Лыпӑт хойты тыӆӑщ 5-мит хӑтӆӑн Москва вошн «Всероссийский этнографический фестиваль» нємпи вән мирхот вәс. Щив юхтум ёх Россия мўвевн вәӆты арсыр мирӑт йис вєрӑт оӆӑӊӑн путӑртсӑт. Югра мўвев эвӑӆт мирхота «Вотма ёх» община хуятӑт ӊхсӑт. Ӆыв округев кәща ёх унтасн м па хурамӑӊ ванӆтупсы ӆэщӑтсӑт.

Щи ванӆтупсыйн Югра мўвев оӆӑ­ӊӑн путӑртӑс па мойӊ ёха вўща ясӑӊ лупӑс «Вотма ёх» тӑхи кәща нє Татьяна Тарлина. Ӆўв хӑнты арӑт ма вәты хӑнты хә Ти­мофей Молданов пиӆа кўшмӑӆтыйӆсӑӊӑн, ӆәӆн иса вєрӑт ма ат мӑнсӑт, хуӆыева мир м нумсӑт пиӆа ат рәпитсӑт па еӆӆы м па тўӊ ӛш тәп ат питӆ. Щи вєр Москва вошӑӊ мира па мойӊ ёха шєӊк мәстӑсы. 

«Вотма ёх» тӑхи хуятӑт Москва вошӑӊ мира йис щирн ёнтум хӑнты па вухаӆь мир ӆәмӑтсухӑт, юнтутӑт, тунты эвӑӆт вє­рум пурмӑсӑт ванӆтӑсӑт. Щи пурмӑсӑт ёнтсӑт па вєрсӑт: Татьяна Салтыко­ва, Татьяна Бахтиярова, Ирина Арабок, Людмила Молданова (Яркина), Еле­на Гришкина, Клавдия Кулакова (Тарлина), Галина Кечимова, Антонина Лед­кова, Алёна Бубко (Хороля) па Снежана Пуйко. 

Мирхот пурайн юх­тум хуятӑт ӊта пӑсан әхтыйн омӑсман шуши мир йис вєрӑт оӆӑӊӑн путӑртсӑт. Татьяна Тарли­на щӑта ясӑӊ тәс, хутыса Ёмвош округевн мӑӊ тӑ­хет ӆавӑӆман тӑйӆыйт. Тимофей Молданов мойӊ ёха йиӆуп киникайӆ ванӆ­тӑсӆэ, щи әхтыйн ӆўв интӑм кӑпӑртӑӆ. Щӑ­та ӆўв Пўпи як хәӆмит хӑтӆ оӆӑӊӑн хӑншӑс. Щи пу­райн Москва вошӑӊ мир па мойӊ ёх уша павӑтсӑт, муйсӑр йис вєрӑт хӑнты па вухаӆь мирӊӑн тӑйӆӑӊӑн.

Хӑнты ясӑӊа тулмащтӑс: Надежда Рагимова