Сўмӑтвошн Искусствайт ӑшкола хот вәӆ, мӑта тӑхийн няврємӑт сыр-сыр хурӑт хӑншты вєрӑта Светлана Прокопьевна Новьюхова иса 2020-мит оӆ вўш эвӑӆт па ин тӑмхӑтӆ вәнты вәнӆтуман рәпитӆ. Муй щирн ӆўв щи ӑшколайӆ хуща рәпиттыя питӑс па мӑта тӑхи хуща вәнӆтыӆӑс, щи вєр оӆӑӊӑн тӑм айкеӆєм хуща нємасыя еӆӆы хӑнштыя вўтьщӑӆум.

Мосӆ луптыя, хуты Светлана 1998-мит оӆн Тюмень вошн сєма питӑс.   

Ӆўв ӑӊкеӆ-ащеӆ китумтак Сў­мӑтвошн вәӆты ӑшколаитн пухӑт па эвет  вәнӆтуман рәпитсӑӊӑн. Ай эвиеӆ сырыя хӑтӆ мӑр няврємӑт ӆавӑӆтыя хота тәтӆясӊӑн. Ӛхӑт па, вәншӑка вмаӆн, Сўмӑтвош кўтуп ӑшколайн еӆӆы вәнӆтыйӆты питӑс. Ищи оӆӑтн Искусствайт ӑш­кола хота ай эвие ӑӊкеӆн-ащеӆн хӑншӆтӑсы. 

Щи вўш эвӑӆт Света мсыева хурӑт хӑншты щирӑта тәса вәнӆтӑтыя вўянтӑс. Ӛхӑт, 2014-мит оӆн, художественной отделения тӑхи Сўмӑтвош Искусствайт ӑшко­ла хотн хӑнты эвие вўрты диплом нєпек пиӆа етшуптӑс. Щӑӆта кӑт оӆ мӑр кўтуп ӑшколайӆ хуща иса 11-мит классӑӆ сухнуптӑты вўшӆ вән­ты еӆӆы па вәнӆтыӆӑс. 

Щи киньща 2016-мит оӆн Тю­менской государственной уни­верситет тӑхийн Психология па педагогика институтн кафедра ис­кусствайт хуща вәнӆтыйӆты питӑс.

Вәнӆтыйӆты вєрӆаӆ мӑнты пураитн Светлана арсыр вәй­тантупсэтн па ванӆтупсэтн вәс. Институтн вәнӆтыйӆты пухӑт-эвет кўтн «OkuCraft» нємуп айӆат ёх кәщая павӑтсы. Щи вєр тумпийн «мода» вєрн куратор кана вәс па кашӑӊ пўш арсыр вєрӑт тўӊщирӑӊа па мсыева ӆэщӑтӑс. Щи рәпата вєрӆаӆ оӆӑӊӑн Светлана сырыя тӑмиты лупӑс: 

- Мўӊ арсыр хурамӑӊ ӆәмӑтсухӑт иса ёнтсўв па студенческой хӑт­ӆӑт пурайн оӆӑӊ тӑхет мўӊева хоӆумтсўв. Щӑӆта ӛхӑт мўвтєӆ мирӑт «Этномода» нємуп кӑсупсэт вәӆты оӆӑтн ищиты кашӑӊ пўш мўӊ хущева айӆат ёх оӆӑӊ тӑхета юхтыйӆсӑт. 

Щиты вәнӆтыйӆтӑӆ кўтн еша вәс дипломной рәпата нєпекӑӆ хӑншты пура юхтӑс. Сыры Светлана научной руководитель нєӊӑӆ пиӆа иха путрємӑсӊӑн па и нумса питсӑӊӑн, хуты ин ӆўв хӑнты нє ӆємӑтсухӑт ёнтты вєритӆ па щи утӆаӆ унтасн щимӑщ вән нєпек мсыева хӑншӑӆ.  Вантэ, практикайӆ мӑнты хӑтӆӑтн ӆўв няврємӑт пиӆа вошӑӊ ӑшколайн урокӑт ӆэщӑтӑс. Щитӑт вєртӑӆн пухӑта-эвета ванӆтӑс, муйсӑр хӑн­шет арсыр мир ӆәмӑтты сухӑт тӑйӆӑт. 

Щӑӆта па муй хурасуп вєрӑт оӆӑӊӑн арсыр хӑнши щирӑт сыр-сыр ай­кеӆӑт хӑннєхуятӑта тәӆӑт. Щимӑщ вєр пӑта Светлана хӑнты нє рнас па нәй сӑх ёнттыя питӑс. Сырыя, вантэ, ӆўв нємуӆты пураитн ӑн па ёнтӑсӑс. Ин па ӆўвеӆа мосты ӆәмӑтсух ёнтты вўянтӑс. Оӆӑӊӑн вўрты щӑш­кан эвӑӆт нє рнаса ӆўв сӑмӑӊа катӆӑсӑс па щитӆ айӆтыева ёнтӑс. Ӛхӑт па мкєм хўв нәй сӑхӑӆ вәтща щирн тәса па хурамӑӊа ӆэщӑтсӑӆэ. Ёнтӑсты пураитн ма ӑн вәйтты вєр Светлана ӑӊкеӆ эвӑӆт иньщӑссӑӆэ. 

Щӑӆта ӑӊкеӆн муӆты вєрӑт ма ӑн ки вәйтсыйт, ӆўв Сўмӑтвош район шуши мирӑт культура хот хуща ӊ­хӑс па Калерия Супрун эвӑӆт сыр-сыр тәса ёнтӑсты щирӑт ушӑӊа-сащӑӊа вєрӑс. Еша вәс рнасӑӆ па нәй сӑ­хӑӆ ёнттыя етшуптӑсӆэ па диплом нєпекӆ щи ӆәмӑтсухӆаӆ унтасн нух хӑншсӑӆэ. 2020-мит оӆн, Светлана Новьюхова диплом хоӆумтӑс па юхи юхтӑс. 

Сўмӑтвоша юхӑтмаӆн, ӆўв нумӑс вєрӑс, хуты Искусствайт ӑшкола хотн еӆӆы няврємӑт хурӑт хӑнштыя вәнӆтӑты питӆ. 

- Щив мӑнмємн, сырыя нәмӑссум, хуты еша рәпитӆум па па тӑхия щӑӆта мӑнӆум. Ӛхӑт кашӑӊ ай муй вән вєр няврємӑт пиӆа рәпитты щирн мӑнєма шєӊк әмща йис па щи пӑта па рәпата мӑнєма еӆӆы вәӆты-хоӆты щирємн ӑн па мосӆ, – щиты Светлана Прокопьевна путӑртӑс. 

Юхи хӑщум пурайн няврємӑт хурӑт хӑншты вәнӆтӑты нєӊев путӑртӑс, хуты ай пухӑт па эвет пи­ӆа ӆўв арсыр мультфильмӑт хуща вәӆты вой хурасӑт тәса нух хӑншӆӑт. Щӑӆта щитӑт ма оӆюпн нєрӆӑт па ӆывеӆ вәнӆтӑты нєӊеӆа аӆьӆӑт, муй хурасуп хурамӑӊ войт ӆэщӑт­ты вєритӆӑт.

Кашӑӊ айшӑк па вәншӑк вєрӑт ӆўв вәнӆтӑты няврємӆаӆ хуща Светлана  шєӊк сӑмӑӊа тӑйӆӑӆэ па мосты пурайн айӆат ёхӆаӆа ар щирн нётӆ. Мосӑӊ, щи пӑта ӆўв хущеӆа вәнӆтыйӆты пухӑт-эвет арсыр ванӆ­тупсэт ӆэщӑтты пурайн кўш ӑш­колайн, кўш вошн хӑншум хур­ӆаӆ ванӆтӑӆӑт. Итәх ай ёх ӆыв кўтэӆн оӆӑӊ тӑхет ёша павӑтӆӑт. Щимӑщ хурӑт хӑншты вәнӆтӑты нє Сўмӑтвошн вәӆ.

Любовь Вынгилева 
Сўмӑтвош эвӑӆт китум айкеӆ щирн хӑнты ясӑӊа тулмащтӑс: 
Владимир Енов