Щи оӆӑӊӑн шуши мир Ассамблея 46-мит мирхотн округ хот омӑсты вєрӑт тәты де­партамент кәща нє О. Теренина лупӑс. Щи мирхот лыпӑт хойты тыӆӑщ 2-мит хӑтӆӑн вәс. Тӑм оӆн округ шуши мир пӑта хот мӑты оӆӑӊӑн йиӆуп поступсы рәпитты оӆӊитӑс. Ин щи унтасн 44 щемья йиӆуп хот ӆәтсӑт. Тӑм поступсыйн 1 158 хоттєӆ ёх нух хӑншман вәӆӆӑт. И сертификат нєпек – щит нӆкєм миллион шойт вух. 

Еӆӆы лупӑс, хот ӆәтты муй хот омӑсты пӑта вух округ шуши мир щемьяя па ӆыв рәтӆаӆа мӑӆы. Щит ёша хоӆумты пӑта мосӆ:
- Югра мўвевн яӊ оӆ вәӆты мосӆ (няврєм хуӆна яӊ оӆа ӑн йис ки, ӑӊкеӆа-ащеӆа яӊ оӆ округевн вәӆты мосӆ);
- юхи хӑщум вет оӆ соцнайм щирн хот тӑйты ӑн мосӆ па нємасыя оче­редян ӑн ӆоӆьты;
- сырыя тәрум пӑта хот ӆәтты муй хот омӑсты вух ӑн вўты («Материнской капитал», «Югорской се­мейной капитал» па ар няврємӑт хоттєӆ ёха вух нётупсэт ӑн ӆўӊӑтӆыйт).

Мєт сыры тӑм йисн ӆаӆьн ӆаӆясум па ӆаӆясты ёха па ӆыв хоттєӆ ёхӆаӆа хот ӆәтты муй хот омӑсты пӑта вухӑт мӑӆыйт.
Хот ӆәтты муй хот омӑс­ты пӑта и квадратной мєтра тын 100 процент арат вух мӑӆы. Хот ӆәтты пӑта сертификат нєпек район муй вош кәща хуят мӑӆ. Щи вух унтасн хот ӆәтты муй омӑсты рӑхӆ тәп щи вошн муй районӑн, хута хӑннєхә щи вух ёша вўс. 
Щи тумпи тӑм мирхотн округ вәнӆтӑты вєр тәты департамент хә Алексей Дренин ай тәс, муй щирн Югра мўвевн шуши мир рәт ясӊӑт вәнӆтӑты вєр ӆэщӑтман вәӆ.

Округ шуши мир вәӆуп­сы ӆавӑӆман тӑйты нє Людмила Алфёрова тәняӆ оӆ рәпатаеӆ оӆӑӊӑн ай тәс. 

Округ дума 57-мит мирхот

Лыпӑт єнумты тыӆӑщ 4-мит хӑтӆӑн округ дума 57-мит мирхот вәс. Щӑта депутатӑт 25 вєр нух вантсӑт. Мєт вуӆаӊ – щит округ бюджет оӆӑӊӑн. Округ вух ӆўӊӑтты па ортты департамент кәща нє В. Дюдина ай тәс, муй­сӑр вєрӑта па муйкєм арат вух тәняӆ 2025-мит оӆ округа бюджет ву­хӑт мӑнсӑт. 

- Тәняӆ округ бюджета 404 миллиард шойт вух юхтӑс, 476 мил­лиард шойт вух арсыр со­циальной вєрӑта мӑнсӑт. Щи эвӑӆт 162 миллиард шойт – няв­рємӑт тӑйты щемьяйта, 12 миллиард шойт вух катра хотӑт нух вўты вє­ра, 18 миллиард муӆтас шойт вух – йиӆуп хотӑт омӑсты па мӑты вєра. Тәняӆ округевн 3 щурӑс хуят йиӆуп хотӑта касӑӆсӑт. Тӑм оӆ шәп бюд­жета 77 миллиард вух юхтӑс, щи эвӑӆт 76% со­циальной вєрӑта, – В.А. Дюдина лупӑс.

Щи тумпи мирхотн поступсы вўсы, ӆәӆн СВО хуща ӆаӆясты ёх па ӆыв щемьяйӆаӆ тәрум пӑта юридической нётупсэт ат вохсӑт. Ӆыв кәщая йиты ӆӑӊхаӆӑт ки, ӆывеӆа тәп щи рәпатайн и оӆ рәпитты мосӆ, щи пийн еӆӆы нє­масыя касупсыйн касты вєритӆӑт.
Щи пийн округ шуши мир вәӆупсы ӆавӑӆман тӑйты нє Людмила Алфё­рова ай тәс, муй щирн тәняӆ оӆ рәпитӑс. 

- Тәняӆ Ас потты тыӆӑщн Югра мўвевн шуши мир пӑта хот ӆәтты вєр оӆӑӊӑн йиӆуп поступсы вўсы, тәп щит ин тўӊматӆўв. Ар­сыр иньщӑсупсэт эвӑӆт 40% арат щит хот нўша тўӊматты вєр оӆӑӊӑн. Йи­ӆуп поступсы унтасн 1,5 щурӑс хоттєӆ ёх хот нўша тўӊматты вєритӆӑт. 
Ин уша вєрсум, кӑт фе­деральной поступсэӊӑн ха ӑн хойӆӑӊӑн. Щит социальной пенсия мӑты вєр пӑта тәса хуӆыева Увӑс мир нємӑт хӑншты мосӆ (Россия мўвев пра­вительства поступсы №1049) па шуши мир вәӆ­ты вўт кәртӑт нємӑт (Рос­сия правительства пос­тупсы №631). Щи ювра хӑн­шум вєрӊӑн эвӑӆт йис вє­рӑт тәты шуши мир мос­ты пурайн пенсияя мӑн­ты па веӆпӑса ӊхты ӑн вєритӆӑт, вантэ, и нєпекн хӑншман вәӆ, па нєпекн ӑнтәм. Ин щит тўӊматӆўв. 
Иха ӆўӊӑтты ки, тӑм оӆ шәп мӑнєма 50 пищма юхтӑс, 32 хуят ма хущєма юхӑтсӑт, 98 консультация ӆэщӑтсўв, – Л.А. Алфёрова лупӑс.

Думайн округевн вәнӆ­тӑты вєр оӆӑӊӑн путӑрт­сы. Тәняӆ 22 район хуща няврємӑт пӑта арсыр рўть­щӑты хӑрӑт ӆэщӑтман вә­сӑт, щи тумпи атэӆт шуши мир эвет-пухӑт пӑта – щӑ­та 400-кєм хуят рўтьщӑ­сӑт. Ин Ёмвошӑӊ техно­лого-педагогической кол­леджӑн «ЮграПеда­гогика» кластер пўншсы, щив вәнӆтӑты 15 тӑхи па 40 кәща ӆуӊсӑт. Округ 285 ӑшколайн 6–11-мит классӑтн вәнӆтыйӆты няв­рємӑт уша вєрӆӑт, муй­сӑр вєрӑта еӆӆы вәнӆ­тыйӆты питӆӑт. 

Путӑр хӑншӑс: Людмила Гурьева