Ай кєр тыӑщн вухаь хә Руслан Проводников Карсон вошн Калифорния мўвн Тимоти Брэдли пиа бокс щирн кӑсӑс. Хутыса щи кӑсупсы мӑнас, щи оӑңӑн Руслан путӑртӑс, хән Ёмвошн округ кәща нє Н. Комарова, округ дума депутатӑт, правительствайн рәпитты ёх, айат хуятӑт, айке кӑншты па хӑншты ёх пиа вәйтӑнтыӑс.

Руслан Проводников сєма питӑс Сўмӑтвошн 1984-мит он. Яң оа ювман ащен «бокс» секцияя тәсы, вантэ, ўв ванкуты пухӑт пиа кула питӑс. Оӑңмит вәнтӑты хуята Евгений Вокуев йис. Ай па айат пураен Руслан любительской бокс щирн 150 пўш кулащтӑс, щи эвӑт 130 пўш нўх питыӑс. 2006-мит он ўв оӑң пўш «профессиональный бокс» вєрн кӑсӑс, ўв пиэа российской боксер Кирилл Артемьев сєңканьщӑс. Руслан щӑта нух питӑс. Щи юпийн ўв па 23 хә хуят пиа кулащтӑс, щи кўтн тәп кӑт пўш нух ӑн питӑс.

Мос лупты, хуты Калифорния мўва Руслан Проводников пиа Югра мўв эвӑт вухаь ёх яңхсӑт, щит депутатңӑн Надежда Алексеева па Татьяна Гоголева, айат якты-ариты ёх. Руслан кӑсты хӑра єтты пурайн хурамӑң вухаь арсув сый сащӑс. Айат вухаь ёх яксӑт.

Округ дума депутат Надежда Алексеева лупӑс: «Мўң пӑтэва па иса мир пӑты Руслан тӑм кӑсупсыйн нух питӑс. Кашӑң хӑннєхә щи шивӑӑс. Кӑсты хӑрн шєңк ар рўщ хӑннєхә вәс». Руслан Проводников ясңӑ щирн, Тимоти Брэдли – щит шєңк ӛращты хә, рўщ хәйт ўв пиэа ин вәнты ӑн кӑссӑт. «Ма иса мир эвӑт пищмайн хӑншсыюм. ыв лупӑт, хуты хўвн щимӑщ кӑсты вєр ӑн вантсӑт. Тимоти пиа кулащмєм юпийн ма оңӑн ӑңхасум профессиональной бокс вўщкӑты. Щӑта мир пиа путӑртмєм юпийн пасыра нәмӑсты питсум. Ин ӑңхаум еы кулащты», – лупӑс Руслан. Округ дума депутат Татьяна Гоголева ясңӑ щирн, щи пурайн, хән Руслан па Тимоти кулащты вєр юпийн лупсӑт, хуты Тимоти Брэдли нух питӑс, кӑсты хӑрн омӑсты ёх иса увты питсӑт. Вантэ, иса ёх нәмӑссӑт, хуты Руслан нух питӑс. Судьяйт пасыра нәмӑссӑт.

Мирхот пурайн Руслан Проводников округ кәща нєңа Наталья Комаровая боксерской пос мойӑс, щи утн ўв Т. Брэдли пиа кутӑрмӑс. Н. Комарова ўвеа вән пәмащипа лупӑс па иньщӑссы, мосӑң, матч-реванш Тимоти Брэдли пиа Югра мўвевн эщӑтты? Тәп Руслан лупӑс, хуты щи кӑсупсы Америка мўвн ат вә, еы оӑңмит кулащты вєр тӑта ат вєры.

Хӑнты мир поэтесса Мария Волдина лупӑс, хуты Руслан – щит шуши мир ӑңкрӑң-кўншӑң хуят. ўв ӑңха, ән Руслана Проводникова еы округ правительства эвӑт хәум нуви вўы, хурамаң әхӑ, нуви кўвщ, нуви вейңӑн мойӑты мос. Наталья Комарова лупӑс, хуты щит ям ясӑң, еы щи утӑт эщӑтты мос.

Руслан мирхот пурайн лупӑс, хуты Югра мўвевн «любительский бокс» вєр нух аумты мос. Ин вәнты шим хуят щи вєрн кӑс.

Шуши мир ассамблея кәща Еремей Айпин Руслана щи ям кӑсупсы пӑта Югра мўв герб пиа щос мойӑс.