Айкеԯӑт - Новости

Ай кєр тыӆӑщ 21-мит хӑтӆ – щит Мўвтєӆ мир ӆўӊтупсэт хӑншты ёх хӑтӆ, щирн Москва хон вошн Россия мўвев хӑншты ёх «Поэт года», «Писатель года» нємпи литератур­ной премияйӊӑн ёша хоӆумсӑт. 

Щив вет щурӑс муӆтас хӑншты ёх ӆыв стихӆаӆ, путӑрӆаӆ китсӑт. Щит эвӑӆт мєт м хӑншты 300 хуят пирисы. Щи ёх кўтн мўӊ хӑнты хәев Вячеслав Юрьевич Кондин, ӆўв «Поэт года» премия хоӆумтӑс. Ин ӆўв хәӆум «Бессмертный полк», «Любовь», «Рыбачка» стихӆаӆ «Поэт года» киникайн хӑншман вәӆӆӑт.

Ай кєр тыӆӑщ 30-31-мит хӑтӆӊӑнӑн Ямало-Ненецкой округ Пуӆӊавӑт вошн «Ялякоця» (хӑнты щирн «тӑр хӑтӆ») нємпи кимит няврємӑӊ вән мӑӊхӑтӆ-кӑсупсы вәс. 

Ай кєр тыӆӑщ оӆӊитумн Югорской го­сударственной университет хуща Все­российской научно-практической ӆўӊтупсы вєрӑнтсы. Тӑта ӑнтә тәп Югра па Россия мўвӊӑн эвӑӆт, па хон пєлӑк мўвӑт учёнойт онлайн щирн вәйтантупсы вантты, хәӆӑнтты па ясӑӊ лупты ищи вєритсӑт.

Югра хуща «Центр развития общественных инициатив партии «Единая Россия» нємуп тӑхи пўншса. Щи вєр вєрса сыры вәӆум тӑхи эвӑӆт, хута тӑм партия пиӆа вана вәӆты ёх ӑкумман вәсӑт. 

Ёмвошн ай кєр тыӆӑщн 16-21-мит хӑтӆӑтн кӑши-мәш тӑйты ёх кӑсупсы вәс. Тӑм кӑсты тӑхия 250 хӑннєхә Белоруссия, Армения, Казахстан, Таджикистан па Россия эвӑӆт юхтыйӆсӑт. Вет хӑтӆ мӑр мўӊ Ёмвошев ёхн па кӑсты вєрӑт пєӆа вантты ёхн вана тӑйса.

Тӑм паралимпийцӑт мир кӑсты пӑта хәт щир кӑсты тӑхи вәс. Щит ӆухӑӊ кӑсты тӑхи, ӆухӑӊ хәхӑӆты па пушкан эсӑӆты тӑхи, рєп эвӑӆт хӑтӑтьӆя­ты тӑхи, пара-сноуборд, следж-хоккей па әхӆӑӊ кёрлинг.

Тӑмхӑтӆ мўӊ хӑнты ясӑӊ газетаев 65 оӆ пос­тӑты вўраӊӑн вет­мит иньщӑсупсы хӑнш­ӆўв. Юхӆы ясӑӊ тыв китаты: khanty-yasang-65@mail.ru .

5. Мӑта оӆ вўш эвӑӆт газета хущи и пўш тыӆӑщ мӑр хӑнты ясӑӊ шурышкарской путрупсыйн айкеӆӑт хӑншты питсыйт?

Рәпата мӑты хӑннєхә! 2022-мит оӆ ай кєр тыӆӑщ оӆӑӊмит хӑтӆ вўш эвӑӆт 1991-мит оӆ вән кєр тыӆӑщ 19-мит хӑтӆ вўш эвӑӆт № 1032-1 «Россия мўв ӆуваттыйн рәпитты ёх» нємпи поступсы йиӆпатсы. Щиты ай кєр тыӆӑщ оӆӊитумн кӑши-мәш тӑйты хӑннєхә пӑта рәпата тӑхет па щирн мӑты питӆыйт, рўщ щирн «квота» аӆьӆы. Тӑм поступсы щирн мәщмӑӆтум хӑннєхә рәпатая вўюм пурайн мосты нєпекӑт мєт тәса па ма нух вантӆыйт, ӆәӆн тәп квота щирн щитӆаӆ ӆэщӑтман ат вәсӑт.

Тӑм пўш Югра мўвевн имухты 19-мит па 20-мит фестивальӊӑн мӑнсӑӊӑн. 19-мит кӑсупсы пӑта мєт вуӆаӊ мойӆупсы па 600 щурӑс шойт вух Индия мўвн єсӆум «Камешки» нємпи кина ӆэщӑтты ёх хоӆумсӑт. 20-мит кӑсупсыйн мєт вуӆаӊ мойӆупсыйн Роман Михайлов па Фёдор Лавров катӆуптӑсыйӊӑн, ӆын «Сказки для старых» нємпи кина ӆэщӑтсӑӊӑн.

Ай кєр тыӆӑщ 4-8-мит хӑтӆӑтн Ёмвошн вўӆєӊ ёх VII-мит мўвтєӆ мир вән Конгресс мирхот вәс. Тыв Россия мўвев 29 тӑхи эвӑӆт вўӆєӊ ёх юхтыйӆсӑт. 

Ин Россия мўвев Арк­тической Совет ху­ща кәщая вәӆ, щирн щи вән мирхот мўӊ хущева ӆэщӑтсы. 

Тӑмхӑтӆ мўӊ хӑнты ясӑӊ газетаев 65 оӆ постӑты вўраӊӑн нӆ­мит иньщӑсупсы хӑнш­ӆўв. Юхӆы ясӑӊ тыв китаты:  khanty-yasang-65@mail.ru.

4. Мӑта оӆн «Ленин пӑнт хўват» газета «Хӑнты ясӑӊ» нємн пунсы?