«Мўң кимит о Югра мўвевн «Вурңа хӑт» постӑўв. Тӑм емӑңхӑт арсыр мирӑт яха ӑкӑт. Щиты мўң шуши мирӑт культура нух аумўв» – лупӑс Югра мўв кәща ӑңкӑр хә Геннадий Бухтин. Ай кєр тыӑщ 13-мит хӑтӑн Ёмвошн Вурңа хӑт постӑсы.

Щи емӑңхӑта округ арсыр районӑт, вошӑт эвӑт мойң ёх юхӑтсӑт. ыв ӑктӑщсӑт археопарк хущи хурамӑң тӑхийн. Емӑңхӑт пўншӑс хӑнты мир поэтесса Мария Волдина. Щи юпийн яксӑт, арисӑт Югра мўв арсыр тӑхетн вәты ёх.
Вошӑң няврємиет щи хӑтӑн турн па ващ юх нувӑт эвӑт тыхӑт вєрсӑт. Щӑта щи тыхӑт юкана аканят, юнтутӑт, єпаң мавӑт вўты рӑхӑс. Г. Бухтин 2012-мит он сєма питум шуши няврємӑта мойупсэт мойӑс.
Мєт әмӑщ вәс вантты, хутыса няврємӑт па вән хуятат кӑссӑт, ыв 400 мєтра хўват хәхӑсӑт, әхӑ шәпи навӑрсӑт, тынщаң тӑхсӑт, нё єсӑсӑт, ӛращсӑт, хўваттыя хәум пўш навӑрсӑт. Кӑсты ёх Нижневартовской район эвӑт тыв ищи юхӑтсӑт. Мӑнєма шєңк әмӑщ вантты вәс, хән Ёмвошн вәты вухаь пух Сергей Анямов әхӑ шәпи 301 пўш наврӑс. Россия мўв этноспорт Федерация кәща хә Алексей Кыласов ищи щи емӑңхӑта юхтыӑс, ўв лупӑс: «Шєңк әмӑщ хуты шуши мир емӑңхӑтӑт вуаңа вєрсыйт. Тӑм ванӑн рўщ мир ӛращты кӑсупсэт ЮНЭСКО тӑхия уңсӑт, ма ӑңхаум, ән «Вурңа хӑт», ай хопӑтн кӑсты вєр па па шуши мир кӑсупсэт ищи ЮНЭСКО культурной наследия ат йиӑт».