Шуши мирев культура - Культура обско-угорских народов

1999-мит оӆ вўш эвӑӆт «Торум Маа» йис пурмӑсӑт ӑкӑтты па шавиты хот рәпатнекӑт әмӑщ вӑнӆтупсэт тумпийн мосты вәнӆтӑты хӑрӑт ӆэщӑтӆӑт.  Шуши мирӆўв йис пурмӑсӑт йиӆпатты щира ӆыв Ёмвош округев вошӑт па кәртӑт эвӑӆт йис вєрӑт ма вәты хӑннєхуятӑт вохӆӑт, ӆәӆн ванӆтӑты, хутыса йис щирн сыр-сыр пурмӑсӑт вєрсыйт. 

Тӑта ӆӑпи сєвсӑт, ню­хи хот ӆыпи пурмӑ­сӑт ӆэщӑтсӑт, сәнӑт ёнт­сӑт, вой-хўӆ веӆпӑсӆӑты вєра нємасыя щўӊкӑт вєрсӑт, увӑс мир няврєм пӑта сыр-сыр юнтутӑт па па мосты йис щирӑт йиӆпатсӑт. 

Тарнӑң хўв йис пурайн Конда юхан вухаь мир вурщӑк хошум мўв эвӑт юхӑттыйн нємасыя мӑңхӑт вєрӑнтсӑт. Тӑмӑщ әмӑщ мӑӊхӑтӆ «Торум Маа» музей хуща рәпитты ёхн 2009-мит о вўш эвӑт Ёмвошн вєрты питса.

Ёмвошн йис пур­мӑсӑт шавиман тӑйты «Торум Маа»  хотн рә­питты ёх арӑӊ, якӑӊ па путрӑӊ етнхот ӆэ­щӑтсӑт. Ӆыв щиты Рос­сия мўв ӆуваттыйн «Ночь музеев – 2019» нємуп емӑӊхӑтӆ вє­рӑнтсӑт. 

Тыв юхтум мир нюр иса шуши ёх вәнт кәр­та рӑкӑнмеӆ мурт. Ню­ки хот кимӑӆн камн кина хўват йис хурӑт ванӆ­тӑсыйт. Итәх хурӑт 1870-мит оӆн вєрсайт. Тӑм хурӑтн мойӊ хуятӑт хӑн­ты, вухаӆь па юрн мир йис вәӆупсы шуваӆӑ­сӑт. Щӑӆта кәрт хӑрийн кашӑӊ хӑннєхә хӑнши эвӑӆт хурамӑӊ ӆопсые вєрты вәнӆтӑсы. Йис пурмӑсӑт шавиты тӑхи кәща ӆӑӊкӑр нє Неля Низамова лупӑс:

Катра вәӆум йис вєрӆўв иса щи айӆтыева хӑщты питсӑт. Ин тӑм вәӆты йиӆуп вәӆупсэвн, муй па мосӆ, муйсӑр пурмӑс, иса ӆапкайтн вәӆ. Щит я-а щиты, па сыры вәӆум вәӆупсэв иса нәмман щи тӑйтыя мосӆ. Щи йис вєрӑт, йис вәӆупсы ай вошӑт хуща хуӆна яма нәмӆайт. Тӑм оӆ вотас тыӆӑщ хуӆамн Вўтвош кәртыев хуща семинар оӆӊитса, юрн хоп вєртыя. Вош кәщая рәпитты нєӊиев Прасковья Константиновна Гарипова Ёмвош округ правительства грант вух ӛша павтӑс, па щи ӛрн хоп вєрсӑт. 

«Мўв-авӑт па Хӑннєхә» йис пурмӑсӑт ӑкӑтты па шавиты хот рәпатнекӑт ӑнтә тәп әмӑщ ванӆтупсэт вєрӆӑт па Югра мўвӑт-автӑт хўват экспедиция яӊхты-мӑнты ӛш ӆэщӑтӆӑт, ӆәӆн мўң мўвев арсыр вєрӑт оӆӑӊӑн уша вєрты па катра пурмӑсӑт мущатты – ванкўтӆы ӆыв сыр-сыр вәнӆтӑты хӑрӑта вошӑӊ мир ӑкӑтӆӑт. 

Вәнӆтӑты хӑрӑт ӆыв шуши мир вєрӑнтты оса тӑхи ёх унтасн па ӛрн эщӑтӆӑт. Кәщая тӑта айӆат нє Надежда Молда­нова вәӆ. Ияха катӆӑсман тӑм ёх апрӑӊ па вєрӑӊ шуши хуятӆўв вәнӆтӑты хӑрӑта, ӆўӊтупсэта ӑкӑт­ӆӑт, ӆәӆн ияха йис шўкщӑты вєрӑт оӆӑӊӑн тәса уша павӑтты. 

Сәрханӆ вошн Историко-куль­турной центр «Йис Сәр­ханӆ» нємуп тӑхийн «Питы вухсар оӆӑӊӑн вєрум хот йит» вәӆ.

«Россия мўв рәт ясӊӑт ӆавӑӆты оӆ» нємпи форум пурайн Ёмвоша арсыр мўвӑт эвӑӆт мир юхтыйӆсӑт. Ӆыв кўтэӆн Таймыр мўв Дудинка вош эвӑӆт Светлана Нереевна Жовницкая вәс. Ӆўв, нєш, нганасан мир пӑта 1999-мит оӆн оӆӑӊ­мит «Букварь» єсӆӑс.

«Год языков коренных народов в России» (ай кєр тыӑщ 21-22-митн Ёмвошн вәс) нємуп Мўвтє мирхотн рәт ясӑңа няврє­мӑт вәнтӑты нєңӑт ияха ӑктӑщийсӑт. Щӑта Башкортостан, Коми Республика па Краснодарской мўв эвӑт вәум нєңӑт ай павӑтсӑт, хутысаты ыв эвет па пухӑт вәнтӑӑт. Хӑнты ясӑң оӑңӑн ӑшколайн рәпитты нє Галина Лаптева ищи путӑртты вўтьщиӑс, тәп ӑн алємӑс.

Вән кєр тыӆӑщ 6-митн Ёмвошн «Югорский лыжный марафон» нємпи ӆухӑӊ кӑсупсы мӑнӑс. Щив Россия мўв яма ӆухн кӑсты ёх, па хон пєлӑк яртъяӊ мўв эвӑӆт мойӊ па кӑсты хуятӑт юхтыйӆсӑт. Кӑт щурӑс ветсот муӆтас хӑннєхә ӆухн хәхӑӆсӑт. 

Ӆыв пирисӑт, муй арат киломєтра хәхӑӆты ӆӑӊхаӆӑт: вет, хәс вет муй ветъяӊ. Щи кўтн кашӑӊ оӆ шуши хуятӑт ищи нымӑӆн хәхӑӆман кӑсӆӑт. Ӆыв кӑсты ӛшеӆ тӑм пўш 2020 мєтра хўваттыйн вәс. 

Ай кєр тыӑщн Мегион вошн няврємӑт хурӑт хӑншты вєра вәнтӑты ӑшколайн Светлана Солодиловайн хӑншум хурӑт эвӑт «Пространство настроений» нємпи вантупсы вәс. Ӆўв веншӑ пєы вантӑн – ўв щимӑщ ӑткӑш ими, щирн хура ищимщӑт. Ӆўв хуран вәупсыйн иты мўв-авӑт, ияха хурамӑңа пунум єтутӑт, хӑннєхәйт. Светлана – хурамӑң па сӑмӑң имие, щирн ищимӑщ хурӑт хӑншӑ.