Кӑсупсыйн вәум хә
Ай кєр тыӑщн Касум вошн Нуви сӑңхум районӑн вўєң ёх емӑңхӑт мӑнӑс. Вўы ӑвӑты ёх кӑсупсыя ӑктӑщум хӑннєхуятӑт эвӑт ма М.К. Молданов пиа путрємӑсум.
– Михаил Кузьмич, нӑң сырыя, апа, Кaсум совхос хущи вўэт авӑты хәя рәпитсӑн?
– Сыры иса хәс о мӑр ма щӑта щи рәпитсум. Щӑта кўш катра пурайн, кўш тӑм йисн вўы тащӑт хущи кашӑң ат-хӑт ищки муй ертӑң хӑтӑтн рәпатайт эщӑтты шєңк авӑрт. Щит, вантэ, и вєр. Кимит вуаң вєр, щит вўы авӑты хуятӑт шєңк шим тыӑщ вухн сухуптӑыйт.
– Ин па нӑң, апа, пенсияйн рўтьщӑӑн?
– Ӑнтә. Пенсияя мӑнты оам ӑн тӑрумыйт па щит пӑта тӑта вошн ӑ рәпата тӑйум. Щи рәпатаем тумпийн ма юкан вўыам ӑвӑум.
– Вўы нюхи тӑм йисн, апа, ищи е тыныаты?
– Ин шим вўы тӑйўв па щит пӑта нюхи е тыныты щир па ӑнтәм. Сырыя, вантэ, еша аршӑк вўы вәс па ма и пўш нюхи е тынысум па щи вухӑт унтасн «Буран» әтсум.
– Тӑм вўєң ёх кӑсупсыйн оӑң тӑхия питаты ки, нын щиранӑн, ям мойупсыйн кәща ёхн мӑыйты муй ӑнтә?
– Ма щирємн, оӑң тӑхия питты хӑннєхә «Буранан» мойӑты мос. Щи пурайн ән айат ёх хуыева тӑм кӑсупсыя арӑтсӑт. Ин нӑң щи вантэн, хуты тӑта вәншака ювум ёх тәп кӑсты юхӑтсӑт. Итәх щос кӑсан-кӑсан па тәп нуви тўт эвӑт рәпитты шай пўтн мойӑыйн. Ма нәмӑстємн, тӑмӑщ кӑсупсэт пӑта ям мойупсэт вєрты мос!
Номер Ханты Ясанг:
№ 8 (3380) 25.04.2013
