Ас нопӑтты тыӆӑщ 27-28-мит хӑтӆӊӑнӑн Санкт-Петербург вошн А.И. Герцен нємпи Российской педагогической университетн вәӆты Увӑс мир институтн «Реальность этноса» нємпи Россия мўвтєӆ мир вән XXIII-мит научной мирхот вәс. Щӑта учёной ёх Увӑс мўвев мўв-авӑт, йис вәӆупсы, рәт ясӊӑт па па вєрӑт оӆӑӊӑн путӑртсӑт. 

Тӑм мирхотн кӑт хӑтӆ мӑр нӆ тӑхи рәпитӑс. «Родные языки народов Севера в образовательном пространстве Арктики» тӑ­хи хущи филологической наукайт кандидат ими Дина Герасимова вухаӆь ясӑӊ оӆӑӊӑн путӑртӑс, ху­тыса арсыр мўвӑтн вәӆ­ты ёх кўтэӆн вәӆӆӑт па йис вєрӑт нух аӆумӆӑт.
Филологической нау­кайт кандидат нє Зоя Рябчикова путӑртӑс, кол­леджӑтн вәнӆтыйӆты ай­ӆат ёх рәт ясӊеӆ вәнӆ­тӑ­ты щир тӑйӆӑт.
Мєт шопӑӊ тӑм мирхотн вән учёной хә, философс­кой наукайт доктор хә, профессор хә Игорь Леон­тьевич Набок шәӊӑт оӆӑ­ӊӑн путӑртсӑт (1921-2025 оӆӑтн вәс). Ӆўв увӑс мир йис вәӆупсы нух аӆумты щира ар ӛрӑӆ пунсӑӆэ. 
Увӑс мир институт кәща нє Софья Урун хӑншум нєпекӑӆ ӆўӊӑтсӑӆэ, муй щирн Игорь Леонтьевич Набок вәс, вәнӆтыӆӑс, така рәпитӑс па муйсӑр вән вєрӑт па унтас Увӑс мўв шуши мир пӑта вєрӑс.
Щи тумпи па нєпекӑӊ учёной ёх путрӑт ӆўӊӑт­сӑт. Увӑс мир институт етшуптум хуятӊӑн Оксана Хамидулина па Юлия Накова тӑта вәнӆтыйӆты вєр оӆӑӊӑн путӑрӆӑн ӆў­ӊӑтсӑӊӑн.

Вән научной мирхот тумпи па мӑӊхӑтӆ вєрса. Тыв Увӑс мўвӑт эӆты юхтум арсыр ёх әмща арисӑт па яксӑт. Пуӆӊавӑт вош эӆты «Наковӑт» нємпи щемья нарӑсты ансамбль вәс, щи хӑнты щемья айӆат ёх нарӑс хн юнтсӑт.
Увӑс мир институтн «Увӑс хус» нємпи тӑхийн ариты-якты айӆат ёх ву­хаӆь мир писатель хә Юван Шесталовӑн хӑн­шум «Охотничья тропа к материнской колыбели» путӑр хўват як яксӑт.  Институтн вәнӆтыйӆты айӆат ёх кеши «Северное сияние» якты-ариты ан­самбль нәптӑӆ соткєм тӑӆа щи йис, ӆыв ин ищи яксӑт.
Мєт оӆӑӊ хӑтӆ нємасыя  Камчатка мўв эӆты «Вэем» нємпи фольклорной ан­самбль якты па ариты тӑхи вєрса. Якты ёх коря­кӑт чавчувенӑт, корякӑт нымыланӑт, эвенкӑт, итель­менӑт па чукча мир якӑт яксӑт. Корякӑт мир  ари­ты сувӑт тӑм якты хотн па щащсӑт.
«Вэем» якты па ариты ансамбль Наталья Фе­дотова кәща нє путӑртӑс: 

- Ма якутской культура институтн вәнӆтыйӆсум. Институт етшуптумєм пийн тый кәща нєӊа рә­питты китсаюм. Мўӊ «Вэем» якты-ариты ан­самб­лев па оӆн 35 оӆа щи йиӆ. Тӑта вән хуятӑт, айӆат па мєт ай няврємӑт якӆӑт. Мєт ай пушхиет «Лэлал» (рўщ щирн «Росинка») нємуп тӑхийн якӆӑт. Мєт ай якты хуятыев тәп нӆ тӑӆа йис, ӆўв па мўӊ пиӆэва тӑм хӑтӆ якӑс.
«Вэем» якты па ариты ансамбль мўӊ мўвев вош­ӆавн па кәртӆавн як­ман иса ӊхӆўв. Москва хон воша муӆты арат пўш «Сокровище Севера» ванӆтупсыя ӊхсўв. Ин па тый Санкт-Петербург воша вохсаюв.

Еӆӆы Увӑс мир институтн научной мирхот мӑнум пурайн сыр-сыр вєрӑнтты тӑхет ӆэщӑтсайт. Коряк ёх – Василий Баранников па Василий Тихляк – вєрӑнтты тӑхи вєрсӑӊӑн. Щӑта вўӆы оӊӑт эӆты мевӆа тӑхӑрты ӑняйт эвӑтсӑт па «Пупи пӑнт» хурамн хурамтсэӆ.
Кимит вєрӑнтты хӑрн ищи коряк нєӊӊӑн рә­пит­сӑӊӑн, щит Елена Ко­зилина па Александра Понаморёва. Ӆын увӑс юкагир мир ёнтӑсты ай хир ваньщсӑт па ёнтсӑт, щӑӆта сӑкн хурамтсэӆ.
Хәӆмит вєрӑнтты хӑр Владимир Рентетегин чу­котка па эскимосӑт якты пищӑта вәнӆтӑс. «Вэем» тӑхийн якты ёх ӆўв хущеӆа якты вәнӆтыйӆты щира юхӑтсӑт.
Щӑӆта Увӑс мир инсти­тутн мєт оӆӑӊмит юка­гирской учёной, юка­гирской киникайн хӑн­­шум хуят Тэки Оду­лок (22.05.1906–14.04.1938-мит оӆӑтн вәс) кев ху­рас вєр­­са па пўншса. 
Тӑмӑщ нумӑс вєрӑс Александр Петров, вуӆаӊ якутской учёный хуят, ар оӆ Увӑс мир институтн рәпитӑӆ. Ӆўв ястӑс: 

- Николай Иванович Спиридонов – Тэки Оду­лок – 1931-мит оӆн Ле­нинградской универ­ситетн географи­ческой факультет ет­шуп­тӑс. Щи пийн тый Увӑс мир института аспи­рантурая вәнӆтыйӆты юхтӑс. Нико­лай Иванович аспиран­тура етшумтумаӆ пийн экономической наукайт кандидат вуӆаӊ нєм мущатӑс. Ӆўв мєт оӆӑӊ увӑс мир кўтн учёной хуят, ӆўв мєт оӆӑӊ писателят союзн вәс, ӆўв рўщ ясӑӊӑн хӑншӑс. Максим Горький ӆўв хӑншум киникайӆаӆ оӆăӊăн шєӊк м ясӊӑт путӑртӑс.

Тэки Одулок кев хурас пўншты щира рәт ёхӆаӆ, хиӆыӆаӆ па хиӆнєӊӆаӆ юхӑтсӑт. Мєт вәна вум  юкагир мир хуят Макар Семёнович Курилов юх­тыӆӑс па вуӆаӊ, нумсӑӊ ясӊӑт тӑм йис тәрумн вәӆты ай ёха путӑртӑс.

Путӑр хӑншӑс: 
Наталья Краснопеева