Тӑм хурасӑң хӑнты имие Фаина Степановна Кривых (Аликова) Русскинская кәртӑн вә. ўв ӑшколайн няврємӑт хӑнты пурмӑсӑт вєрты вәнтуман рәпит. Ма ўв пиэа вәтӑңа йисум, хән товийн «Медиашкола» вєр әхтыйн щив яңхсўв.

Фаина Степановна аңщаще Кузьма Николаевич Аликов Касум мўв эвӑт Сәрхан мўва юхӑтсӑт, хән щӑта аь тывӑс. Иса хоттэ ёха па вўыа пиа касӑсӑт. Аңщаще хәум эви па пух тӑйс. Фаина аще Степан Кузьмич 1914-мит он сєма питӑс. Ӑңке Евдокия Николаевна Покачева. Хән щатщаще кәщаятн касна хота тәсы, ыв Ермаково кәрта касӑсӑт. Фаина Ермаково кәртан сєма питӑс. ыв нивӑ няврєм вәсӑт. Интӑм кӑт упеңа Сәрхан вошн вәӑңӑн, тохтура рәпитсӑңӑн. ын икисӑңӑн кӑт няврєм пух па эви єнматсӑңӑн. Эвие садикн ай пушхиет пиа рәпит, пухие па тунты эвӑт сыр-сыр пурмӑсӑт вєр. Фаина Степановна 1990-мит оатн ӑшколая рәпитты вохсы, ән няврємӑт хӑнты пурмӑсӑт вєрты ат вәнтӑс. Щи пура вўш эвӑт ўв щӑта 23 о щи рәпитӑс. Вәншӑк эвет пиа хӑнты ернӑсӑт, миӑт, парщин эвӑт юрн хотӑт ёнтсӑт. Интӑм юхи хӑщум оатн айшӑк няврємӑт пиа рәпит. Ин пенсияя рўтьщӑты мӑнты нумӑс вєрӑс. Мўң, «Хӑнты ясӑң» газетайн рәпитты хуятӑт, ӑңхаўв ўвеа ям, хошум вўща ясңӑт китты.