Ай кєр тыӑщ 27-29-мит хӑтатн Ёмвошн «Центр народных промыслов и ремёсел» хотн нивӑмит пўш «Ремёсла и промыслы: прошлое и настоящее» межрегиональной детско-юношеской научно-практической мирхот мӑнӑс. Тӑм пўш 65 няврєм нумсӑң нєпекӑт китсӑт, щи эвӑт 36 хуят тыв юхӑтсӑт.

Ремёслайт центр кәща нє О. Бубновене вўща ясӑң вєрман лупас, хуты кашӑң о аршӑк няврєм щимӑщ мирхота юхтыйты питӑс. Мирхот пўншум пурайн тыв юхтум эветпухӑт ещӑт Ёмвошӑң реабилитационной центран вәты няврємӑт яксӑт па арисӑт.
Хәум хӑт мӑр хӑт кўтуп вәнты айат ёх нумсӑң нєпекӑт ўңатсӑт. Мастер-классӑт пурайн няврємӑт, мойң ёх арсыр вєрата вәнтӑсӑт.
Мєт ар няврєм Лянтор вош эвӑт юхӑтсӑт, әмӑщ хәантты вәс, хуты ыв хӑнты пурмӑсӑт оӑңӑн путрӑт хӑншсӑт, щит южно-хантыйской хӑншет оӑңӑн, ӑнтуп кє тывты вєр, вўы сух тӑңӑты па па вєрӑт оӑңӑн. Щит пӑты ыв ай хӑнты кәртата яңхӑт па вәна пєлка ювум хӑнтэт эвӑт арсыр вєрӑт оӑңӑн иньщӑсӑт, нєпекӑт хӑншӑт.
Әмӑщ уша вєрты вәс, хуты рўщ няврємӑт ыв йис вәупсэ тухапи округев шуши мирӑт культура оӑңӑн ищи уша вєрӑт па нумсӑң путрӑт хӑншӑт. aңки пос вошӑң эвеңӑн Настя Артюхова па Вика Целоусова «Хӑнты мир емӑң юхӑт» нємпи путӑр эщӑтсаңӑн, юх хурӑт пиа хурамаң ернасңӑн аьсӑңӑн.
Итєх няврємӑт веьщи Ёмвоша юхӑтсӑт, щит пӑты ыв арсыр катра пурмӑсӑт авӑты хотата, рўтьщӑты тӑхета тәтясыйт.
Мирхот етшуптум пурайн ремёслайт центр кәща нє Ольга Бубновене лупӑс, хуты нив о мӑр щимӑщ мирхотн 518 няврєм путрӑт ўңӑтсӑт па арсыр вєрӑта вәнтуман мастер-классӑт вєрсӑт. Еы лупӑс: «Кашӑң о арсыр вошӑт эвӑт няврємӑт мўң мирхотева нумсӑӈ нєпекӑт хӑншӑт, тӑм он Челябинск вош эвӑт айат ёх ищи арсыр пурмӑсӑт вєрты оӑңӑн путрӑт китсӑт. Ма щирємн, еы щимӑщ няврємӑт эвӑт итәх хуятӑт йис вәупсы єрамтты, мўв ипи йис пурмӑсӑт кӑншты ёха йиӑт».
Щӑта тыв юхтум пушхӑт па ыве вәнтӑты вән хуятӑт ишӑкты нєпекӑт па «Югория» нємпи энциклопедия киника ёша хоумтсӑт.
Ювоӑңӑн «Научное шоу сумасшедшего профессора Николя» нємпи мутрайт аьсӑт.