Тӑм айат хӑнты нєңие Александра Сергеевна Лельхова. Нуви сӑңхум вош шуши мирӑт культура хотн Александра нємасыя ай няврємӑт ёнтӑсты, арсыр сєвум вейт тыйты па сӑк кӑрӑтты вєрӑта вәнтӑ. ўв хущеа сыр-сыр ёш  рәпатайта вәнтыйты хәт о вўш эвӑт па 14-кєм оа ювўм вошӑң  айат эвет кашӑң пурайн юхтыйӑт. «Тӑмӑщ ёнтӑсты, сєвӑң вейт тыйты па сӑк эвӑт арсыр хурамӑң пурмӑсӑт эщӑтты тумпийн, мўң  хущева яңхты няврємӑт арсыр хӑнты якӑт тӑта па вәнтӑӑт па сыр-сыр емӑңхӑтӑтн ищиты шєңк сӑмӑңа мўңева нётӑт», – лупӑс  Александра. Тӑм нєңа айат хӑннєхуятӑт пиа вєра әмӑщ хурамӑң шуши мир пурмӑсӑт вєрты. Еы ўв ищиты ай няврємӑт пиа рәпитты нумӑс тӑй. 

 

Владимир Енов