Юхи хӑщум оӆӑтн арсыр вєрӑта вәнӆтӑты хӑрӑтн Людмила Николаевна Костина шиваӆӑӆум. Щиты тӑм ванӑн «Югра-Экспо» нємпи ванӆтупсэт ӆэщӑтты хотн ӆўв пиӆэӆа вәйтантыйӆсум па путӑртсум.
 

Ӆўв мєт сыры ӑӊкеӆ-ащеӆ оӆӑӊӑн ай тәс:

- Ӑӊкєм Дарья Ивановна Вандымова, ӆўв – хӑнты ими, вәйт ӆор тыӆӑщ 1-мит хӑтӆӑн 1928-мит оӆн Касум кәртӑн сєма питӑс. Ащєм Николай Андрее­вич Ромбандеев 1926-мит оӆн Хошлог кәртӑн сєма питӑс, щӑӆта Ӆэв кәртӑн вәс. Ӆавӑрт ӆаӆь пурайн Ӆэв юхан эвӑӆт нуви хўӆ веӆпӑсӆӑты пӑта Аса китсы. Касум кәрт эвӑӆт хўӆ веӆпӑсӆӑты ёх Игрим кәрта китсыйт, щӑта ӆыв сємхўӆ веӆпӑсӆӑсӑт. Щи­ты Сўмӑтвошн айӆат кӑт­ӊӑн Николай Андреевич Ромбандеев па Дарья Ивановна Вандымова вәтаӊа йисӊӑн. Анеева кәртӑн хӑншаньщсӑӊӑн па мой вєрсӑӊӑн. 

Сўмӑтвошн ащєм вәнт вантты вєра вәнӆтыӆӑс, щӑӆта Вўтвоша рәпитты китсы. Ӑӊкєм вәӆупсэӆ хўват хўӆ веӆпӑсӆӑс. Щӑта Светлана упєм па ма сєма питсумн.

Людмила Николаевна еӆӆы путӑртӑс, хуты ащеӆ мәшитты питӑс, щирн ӆыв щемьяеӆ Касум кәр­та касӆӑс. Щӑта Раиса апщеӆ сєма питӑс. Ӛхӑт Ромбандеевӑт Поӆнавӑт кәрта вәӆты мӑнсӑт, вантэ, щаӆтаса кєншӑка тўтӑӊ хопн Сўмӑтвоша ӊхты вәс. Ащеӆ мәшитӑс, ӆўвеӆа ванкўтӆы Сўмӑтвош район пәӆьницая ӊхты мосӑс. 

Юӆн кўтэӆн ӆыв кӑт ясӑӊӊӑнӑн путӑртсӑт, щи вєр оӆӑӊӑн Людмила Ни­колаевна щиты нәмӆӑӆэ:
 Ащєм – вухаӆь хә, тәп хӑнты ясӑӊ ищи ма вәйтӑс, ӑӊкєм – хӑнты ими, ищи айӆтыева ву­хаӆь ясӑӊа вәнӆӑс. Итәх пурайн ӑӊкєм мӑнєм ӆяв­тӑс ки, ма ӆўвеӆа ястăсум: «Я, щи, ма нӑӊ хӑнты яс­ӊенӑн путӑртты ӑн пит­ӆум, ма ащєм ясӑӊӑн пу­тӑртты питӆум». Щӑӆта ащєм мӑнєм ӆявӑтӆ ки, ма ӆўвеӆа ищиты щи пу­тӑртсум. Щимӑщ ущхуӆь вєр ма ай пурамн вәӆӆяс. 
Поӆнавӑт кәртӑӊ ӑшко­лая мӑнмємн ма рўщ ясӑӊ ӑн тӑйсум, щирн еша ӆа­вӑртшӑк вәнӆтыйӆты вәс. Щит пӑта ӑӊкєм ванкўтӆы ӑшколая вохсы па лупсы, ӆәӆн юӆн кўтэӆн рўщ ясӑ­ӊӑн ат путӑртсўв.

Дарья Ивановна тәса ёнтӑсты па тыянты нєӊа вәс. Ай Люда ӆўв пиӆэӆа вантман ищи ёнтты па тыянты вәнӆтыӆӑс. Щиты яӊ оӆ ӆувата вмаӆн аканеӆ пӑта арсыр ху­рамӑӊ хӑншет пиӆа ӆә­мӑтсухӑт тыянтӑс. 

Поӆнавӑт кәртӑӊ ӑшко­ла етшуптумаӆ пийн Людмила Тюмень воша мӑнӑс. Щӑта технической училища №33 хуща нянь вєрты вєр хўват лаборан­та вәнӆтыӆӑс. И пўш юхи Поӆнавӑта рўтьщӑты юхӑт­маӆн Ас вухаӆь хә Николай Тарасович Кос­тин пиӆа вәйтантыӆӑс. Ӆўв, нєш, ищи Тюменян вәнӆ­тыӆӑс, Людмила пиӆа и общежитияйн, тәп нӆмит этажӑн вәс. Вәнӆтыйӆты етшуптумеӆ пийн кӑтӊӑн мой вєрсӑӊӑн.

Катрайн вәнӆтыйӆты етшуптумаӆ пийн щи тӑхийн хәӆум оӆ рәпитты мосӑс. Тәп нянь вєрты хотн иса пурайн рўвӑӊ вәс, щирн айӆат Людмилая щӑ­та шєӊк ӆавӑрт рәпитты вәс. Ӆўв щи рәпата эвӑӆт йира мӑнӑс па икеӆ пи­ӆа Поӆнавӑт кәрта кєр­ӆӑс. Тӑта питы вухсар єнмӑӆты тӑхийн рәпитты оӆӊитӑс. Щӑӆта юхи хӑ­щум 1980-мит оӆӑтн щи тӑхи лӑп тәхӑрсы. Еӆӆы Людмила Николаевна 25 оӆ Поӆнавӑт кәртӑӊ пәӆьницайн пәсӑнтыйӆ­ты нєӊа рәпитӑс. 65 оӆа вмаӆн рўтьщӑты мӑнӑс. Иха ӆўӊӑтты ки, Л.Н. Кос­тина 40 муӆтас оӆ рәпитӑс.

Еӆӆы Л.Н. Костина ӆўв щемьяеӆ оӆӑӊӑн путӑр­тӑс:

- Икєм ащеӆ Тарас Павлович Костин м вош мӑӊ тӑхеӆ вантман тӑйсӑӆэ. Николай пухӆ мосты пойкщӑты вєра вәнӆтӑс, щирн икєм иса вәӆупсэӆ щив ӊхиӆӑс па арсыр йир поры вєрӑс, ма ӆўвеӆа иса пурайн нётсум. 
Мўӊ щемьяевн кӑт эви сєма питсӑӊӑн, щит Галина па Виктория. Икєм ӑнтәма вмаӆ пийн ма атэӆт эвеӊӑӆам єнмӑӆсум. Вән эвєм Поӆнавăт кәртӑн вәӆ, ай эвєм – Ёмвошн. Ма хәӆум хиӆы тӑйӆум. 

Рўтьщуман Людмила Николаевна арсыр ху­ра­мӑӊ хӑншӑӊ ӆәмӑтсухӑт тыянтӑӆ. Поӆнавӑт кәртӑӊ культура хотн «Сорнеӊ ёш» тӑхи вәӆ, щӑта кашӑӊ рўтьщӑты хӑтӆӑн имет пиӆа ӑктӑщман ёнтӆӑт па тыянӆӑт. 

Юхи хӑщум оӆӑтн Л.Н. Костина ар­сыр ванӆтупсэта вохты пит­сӑт, ӆўв щӑта тыянтум ӆәмӑтсухӆаӆ ванӆтӑӆ па эвет, нєӊӑт хурамӑӊ хӑн­шӑӊ вейт, посӑт тыян­ты вәнӆтӑӆ. 

2018-мит оӆн ӆўв «Шедевры вя­зания», 2024-мит оӆн ӆўв вє­рӑнтты нє иты округ кәща премияйӊӑн ёша хоӆумтӑс. 

Путӑр хӑншӑс: 
Людмила Гурьева