Шуши мирев вәԯупсы - Жизнь хантыйского народа

Иван Николаевич Каскин (27.08.1915 – 27.09.2004). Ӆўв Ёмвош район Цингалы кәртӑн сєма питӑс.

1937-мит оӆн Увӑс мир институт ма етшуптӑс па Касум ӑшколайн няврємӑт вәнӆтӑс. 1940-мит оӆн армияя вўсы. Связиста вәс. Вуӆаӊ Отечест­венной ӆаӆь пурайн Калинин (ин Тверь) вош ӆавӆӑс. Рәт мўвӆ тухаӆпи па хон пєлӑк Чехос­ло­вакия, Польша мўвӊӑн эвӑӆт ву­ракӑт вошитӑс. Ӆаӆь ӛш хўват Германия мўв вәнты шәшӑс. Хә­ӆум пўш ӆавӑрта мәшмӑӆтыйӆсы. «Вуӆаӊ Отечественной ӆаӆь» 1-мит степень па Жукова нємуп орденӊӑн, «За победу над Гер­манией» па па мевӆ посӑт тӑйс. 

Нуви сӑӊхум район Вўтвошн вәӆ хӑнты хә Павел Иосифович Сенгепов. Мӑнум оӆн ма ӆўв пиӆӑӆа Касум вошн вўӆєӊ ёх мӑӊхӑтӆ пурайн вәтаӊа йисум, ӆўв щи пурайн хӑнты хотн мойӊ хуятӑта хӑнты мир вәӆупсы оӆӑӊӑн путӑртӑс. 

Павел 1985-мит оӆн Вўтвошн сєма питӑс, щӑта єнмӑс. Ӑӊкеӆ – Татьяна Талюковна Сен­гепова – ин вәнты Вўт­вошн вәӆ пухӆаӆ пиӆа. Пухӆаӆ – Роман, Владислав па Павел – вой-хўӆ веӆпӑсӆуман вәӆӆӑт. Щи тумпи хӑнты мир арсыр пурмӑсӑт вєрӆӑт. Ащеӆ – Иосиф Петрович Сенгепов – щит Пўпи як тўвум хӑнты ики Пётр Иванович Сенгепов пух.     

Тимофей Петрович Лозямов Нуви сӑӊхум район Касум вошн вәӆ, ар оӆ мӑр хотӑт омӑсты хәя рәпитӑс, ин пенсияйн вәӆ.

Тӑм ванӑн кәртӑӊ хәев Александр Васильевич Гришкин 55 оӆа йис, ешавәӆ па ӆўв Ваня апщеӆ 50 оӆа йиӆ.

Ӆын ӑӊкӑн Евдокия Тихоновна Тўкъякӑӊ кәртӑӊ нє вәс. Саша ащеӆ Василий Егорович Молданов яньщты ута питӑс. Ӑӊкеӆ ӛхӑтшӑк Анатолий Иванович Юмин хущи мӑнӑс, ӆын нӆ пух єнмӑӆсӑӊӑн.

Евдокия Тихоновна оӆӑӊӑн пәльницайн санитаркая рәпи­тӑс, ӛхӑт па хўв мӑр колхосӑн ай мисӑт єнмӑӆтӑс. Анатолий Ива­нович трактористая рәпитӑс.

Хӑнты пух Владимир Мол­данов интӑм Москва вошн армияйн служитӆ. Ӆўв ӆўӊ пурайн армияя вўсы, сыры хәт тыӆӑщ мӑр Переславль-Залесский вошн вәс.

Вова Нуви сӑӊхум район Ваньщавӑт хӑнты кәртӑн єн­мӑс. Ӑшколайн ӆўв ма ртъяӊ класс вәнты вәнӆтыӆӑс. 2014-мит оӆн Ёмвоша технолого-педагогической колледжа вәнӆ­тыйӆты мӑнӑс. Вет оӆ мӑр «Информационные системы» тӑхийн вәнӆтыӆӑс, 2019-мит оӆн щит етшуптумаӆ пийн армияя вўсы. 

Афанасий Алексеевич Гриш­кин 1913-мит оӆн сєма питӑс.

Вуӆаӊ Отечественной ӆаӆь пу­райн Берлин вәнты ӆаӆяс­ман ӊхӑс. Щи пийн ӆаӆь пӑта пурмӑсӑт вєрты заводӑн рәпи­тӑс. 1946-мит оӆн юхӆы кєрӆӑс, ар мевӆ пос тӑйс.

Никита Степанович Тарасов щӑщєм апщи  1941-мит оӆн Омск вошн артиллерийской ӑшкола етшуптӑс па ворошиловской стрелок иты ӆаӆь хӑра китсы.

Москва хон вош эвӑӆт вуракӑт вошитӑс. Щӑӆта Сталинград вош пўӊӑӆн ӆаӆясӑс. Ван хӑтӆуп тыӆӑщ 19-митн 1942-мит оӆн пӑрӑс. Верхне-Кумской станица пўӊӑӆн шавиман вәӆ. 

Александр Иванович Исыпов (1926-1999-мит оӆӑтн вәс).

18 оӆа вмаӆн ӆаӆясты мӑнӑс. Рәт мўв, па хон пєлӑк Австрия мўв Вена хон вош, Венгрия мўв Буда­пешт хон вош, Чехословакия мўв эвӑӆт фашистӑт вошитӑс. Герма­нияйн Победа хӑтӆ постӑс.  «За отвагу», «За взятие Вены», «За победу над Германией» па па мевӆ посӑт тӑйс.

«Хӑнты ясӑң» катра газета вантмємн ванкўты нєпека нух хӑншум әмӑщ путрӑт, пищмайт, йис хӑнты мир арӑт, моньщуптэт, амамӑтщет шиваыйӆсум. Мєт амтӑӊ, хән кўш шуши мирӆўв арсыр мўвӑтн, вошӑтн вәӆӆӑт, хӑнты ясӊев шавиман тӑйӆӑт. Щиты «Хӑнты ясӑң» 2001-мит оӆ лыпӑт хойты тыӆӑщ 15-мит хӑтӑӆн 37-мит номерн әмӑщ пищма хӑншман вәс.

«Сӑмєм ўв, Асєм ув»

Щиты лупӑс айӆат учёной нє Галина Ле­онидовна Нахрачёва. Тӑм ванӑн ма ӆўв пиӆаӆа вәйтантыйӆсум па еша путӑртсум.