РӘТ ЁХА ОӐҢӐН

1960-мит о вәйт ор тыӑщн Анастасия Васильевна па Алексей Филиппович Отшамовңӑн вән хоттє ёхн ветмит няврєм сєма питӑс. Фаина нємн пунсы. Вәупсы хўват пиыеңӑн мурта рәпитсӑңӑн: ипўша вўы тащӑтн кaпӑртсӑңӑн, вой па хў вепасуман вәсңӑн. Ветмит эвие сєма питум пурайн Тәк колхозн рәпитты питсӑңӑн. Щи юпийн ын хоттє ёхн хәум пух па ай эви па сєма питсӑт. Щиты ияха вәман мӑр пиыеңӑн яртъяң няврєм: Зинаида, Анатолий (ӑнтәма йис), Маргарита, Светлана, Фаина – мєт кўтуп няврємие, Владимир (ӑнтәма йис), Эдуард, Сергей па Надежда єнматсӑңӑн. Мос ястӑты, хуты Алексей Филиппович вуаң аь пурайн Берлин вошн аясӑс, снайпера вәс. Пӑтап аь етшум епийн ўв авӑрта мәшмӑтсы па госпиталя тәсы – ухӑ хущи патрән эвӑт шук вәйтсы. Щи юпийн Алексей Филиппович нумсӑт хут юрємасэ, ӑнт па нәмсӑэ мӑта тӑхи эвӑт ўв вә. Тәп 1948-мит он айтыева рәт мўв оӑңӑн нәмамӑты питӑс, ӛхат юхи щи юхтӑс. Россия мўвева вән унтас тәты пӑты Алексей Филиппович Маршал Жуков ёш эвӑт «Медаль за отвагу» нємпи мев посн катуптӑсы.

 

НЮМША НЯВРЄМИЕ

Няврєм хӑт мӑр авӑты хота Фая эвие ӑнт ӑңхӑс яңхты, ипўша юхи хунтыӑс. Шєңк нюмша няврєма вәс, єємтӑс. Интӑм щи пурайн вєрум хурӑт пєа вантты ки – ай эвие иса хоуман оь. Ӑшколая мӑнман Фаина рўщ ясӑң ӑн тӑйс. Щи пурайн няврєм вәнтӑты нєңӑт хӑнты ясӑңӑн путӑртты вєра єртыйсӑт. Щит пӑты оӑңӑн хӑнты эвия авӑртшӑк вән-тыйты вәс. Щи тумпийн ӑшколайн ай классатн ўв ищиты шєңк нюмша няврєма вәс. Иатн математика урок тәты нє Л.А. Фролова шиваӑс, хуты хӑнты эвие ўв урок яма тӑйӑэ, цифрайт па няврємӑт киньща мєт оӑң нух ўңат. Фаина Алексеевна щи оӑң щиты нәмӑмӑс: «Щи йисн Любовь Андреевна ӑн ки шиваӑсэ, хуты ма математика урок тӑка тӑйєм, мосӑң тӑм хӑт вәнты ма ищиты шєңк нюмша па машья хуята вәсум. Щит пӑты Любовь Андреевная вән пәмӑщипа па вўща ясңӑт китум!». Математика киньща Фаина ўхн хӑтӑтяты, волейбол, баскетбол нємпи ӛрӑщты вєрӑт яма тӑйсӑэ.

 

АЙАТ НЄҢИЕ

Нивӑ класс етшуптум юпийн айат хӑнты эвие Ёмвош педучилищая вәнтыйты мӑнӑс. Щи оӑт оӑңӑн Фаина Алексеевна лупӑс: «Мўң вән хоттє ёхн єнумсўв. Света упєм ма эвӑтєма вән, тәп кӑрщатан па эн айе. Мӑнєма па ўв яңхум суха мӑсыйт. Хуты вєрты, ма щикўш карӑщ эвия вәсум, щиты щи ван ернасн яңхсум. Ин нәмасум, щикєм ущхуь эвия вәсум!»Ня о сора мӑнӑс. Щитӑ етшуптум юпийн айат нєңие Саранпауль кәрта рәпитты китсы. Щӑта Фаина интернатн ай няврєм авӑты па вәнтӑты хуята тыӑщ-кєм тәп рәпитӑс. Вантэ, вухаь кәрт ӑшколайн тәп вухаь ясӑң вәты няврємӑт вәнтӑты нє мосӑс. Щит пӑты хӑнты нєңие Сўмӑтвоша мӑнты сонтумӑс. Щи эвӑт «Лопарево» нємпи тутӑң хопн Ванзетур кәрта рәпитты юхтӑс.

 

РӘПАТА ОӐ

Оӑңӑн Фаина Алексеевна ищиты интернатн ай няврєм авӑты па вәнтӑты нєңа вәс. Ӛхӑтшӑк ӑшколая няврємӑт вәнтӑты нєңа вўсы. Щи пура вўш эвӑт хәумъяң мутас о мӑнӑс. Тәп хӑнты имие интӑм вәнты ӑшколайн ай пушхиет вәнтӑты нєңа вә. ўв вәнтум няврємӑ 11 класс уваттыя ювмен мєт оӑң вәнтӑты нє ӑнт юрємаӑт. Ипўша хошум ясӑңӑн путӑрты па мойупсэтн мойӑы. Мос ястӑты, хуты ӑшколайн вәнтӑты пура эвӑт тӑмхӑт вәнты Фаина Алексеевна Ванзетур кәрт няврєм вәнтӑты хуятӑт пиа тӑн ипўша ўхн хӑтӑтя, па итәх пурайн волейбол щирн кўтэн кӑсӑт. Тәх пурайн кәртӑң учителят Сўматвоша ӛрӑщты щира яңхӑт.

 

ХОТТЄ ЁХ ОӐҢӐН

1981-мит он айат Фаина нєңие Виктор Собянин пиа вәтӑңа йис. Щи пура вўш эвӑт тӑмхӑт вәнты пиыеңӑн Ванзетур

кәртӑн вәӑңӑн. Мария эван вәна йис, икия мӑнӑс. Ёмвош Югорской университет етшуптӑс, интӑм Нягань вошн психолога

рәпитӑ. Вәйт ор тыӑщн Фаина Алексеевна сєма питум хӑт постӑты пит. Щит пӑты ма ўве вән вўща ясңӑт китум па ӑңхаум ястӑты: «Тынӑң Фаина Алексеевна! Хўв йис, хўв нәпӑт нӑңена, уяңа, пищӑңа ищиты еы вәты, вәнтум няврєманӑн авӑман, мосман па сӑмӑңа ат тӑйайн!