Шуши мирев культура - Культура обско-угорских народов

Няврємӑт этнокультурно-образовательной хотн Ёмвошн Ас нопӑтты тыӆӑщ 13-мит хӑт­ӆӑн вошӑӊ мир пӑта «Нәмӆэв» нємуп мирхот вєрӑнтса. Щи мирхот мӑӊхӑтӆ пӑта вєрса, ин 77 оӆа йис, хән мўӊ Вуӆаӊ ӆаӆьн нух питсўв.  

Т.А. Молданова ар оӆ мӑр хӑнтэт па вухаӆь ёх вәӆмӑт нух хӑншӆӑӆӆэ па щи вантум утӑт наука щира тәӆӆэ. Ӆўв «Архетипăт хӑнты мир вәӆмӑтн» киника хӑншӑс па арсыр наука щир нивӆ нєпек щи оӆӑӊӑн хӑншман тӑйӆ. Щи кўтн и наука нєпекӑӆ нюр няврєм вәӆмӑт оӆӑӊӑн. Ӆўв ясӊӑӆн, йис хӑнты вәӆупсыйн няврєм вантум утӑт пєӆа вєра вантман вәсӑт.    

Муй хурасӑӊ рәт мўвие!
Муй хурасӑӊ Ас мўвие!
Сўмӑт хн иса єнмум,
Вусты ваншийн иса єнмум!

Владимир Енов

Щимӑщ нєм етнхот тӑйс, мӑта ут Ас нопӑт­ты тыӆӑщ 20-мит хӑтӆӑн Ёмвошн киникайт ӆўӊӑтты хотн вәс. Щит хӑнты моньщӑт хӑнш­ты хә, айкеӆӑт ӑкӑтты хә Владимир Егорович Енов сєма питум хӑтӆăӆ пӑта ӆэщӑтман вәс. Ӆўв нәптӑӆ 55 тӑӆа йис.

Лыпӑт єнумты тыӆӑщ 3-мит хӑтӆӑн Ёмвошн «БуквА» нємпи киникайт ӆўӊӑтты хотн Ямал мўв эвӑӆт юхтум ар оӆ хӑнты ративайн, телевиденияйн рәпитум нє, режиссёр, киникайт хӑншты па оса вєрӑт тәты нє Зинаида Викторовна Лонгортова (Хартаганова) пиӆа вәйтантупсы вәс.

Мєт сыры мойӊ нє киникайт ӆўӊӑт­ты хота хӑншум нє­пек­ӆаӆ мойӆăсӆэ. Тӑм вәй­тантупсы тәты нє Алла Иштимирова-Посохо­ва ӆўвеӆа вохӑс еша путӑртты, хән па муй пӑта ӆўв киникайт хӑншты оӆӊитӑс. Юхӆы ӆўв щиты путрӑӆ оӆӊитсӑӆэ:

Ӆўӊ пура оӆӑӊмит хӑтӆӑн Югра мўвевн вәӆты шуши ёх Вўрщӑк мӑӊхӑтӆ постӑӆӑт, щит тови, ӆўӊ па мєлӑк тәты хӑтӆ. Щи хӑтӆӑн кашӑӊ оӆ «Торум Маа» тӑхийн вошӑӊ мир па няврємӑт ӑкӑтӆыйт.

Тӑм пўш мӑӊхӑтӆ вўр­щӑк оӆӑӊӑн ущхуӆь етн­хот эвӑӆт оӆӊитсы. Щит «Хӑтӆ» нємпи Ас-угорской театр ёх ванӆтӑсӑт. 

Ёмвошн Мўв-авӑт па Хӑннєхә музей ху­ща Ас нопӑтты ты­ӆӑщн 6-мит хӑтӆӑн «Увӑс мирев сӑкӑӊ пурмӑсӑт» ванӆтуп­сы пўншса. 

Щи вєр вєрты нумӑс пунӑс па щи нум­сӑӆ щира ванӆтупсы На­талья Тучкова ӆэщӑтӑс, ӆўв музейн история па эт­нография отделн рәпитӆ, щит исторической наукайт доктор, этнограф, хӑнтэт, вухаӆь ёх па самодийской мир вәӆупсы наука щира тәӆӆэ. 

Щит Алла Иштимирова-Посохова хӑншӑс. Щи оӆӑӊӑн «Югорика» нємпи киникайт яӊмит ванӆтупсы сухнум пурайн уша йис. Щит Ёмвошн Ас нопӑтты тыӆӑщ 17-18-мит хӑтӆӊӑнӑн вәс. Тӑм ванӆтупсы пурайн «Югорская книга – 2022» нємпи кӑсупсы ӆэщӑтсы.

Мосӆ лупты, тӑм оӆн щи вән ванӆтуп­сыйн киникайт єсӑӆты 43 тӑхи ёх па 18 ӑӆ хуятӑт ӆыв хӑншум нєпекӆаӆ аӆьсӑт. Иха ӆўӊӑтты ки – 174 киника вәс. Мєт ар киника ЮГУ па Ас-угорской науч­ной институт ёх хӑншсӑт. 

Увӑс мирӑт хўв йис вўш эвӑӆт ӆәмӑтсухӆаӆ па кўра ӆәмӑтты утӆаӆ вой па хўӆ сухӑт эвӑӆт ёнтсӑт па ӛхӑт әмӑщ пӑта ёнтум утӆаӆ хурамтты питсӑӆаӆ. Кўш сӑхӆаӆ, кўш вейӆаӆ, кўш нюки вейӆаӆ, посӆаӆ, рнасӆаӆ иса хурамӑӊ хӑншийн вєрман вәсӑт. Кашӑӊ хӑнши ӆўв кан щир тӑйӆ, итәх хӑншет ӆавӑӆты щирӑт тәсӑт. 

Ищки тӑӆ пурайн и вєра мосты ӆәмӑтсух – щит ёнтум посӑт. Кашӑӊ ёнтӑсты нє ӆўв щирӑӆн щит ёнтӑӆ па хурамтӑӆ. 

Тӑмхӑтӆ щикўш тови пура юхтӑс, тәп камн ищиты ищки вәӆӆяӆ. Щи пӑта хуӆна хошум ӆәмӑтсух ӆәмӑтты мосӆ. Тӑм оӆ арсыр посӑт ёнтӆыйт: ван па хўв пўнӑӊ сух эвӑӆт. Мєт әмӑщ па хурамӑӊ посӑт тывӆӑт хән арсыр сухӑт иха ӆыӆӑтӆыйт. Щи тумпи арсыр вой сух эвӑӆт сыр-сыр ӆәмӑтсух ёнтты рӑхӆ. 

Вән кєр тыӆӑщ 9-мит хӑтӆӑн Нефтеюганск вошн Вурӊа ими мӑӊхӑтӆ вәс. Щит арсыр мирӑт йис вәӆупсы еӆӆы тәты тӑхи па «Югра ӆыӆӊуптӑты» вошӑӊ оса тӑхи ёх ӆэщӑтсӑт.

Мєт сыры хурӑт хӑнш­ты хӑнты нє Ири­на Мазалова «Югра мўв моньщӑт» нємпи ванӆ­тупсы аӆяс. Тӑм ими, ван­тэ, моньщӑӊ ими Таисья Чучелина рәт эвӑӆт йиӆ, щирн айтєӆн моньщӑт хә­ӆӑнтӑс па хурӑт хӑншӑс. Ӆўв хурӆаӆ пєӆы шєӊк әмӑщ вантты.