- Хантыйский
- Русский
Касум вошн няврємӑт айкеӆӑт хӑншты вәнӆтӑсыйт
Вән кєр тыӆӑщ 3-5-мит хӑтӆӑтн Нуви сӑӊхум район Касум вошн ма няврємӑт пиӆа «Айкеӆӑт хӑншты айӆат хуят» вәнӆтӑты хӑр вєрсум. Щӑта Касум вош ӑшколайн вәнӆтыйӆты пушхиет ӑктӑщсӑт.
Мєт оӆӑӊ пўш щимӑщ мирхот 2015-мит оӆн Касум вошн вєрсы. Щи вәйтантупсы Раиса Решетникова тәс. Щӑӆта няврємӑт 2017-мит оӆн айкеӆӑт хӑншты па хур вўты вәнӆтыйӆсӑт. Щи пурайн щив газетаев эвӑӆт Раиса Решетникова, Ульяна Данило па Ирина Самсонова, щи тумпи Марий Эл мўв эвӑӆт хур вўты хә Денис Речкин ӊхсӑт.
Щӑӆта 2019-мит оӆн Касум вош няврємӑт пиӆа Надежда Вах вәйтантыӆӑс. Тӑм оӆн ма пушхиет вәнӆтӑты ӊхсум.
Тӑм пўш интернатн вәӆты няврємӑт вәнӆтыйӆсӑт, ӆыв Вўтвош, Ӆорвош па ванӑн вәӆты вәнт шушет эвӑӆт юхӑтсӑт. Ӆыв тумпеӆн вәнӆтыйӆты хӑра Касум вошӑӊ эви Надежда Белкина юхтыӆӑс. Иса мирхотн 16 няврєм вәнӆтыӆӑс.
Оӆӑӊмит хӑтӆӑн ма пушхиета путӑртсум, хутыса айкеӆӑт па хӑннєхә оӆӑӊӑн путӑр хӑншты мосӆ. Щӑӆта ӆыв хоттєӆ ёхӆаӆ оӆӑӊӑн путрӑт хӑншсӑт.
Еӆӆы хӑтӆӑн няврємӑта кӑсупсы оӆӑӊӑн путӑртсум, мӑта ут мўӊ редакцияевн вєрсы. Ма лупсум, ӆәӆн ӆыв кәртӆаӆ, вәнт шушиӆаӆ оӆӑӊӑн путрӑт ат хӑншсӑт. Еӆӆы щи путрӑт кӑсупсыя китты щир тӑйӆӑт. Няврємӑт вән путрӑт вәнт шушиӆаӆ, Вўтвош па Ӆорвош оӆӑӊӑн хӑншсӑт. Еӆӆы щитӑт «Хӑнты ясӑӊ» газетаевн няврємӑт пӑта вєрум лопасн єсӑӆӆӑӆўв.
Мосӆ лупты, Касум вош интернатн вәӆты итәх няврємӑт хӑнты ясӑӊӑн путӑртӆӑт, итәхӑт ясӑӊ хәӆӆӑт, тәп путӑртты пищ ӑн тӑйӆӑт. Мєт әмӑщ, хуты щӑта вәӆты и эви еӆӆы айкеӆӑт хӑншты хуята вәнӆтыйӆты ӆӑӊхаӆ. Щирн, мосӑӊ, хәнты мўӊ газетаева рәпитты юхӑтӆ. Интӑм ӆўв 10-мит классӑн вәнӆтыйӆ, хӑнты ясӑӊӑн ма путӑртӑӆ.
Редакцияевн мўӊ тӑм проект әхтыйн 2015-мит оӆ вўш эвӑӆт рәпитӆўв. Щи пура вўш эвӑӆт Сўмӑтвош район Тэк, Саранпауль, Ӆэв вошӑтн, Нуви сӑӊхум район Касум, Ваньщавӑт, Поӆнавӑт кәртӑтн, Ёмвош район Кышик вошн няврємӑт айкеӆӑт хӑншты па газета єсӑӆты вәнӆтӑсўв. Ӆӑӊхаӆўв, ӆәӆн хәнты щи пушхиет мўӊ хӑнты па вухаӆь газетайӊӑӆўва рәпитты ат юхӑтсӑт.
Путӑр хӑншӑс:
Надежда Рагимова
В Казыме готовят юных корреспондентов для газеты «Ханты ясанг»
С 3 по 5 апреля 2021 года в селе Казыме Белоярского района состоялся семинар по проекту «Юный корреспондент». Его участниками стали учащиеся Казымской средней общеобразовательной школы, проживающие в интернате.
В первый день дети узнали о том, как пишутся журналистские статьи, а именно, информационные материалы и очерки. Они учились писать материалы о своей семье, о бабушках и дедушках.
На второй день воспитанники интерната узнали о конкурсе «История родовых поселений», который проводит редакция национальных газет «Ханты ясанг» и «Луима сэрипос» совместно с департаментом общественных и внешних связей и окружной телерадиокомпанией «Югра». В этот день они написали информационные материалы о поселениях, в которых они выросли, это стойбища Белоярского района, деревни Нумто и Юильск.
Надо отметить, что в интернате живут дети, свободно владеющие родным хантыйским языком.
Всего в семинаре приняло участие 16 детей. По его результатам в газете «Ханты ясанг» будет выпущено приложение, в которое войдут лучшие рассказы детей с прошедшего семинара.
Напомним, работа над проектом «Юный корреспондент» в редакции национальных газет началась ещё в 2015 году. В Казыме он состоялся уже в четвёртый раз.
Надежда Рагимова
