Айкеԯӑт - Новости

Тәнӆуп тыӆӑщ 21-мит хӑтӆ – щит мўвтєӆ мир рәт ясӊӑт хӑтӆ. Щи мӑӊхӑтӆ 1999-мит оӆ вўш эвӑӆт постӑӆы.

Округ кәща нє Наталья Комарова тәнӆуп тыӆӑщ 18-мит хӑтӆӑн карты щўнк мухты ёх пиӆа вәйтантӑс, щит Россия мўв ӆуват йис вәӆупсы така тӑйты оӆ пӑта. Ӆўв путӑртӑс, муй м вєр мўң вєрсўв тӑм йис вєрӆўв ма ӆэщӑтты пӑта па муйсӑр нумсӑт еӆӆы тӑйӆўв.

Ван хӑтӆуп тыӆӑщн 2021-мит оӆн Пуӆӊавӑт вошн Россия ӆуваттыйн  вәӆты увӑс мирӑт айӆат хӑннєхәйт ӆыв кўтэӆн VII-мит Всероссийской вәйтантупсы ӆэщӑтыйӆсӑт па арсыр вєрӑт оӆӑӊӑн путрємӑсӑт. Щимӑщ вуӆаӊ мирхота юхи хӑщум оӆ сухантты кємн араттєӆн сот муӆтаскєм  хӑннєхә юхтыйӆсӑт. Щи айӆат хәйт-нєӊӑт араттєӆн Россия хон пєлкев   20-кєм шушия вәӆты увӑс мирӑт эвӑӆт вәсӑт па тӑӆаӊтєӆн 28-мит тӑхи  эвӑӆт тӑм вуӆаӊ мирхота ӑктӑщийӆсӑт. 

Кашӑӊ оӆ вотас тыӆӑщ 8-мит хӑтӆӑн учёной мир Россия мўв наука мӑңхӑтӆ постӑӆӑт. Тӑм мӑӊхӑтӆ Россия мув президент ики ӆэщӑтум поступсы щирн 1999-мит оӆ вўш эвӑӆт постӑты питсы. Югра мўвн ищиты м арат учёной ёх вәӆ па рәпитӆ. Ӆыв пӑтэӆа 30 оӆ юхӆы Ёмвошн Ас-угорской институт пўншсы.

Тӑм тӑхи 1991-мит оӆ Ас потты тыӆӑщ 28-мит хӑтӑӆн округев кә­щайтн нємасыя пўншсы, ӆәӆн наука щирн шуши мирӑт ясӊӑт, путрӑт, моньщӑт ма вәнӆтӑты, нух хӑншты па еӆӆы ищиты ӆавӑӆман тӑйты.

Ай павӑтты «Югра» нємуп хотн тәнӆуп тыӆӑщ хәӆмит хӑтӆӑн айкеӆ тӑйты ёх ӑктӑщсӑт па путӑртсӑт Россия ӆуваттыйн тӑм атум мәш пурайн кўтӆўвн нётӑсты вєрӑт оӆӑӊӑн, щит «Мўӊ ха» нємн пунум тӑхи. 

Тӑта «Гуманитарный Добровольческий корпус» тӑхия кәщая вәӆты нє С. Басова, «Центр гражданских и социальных инициатив Югры» тӑхи кәща хә Я. Са­мохвалов па мўӊ мўвевн вәӆты ВОД «Нётӑсты ёх – тохтўрӑт» Е. Черенкова вәсӑт па путӑртсӑт.

Тәнӆуп тыӆӑщ 6-мит хӑтӆ вўш эвӑӆт Югра хущи коронавирус мәшн юхтум хӑннєхәйт йиӆуп щирн лекщитты питсыйт. Щи оӆӑӊӑн мир тӑӆаӊа вәӆты вєрӑт тәты департамент кәща хә Алексей Добровольский Инстаграм хущи хӑншӑс.

Щи оӆӑӊӑн мирхот округ кәща нє Наталья Комарова тәс. Ищиты мирхотн фестиваль вице-президент ими Мария Зверева, няврємӑт пӑта ӆэщӑтты «Твоё кино» нємпи вєр тӑхи кәща нє Екатерина Бордачева вәсӑт. 

Сәрханӆ вош ӑӊкет, няврємӑт па ай тёпиет ӆавӑӆман па мӑӆтман тӑйты пәӆьницайн йиӆуп щирн ӆэщӑтум арсыр тынӑӊ па мосты щўӊкӑт вәӆӆӑт, щит компьютерной томограф, ультразвуковой сканер па па тӑм йис утӑт.

Щи пӑта мєт ай пуш­хие хән сырыя сєма питӆ, няврєм тохтурӑт ӑн пакӑнӆӑт, имухты йиӆуп щўӊкӑт ӆэщӑтӆӑт, ӆәӆн тёпие сорашак ма ат йис. Мєт м, хуты ин йиӆуп, тӑм йис щўӊкӑт унтасн веӆщи сєма питум няврємӑт сӑм мәшӆаӆ па па кӑшиӆаӆ оӆӑӊӑн уша павӑтты рӑхӆ.

Ас хӑӆты тыӆӑщн оӆӑӊ хӑтӆ вўш эвӑӆт мәшитум нєпек муй вўрн хӑншӆа па ёша мӑӆы, щи вєр па щира вєрты питӆа. Мәшитум нєпек нєпек хурасӑӆ щира ӆэщӑтӆа. Тәп итәх хӑннєхәйта ёша мӑты рӑхты питӆ. И пєлӑк, щит щи хӑннєхәйт, мӑта ёх закон щира кан вәӆупсэӆ хӑния тӑйты мосӆ, кимат ёх – щит хӑннєхәйт, мӑта утӑт госзащита хуща хӑншман тӑйӆайт.

Ёх мӑӆтӑты тӑхет тӑм хӑтӆ 100 % пӑкӆӑт карты щўӊкӑт мухты рәпитты па щи мухты мәшитум нє­пекӑт социальной стра­хования Фонд (ФСС) тӑ­хия китты. 

Фонд развития Югры нємуп тӑхийн тәнӆуп тыӆӑщ ветмит хӑтӆ вўш эвӑӆт тынӆы-пєӆӆы онлайн-программа щирн «Ма – Югра увӑс мўвев фермер» хот йит ӆэщӑтӆа. Щи йиӆпа пўншты тӑхийн округев хуятӑт, мӑта утӑт каш тӑйӆӑт, арсыр хотӑӊ войт єнмӑӆты щирӑта вәнӆтӑӆыйт.