Форма поиска

Для слабовидящих
  • Хантыйский
  • Русский

ФИЛАНЦИДА нєм тӑйты хӑнты ими

Ай Аңкум кәртӑн ма ям хӑнты ими пиа вәтӑңа йисум, ўв пәьницайн санитаркая рәпитӑ. ўв нєм Филанцида Григорьевна Мороз, эви опращнємӑ Аликова вәс.

ўв щиты путӑртӑс:

– Ма 1953-мит он Вән Юрты кәртӑн сєма питсум. Щимӑщ ущхуь нєм мӑнєма ӑңкєм әйң Надежда Владимировна Баринова мӑс, ўв ин Вән Аңкум кәртӑн вә. Катра пурайн мўң кәртэвн Аликовӑт рәт тухапи Бариновӑт, Мамаровӑт, Доровинӑт па Руковӑт хӑнтэт вәсӑт. Ванӑн Поснокәрт, Лорба кәртңӑн вәсңӑн. Ин щи кәртӑт ӑнтәмӑт. Хўвн вән йиңк юпийн мирев па кәртӑта касӑс. Ма ащєм Украина мўв эвӑт тыв, Увӑс мўвева, нӑртамы китум хәя вәс. ўв тӑта юх сэвӑрман, хў вепӑсуман рәпитӑс. ўв ӑңкєм имия ӑн вўсэ. Щӑта юхы рәт Украина мўвӑа кєрӑс. Щи юпийн ӑңкєм икия мӑнӑс. Мўң семьяевн ня няврєм вәс. Щи пурайн кәртэвн колхоз, леспромхоз па рыбоучасток тӑхет вәсӑт. Ӑңкєм рыбоучасток хуща рәпитӑс, хў вепӑсӑс. Ма ўвеа ищи нётсум.
Ӑшкола юпийн Филанцида Тюменян училищайн нюхи эщӑтты вєра вәнтыӑс. Щи юпийн ям арӑт о мӑр Тәпӑ вошн рәпитӑс. Щӑта рәт мўвӑа Ай Аңкум кәрта мӑнӑс. Тӑта ики вєрӑс, Николай Щербаков ике пиа кӑт пухңӑн Пётр па Николай єнмӑтӑс. Пухңӑ ин Ай Аңкум кәрт пўңӑн «Сургутнефтегаз» нємпи тӑхийн рәпитӑңӑн. Әхӑт Филанцида Григорьевна ике пиа кӑтна мӑнсӑңӑн. Щӑта кимит пўш икия мӑнӑс.
Ма иньщӑссєм, муй пӑты ўв рәт хӑнты ясңӑ ӑн вәэ. Юхы Филанцида Григорьевна лупӑс, хуты юн ӑңке тәп aңкаңке пиа рәт щирн путӑртӑс па ыве ӑн вәнтӑсэ. Щи пурайн ыв мўвеа шєңк ар хуят нӑртамы китсы, щит украинцӑт, калмыкӑт па па мирӑт. Щи пурайн итәх няврємӑт ӑшколая тәп рәт хӑнты ясӑңӑн путӑртман юхтыйсӑт. ыв имухты рўщ ясӑңа вәнтӑсыйт. Интернӑтн па ӑшколайн ывеа хӑнты щирн путӑртты ӑн рӑхӑс. Шуши мира ӑн рӑхӑс кәртӑтн хӑнты емӑңхӑтӑт эщӑтты, щит пӑты Мастар мўвн мєт сырыя хӑнтэт рәт ясңе вәтшасэ.
Еы Филанцида Григорьевна рәпатай оаңан путӑртӑс. ўв хўвн пәьницайн санитаркая вә. 2003-мит он пенсияя мӑнмӑ пурайн ўв юкана мень рәпитӑс. еккар нєңӑн Ираида Забувайло ўв йипа рәпатая вохсы. Вантэ, ай тохтўра вәнтум эвет ай кәртӑтн рәпитты ӑн ӑңхаӑт.
Ювоӑңӑн ўв кәртӑң нўшайт оӑңӑн путӑртӑс. Юхи хӑщум вет о хӑнтэт Ас хўӑт вепӑсӑты пӑты вохты нєпекӑт хӑншты питсӑт. ўвеа ӑн мәстӑ, хуты шим хў вепӑсӑты рӑх. Тәп хӑнты хўӑт мӑнты пурайн иса кәртӑң мир вепӑсуман яңхӑт.
Юхи хӑщум оӑтн 2008-мит о вўш эвӑт, хән вән йиңк вәс кәртӑң мир мисӑт, овӑт, ошӑт тӑйты ӑн питсӑт. Ин тәп хәум-ня хоттє ёх вой-хў тӑйӑт. Филанцида Григорьевна лупӑс, хуты Ас шәпи турн хӑрӑт вәӑт, итәх пирӑщ ёха юхан шәпи турн тәты авӑрт. Вантэ, катра пурайн мир овӑт тӑйсӑт. Ин тӑ ӛшӑт тәса ӑн сыстамыйт, «Буранӑн» авӑрт турн тәты.
Филанцида Григорьевна лупӑс, хуты юхи хӑщум оӑтн «Сургутнефтегаз» тӑхийн рәпитты ёх шєңк ар юх сэвӑрӑт па браконьерӑт нартӑмы кyрӑң войт веӑт, щирн ин щи вой шима йис.
Мєт вән нўша – шит Ай Аңкум кәртӑн шєңк ар катра хот вә. Ф.Г. Мороз ищи йиуп хот авӑман очередян хӑншаньщман вә.
Тӑм он Ф.Г. Мороз 60 оа йи, щит пӑты мўң ўвеа ям ясңӑт китўв. Ешӑк Филанцида Григорьевна, хўв мӑр мир ямӑман муйкєм арӑт хӑннєхәя нётсан, щит пӑты вән пәмӑщипа. Нәмӑсўв, ешавә ўв йиуп ӑщкам хотн мӑыйн.

Женщина с необычным именем Филанцида

В портретном очерке о Мороз Филанциде Григорьевне рассказывается о её жизни, работе. Она родом с д. Большие Юрты Октябрьского района, выросла в традиционной хантыйской семье.

Такое необычное имя ей было дано при рождении подругой матери – Надеждой Бариновой. По словам моей героини, её редкое имя удивительно легко запоминается людьми.

После окончания школы Филанцида работала на Тюменском мясокомбинате. Несколько лет назад вернулась на свою малую родину – в село Малый Атлым, устроилась на работу в амбулаторию санитаркой.

С мужем воспитали двух сыновей, они работают вахтовым методом на месторождение «Сургутнефтегаз».

В разговоре Филанцида Григорьевна рассказала о проблемах села. В последнее время население меньше стало заниматься сельским хозяйством, держать домашний скот.  В посёлках насущна проблема безработицы, особенно среди мужского населения, поэтому мужчины устраиваются на месторождения «Сургутнефтегаз». Также существует проблема большого количества ветхого жилья на селе. Ф.Г. Мороз уже несколько лет стоит на очереди по улучшению жилищных условий.

Рубрика: 
Шуши мирев вәԯупсы - Жизнь хантыйского народа
Номер Ханты Ясанг: 
№ 8 (3380)
25.04.2013
Loading...