆэт ӆавӑӆсӑт, вой катӑӆсӑт, хўӆ веӆсӑт, вән­тӑн єнумты ӆєтутӑт: воньщумутӑт, тулхӑт, лып­тӑт па иса рӑхты утӑт ӑкӑтсӑт. 

Ай эвия вәԯман Альбина Григорьевна йинтуп катӑӆты вәнӆӑс. Щи пура вўш эвӑӆт вәупсэ мӑр тӑм тёпӑң имие м арат нюки хот ёнтӑс па, апа, ищи арат хурамӑң сӑх, моӆщӑӊ, вей, хӑншӑӊ сӑх па па вўӆы сух эвӑӆт мосты ӆәмӑтсух. Муй арат хә па нє рнас, щит ястӑты щир ӑнтәм, интӑм хӑт вәнты ёнтӑсман вә. 

Шўкщӑты вєр тумпийн Альбина Григорьевна йис путрӑт, моньщӑт ма вәӆӆэ. Щи пӑта ванкўтӆы ӆўв арсыр вәйтантупсэта, ӆўӊтупсэта, ванӆтупсэта, вәнӆтӑты хӑрӑта, мӑӊхӑт­ӆӑта вохӆы. Вантэ, айӆат ёха щи ясӊӑт хәӆӑнтты мосӆ, нумса па нєпека пунты, тәп щи пурайн, мосӑӊ, рәт ясӊев еӆӆы вәӆты питӆ.

Альбина Григорьевна Русскина иса муй вєрн, кўш ясӊӑтн, кўш вәнӆтӑ­ты щирн айӆат ёха нётӆ. Нюр амтӑӊа йиӆ, ӆўв ну­мӑсн, айӆат ёхӆўв йис вєрӑта сӑмӆаԯн таӆӆыйт ки, шуши мирев еӆӆы ищи вәӆты питӆ. Мӑнум оӆн Альбина Григорьевна Рус­скинская кәртӑн А.П. Яд­рошников нємпи мўв-авӑт па хӑннєхә музей хот рәпатнека муӆты арат йиӆуп вєр ӆэщӑтты нётӑс. Щиты Ольга Покачева эвиеԯ па Ксюша па Алла хиӆнєӊӊӑԯ пиӆа шўкщӑ­ты вєрӑт видео щирн нух хӑншсӑт. Щи кўтн ён­тӑсман, сӑк кӑрӑтман пу­райн вәнӆата вум имие Тәрум юхан хӑнтэт моньщӑт моньщӑс, йис путрӑт, мосты ясӊӑт хӑнты щирн няврємӑта лупӑс. Щи әмӑщ мосты вєрӑт карты щўӊка нух хӑншсыйт, ӆәӆн хәнты пурайн айӆат ёх щитӆаӆ хәӆӑнтты вєритсӑт.

Тӑм ванӑн Альбина Рус­скина Русскинская кәртӑӊ няврємӑт тўрӆопӑс ёнтты вәнӆтӑс. Хўв йистєн хӑн­ты мир әмӑтсухаа ар­сыр хӑншет ёнтӑт. Щи пӑта Сәрхан районӑн Рус­­скинской вошн имет, няврємӑт ха ӑктӑщийсӑт па нух вантсэ, муй иты катра Тәрум юхан хӑнтэт хӑншӑң сухӑт вєрӑнтсӑт. 

Нәптӑ вәна вум ими Альбина Григорьевна Русскина айат ёха ван­тӑсэ, муй иты хўв йисн тўропӑс ёнтыйса. Щи тумпи вантӑсэ, муй иты печар ёх нәй пос вєр­а. ўвеа тәса пос вань­щӑсты эвеӆ Ольга Покачева нётӑс. 

Сӑмӑӊ, мосты хӑн­ты имие Альбина Гри­горьевна! Нәптэн ӆапӑ­тъяӊа вмаӆ пӑта мўӊ нӑӊена ар тёпӑӊ ясӊӑт лупты ӆӑӊхаӆўв! мӑӊ Тәрум юхан нӑӊена ӛр па щом ат мӑӆ. Тәрум Ащи партум щирн, Тәрум Ащи аӆюм щирн тўӊ ӛш хўват айӆтыева еӆӆы шәша! Няврємӆанӑн, хиӆыӆанӑн ӆавӑӆман, сӑмӑӊа ӑт тӑй­ӆыйн!

Путӑр хӑншӑс: 
Ирина Самсонова