Вән кєр тыӆӑщ 4-мит хӑтӆӑн Нижневартовской район «Тәрум тўт» нємуп хәйт-нє­ӊӑт рўтьщӑты тӑхийн иха юхтум арсыр мирӑт «Вурӊа хӑтӆ» вєрсӑт. Щи мӑӊхӑтӆ ӆэщӑтты еӆпийн, вән кєр тыӆӑщ 3-мит хӑтӆӑн, ма нємасыя Нижневартовск вошӑӊ №5 Модельной библиотека хота вохсыюм, хута ха ӑктӑщум киника ӆўӊӑтты хӑннєхуятӑт пиӆа вәйтантыйӆсум па путрємӑсум.

Хән па литератур­ной вәйтантупсєм етшуптӑсєм, ма библиоте­ка хот кәща нє Светлана Аскатовна Губайдуллина эвӑӆт сыр-сыр айкеӆӑт уша вєрсум па щи пӑта ӆўвеӆ иньщӑссєм.

- Светлана Аскатовна, вәӆ­ты-хоӆты щирєн па рә­па­таен оӆӑӊӑн айкеӆ тўва?

- Ма ӑшкола няврємӑт историяя вәнӆтӑты нє щира сыры вәнӆтыйӆсум. Щи щирємн иса ӑн па рәпитсум. Хән киникайт ӆўӊӑтты хотн рәпата му­щатсум, щиты нәмӑссум: ма тӑта еша рәпитӆум па щӑӆта ищипа ӑшколая няврємӑт вәнӆтӑты мӑн­ӆум. Тәп мӑнєма тӑм рә­патам әмща йис, иса ин тӑмхӑтӆ вәнты 25-кєм оӆ мӑр тӑта вәӆӆум, рәпитӆум. Киникайт ӆў­ӊӑтты хотн тӑйты вєр – мєт м рәпата. Щи кинь­ща нємуӆты пураитн ӑн нәмӑссум, хуты вевтама па юврая мӑнты вєр мӑнєма ӆикмӑс. Ма тӑйты рәпатам ищи няврємӑт вәнӆтӑты щирӑтн вәӆ. Кашӑӊ хӑтӆ мӑнты мӑр мўӊ эвет па пухӑт пӑта арсыр вәйтантупсэт, ванӆтупсэт муй аӆисупсэт ӆэщӑтӆўв.
Киникайт ӆўӊӑтты ай­ӆат ёхӆамн тӑм рәпа­тамн шєӊк ма, сӑмӑӊа тӑйӆыюм па щи киньща муй мӑнєма хуӆна мосӆ? Арсыр вәйтантупсэт вєрты тумпийн мўӊ эвет па пухӑт пиӆа ищиты краеведе­ния, патриотизм, экология, история, литература па мсыева муй тўӊщирӑӊа вәӆты-хоӆты щирӑӊ ӆўӊ­тупсэт ӆэщӑтӆўв. 

- Муй нӑӊ вєритӆӑн мўӊева лупты «Хунзи» хоттєӆ ёх рәт община музей хот йит оӆӑӊӑн, мӑта ут нын библиотека хотн хуща вєрман вәӆ?

- Щи вєр оӆӑӊӑн ма тӑ­миты лупты вўтьщӑӆум: ма тӑм киникайт ӆўӊӑтты хот  тӑхия вет оӆ мӑр юх­ӆы пєӆы веӆщи юхӑтсум. Катра ма Нижневартовск вош №9 библиотека хот кәща нєӊа рәпитсум. Рос­сия мўвев культура щирн мӑнты тӑхийн арсыр на­циональной поступсэт вәӆ­ӆӑт, мӑта ут унтасн гран­тӑт хоӆумты вєритӆўв. Мўӊ тӑм киникайт ӆўӊӑт­ты хотэвн щимӑщ грант мущатсўв па ӛхӑт мўӊ рәпитты тӑхев Модельной библиотека хота нємӑтсы.
Щимӑщ вєр пӑта ки­ника ӆўӊӑтты хотэв шєӊк сӑмӑӊа ай па вән ёхн тӑйӆы.
Щӑӆта 2021-мит оӆн, хән ма иса тӑта рәпитты питсум, уша вєрсум, тӑм библиотека хотн шєӊк әмӑщ киникайт, мӑта утӑт Россия 50-кєм арсыр па ӆўв пўӊӆӑӆн вәӆты ми­рӑт ясӊӑтн хӑншум нє­пекӑт вәӆӆӑт. Щи вўш эвӑӆт ма нәмӑсты пит­сум, хуты мўӊ библиотека хотэвн арсыр мир ясӊӑтн ищи литературной вәй­тантупсэт ӆэщӑтты рӑхӆ. Щи киньща арсыр ясӊуп поэтӑт па писателят пиӆа ӆўӊтупсэт вєрты питсўв. Вантэ, Нижневартовск вән вошн сыр-сыр мир иса тэ­ӆыева вәӆ. Ӆўӊтупсэт па вәйтантупсэт кашӑӊ оӆ мӑр ма мӑнсӑт. Щӑӆта нумӑсн юхӑтсыюв, мўӊ биб­лиотека хот йитэвн му­зей па пўншты вєритӆўв. Тәняӆ 2025-мит тӑӆн мўӊ ищиты «Этноквартирник на Интернациональной» нєм тӑйты грант вухӑт хо­ӆумсўв. Мўӊева щи гран­тэв ёша павӑтты тӑӆаӊ ӆапӑт тӑхи нётупсы вєрӑс. Щи утӑт кўтн «Хунзи» нємуп хоттєӆ ёх рәт община па мўӊева нётӑс. Щит пӑ­та мўӊ Нижневартовск вош №5 Модельной биб­лиотека хотэвн ай музей хот ӆэщӑтсўв, ху­та сыр-сыр хӑнты мир ӆә­мӑтсу­хӑт па пурмӑсӑт «Хун­зи» рәт община ёх­ӆўв тәсӑт. Щиты мўӊ хущева кашӑӊ пўш вошӑӊ хӑннєхуятӑт юхтыйӆӆӑт па хӑнты му­зей хотэвн арсыр ванӆтуп­сэт ӆывеӆа вєрӆыйт. Щи унтасн арсыр вошӑӊ мир сӑмӑӊа мўӊ киникайт ӆўӊӑтты хотэв тӑм йисн еӆӆы пєӆы тӑйты питсӑт. 

- Светлана Аскатовна, библиотека хотн хуща, нын, аӆпа, сыр-сыр ли­тературной вәйтан­тупсэт Югра па арсыр мўвӑт поэтӑт па писателят пиӆа вєрӆӑты?

- Мўӊ киникайт ӆўӊӑт­ты хотэвн кашӑӊ оӆ мӑр ар пєлӑк Югра мўвев поэтӑт па писателят пи­ӆа, мӑта хәйт-нєӊӑт «За­мысел» тӑхийн вәӆӆӑт, вәйтантупсэт ӆэщӑтӆўв. Тәп тӑта мосванӑн Ли­дия Журавлёва поэ­тесса литературной вәйтан­тупсы мўӊ киникайт ӆў­ӊӑтты ёхӆўва-нєӊӆўва вєрӑс. Щӑӆта Москва хон вош па Санкт-Пе­тер­бург эвӑӆт поэтӑт па пи­сателят ищиты пура-пурайн мўӊ хущева юх­тыйӆӆӑт. Тӑмхӑтӆ нӑӊ әмӑщ литературной вәй­тантупсы тӑта кӑт ясӑӊӑн тәса ванӆтӑсӑн, вән пә­мащипа!  

Путӑр хӑншӑс: 
Владимир Носкин