Щи оӆӑӊӑн вәй­тантупсыйн, мӑта ут Ас хӑӆты тыӆӑщ 17-мит хӑтӆӑн вәс, ар оӆ «Хӑнты ясӑӊ» па «Луима сэрипос» газетайӊӑӆўвн рә­питум ёх путӑртсӑт.

Мєт сыры мўӊ ре­дак­цияев йиӆуп кәща нєӊев Надежда Алексеева мойӊ ёха ар хошум ясӑӊ па вән пәмащипа лупӑс. Вантэ, ӆыв иса муй вєрсӑт, ӆәӆн Ёмвош округевн хӑнты па вухаӆь мирӊӑӆўв пӑта газетайӊӑн ат тывсӑӊӑн. Щӑӆта кашӑӊ хуята ишӑкты нєпек па «Хӑнты моньщӑт» нємпи киника мой­ӆӑсы. Моньщӑӊ нєпек айкеӆӑт ӑкӑтты хӑнты ёх «Хӑнты ясӑӊ» газетаев 65 оӆа вум пурайн єсӑӆсӑт. Тӑм нєпекн арсыр оӆӑтн «Ленин пӑнт хўват»-«Хӑн­ты ясӑӊ» газетаевн хӑн­шум моньщӑт вәӆӆӑт.
Шай яньщман мойӊ ёх путӑртсӑт, муй щирн ӆыв ар оӆ редакцияевн рәпитсӑт. Мария Вол­дина 30 муӆтас оӆ рәпитӑс, сыры «Ленин пӑнт хўват»-«Хӑнты ясӑӊ» газетаев кәща нєӊа, щӑӆта 1989-мит оӆ вўш эвӑӆт «Хӑнты ясӑӊ» па «Луима сэрипос» газетайӊӑӆўв ре­дакцияев кәщая вәс. Ӆўв путӑртӑс: 

- Ма тәп и оӆ хӑнты га­зетаев вєрум хә, оӆӑӊ хӑнты пи­сателев, Вуӆаӊ ӆаӆьн ӆа­ӆясум хӑннєхә Григорий Лазарев пиӆа рәпитсум. Ӆўв шєӊк ма кўтуп Ас хӑнтэт ясӑӊӑн (нӆум шәпн) путӑртӑс. Ӆўв ипўӆяӊ ром па тарум икия вәс. Хӑнты мирев газета тывты пӑта ар ӛр пунӑс. Хӑнтэтн веккеши ӆўв нәм­ман тӑйӆы па вән пә­мащипа ясӑӊ ӆўвеӆа лупӆӑт.

Ищимӑщ хӑннєхәя вухаӆь мир писатель хә Юван Шес­талов вәс. Мин ӆўв пи­ӆэӆа па нєпекӑӊ мир пиӆа иса муй вєрсўв, ӆәӆн вухаӆь мир рәт ясӑӊӑн газета ат ӆўӊӑтсӑт. Мосӆ лупты, «Ленин пӑнт хўват»-«Хӑнты ясӑӊ» газетаевн вухаӆь щирн айкеӆӑт, путрӑт хӑншсўв. Ипўш ма щиты вєрсум – «Хӑнты ясӑӊ» газетаев иса вухаӆь щирн ӆэщӑтсєм. Щи пийн, а-на-нам, итәх хуятӑт уша вєрты ӑн вєритсӑт, а муй пӑта хӑн­ты газетайн вухаӆь пут­рӑт хӑншман вәӆӆӑт. Щи пурайн кәщайт нємасыя поступсыйн ёш пос пунсӑт па вухаӆь мир «Луима сэрипос» (хӑнты щирн «Увӑс хәньӆ») газета тывӑс. Щит 1989-мит оӆ вәс.

Раиса Ре­шетникова 2002-2018-мит оӆӑтн ре­дакцияев кәща нє­ӊа вәс. Щи оӆӑт мӑр редакцияев йи­ӆуп щирн вәӆты питӑс – финно-угорской айкеӆӑт ӑкӑт­ты ёх пиӆа и ёшн, и ну­мӑсн рәпитты питсўв, кӑт газетайӊӑӆўв сєма питум оӆӑтн научной мирхотӑт ӆэщӑтты оӆ­ӊитсўв, киникайт єсӑӆты, газетайӊӑӆўв ӆўӊӑтты ёх пӑта кӑсупсэт, «Айкеӆ ӑкӑтты няврєм» вєр па па вєрӑт ӆэщӑтты оӆӊитсўв. 

Ар оӆ «Хӑнты ясӑӊ» га­зетаевн рәпитум нє Рео­нальда Ользина ӑнтә тәп хӑнты щирн айкеӆӑт па путрӑт хӑншӑс. Щи тумпи рўщ газетайт па журналӑт пӑта хӑнты вәӆупсэв, нў­шайӆўв па па вєрӑт оӆӑ­ӊӑн хӑншиӆӑс. 

- Интӑм мўӊ газетайӊӑ­ӆўвн ма па тәса хӑншты ёх рәпитӆӑт, щирн мўӊ м нумӑсн рўтьщӑӆўв, – юхи хӑщум артӑн Р.С. Ользина лупӑс.

Людмила Зубакина ищи ар оӆ хӑнты газетайн айкеӆӑт, хӑннєхәйт оӆӑ­ӊӑн путрӑт хӑншиӆӑс. Юхи хӑщум оӆӑтн мўӊ газетайӊӑӆўва мир хӑн­шаньщиӆӑс, щирн рӑхӆ лупты, ӆўв округ мирев ма вәӆӆэ. 

Ӆўв хӑнты ясӑӊ, йис вәӆупсэв ма вәӆӆэ, тәса ёнтӑсӆ, щирн итәх пурайн ӆўв эвӑӆтэӆа муӆты мосты вєрӑт оӆӑӊӑн иньщӑсӆўв.
Светлана Динисламова юхи хӑщум кӑт оӆ мўӊ редакцияев кәщая вәс, тәп 1989-мит оӆ вўш эвӑӆт «Луима сэрипос» газетая путрӑт хӑншты питӑс. Ӆўв – вухаӆь мир ӆўӊтарӑт хӑншты нє иты лупӑс, хӑнты па вухаӆь мирӊӑӆўв оӆӑӊмит писателят, поэ­тӑт путӑрӆаӆ, ӆўӊтарӆаӆ тыв китсӑт, щирн ин ищи щимӑщ айӆат ёха нётты мосӆ.

Тӑмхӑтӆ мўӊ ищиты вухаӆь мир айкеӆӑт ӑкӑт­ты нє Валентина Узель пӑта ам­тӑть­ӆясўв. Ӆўв «Журна­лист года – 2024» кӑсупсыйн «Рәт ясӑӊ» номинацияйн нух питӑс. Кӑсупсыя ӆўв Касум вўӆєӊ тӑхи нўшайт оӆӑӊӑн путрӑӆ китыйӆсӑӆэ.

Вәйтантупсэв тәса мӑ­нӑс. Вәна пєлка вум ай­кеӆӑт ӑкӑтты ёхӆўва па мўӊева щит шєӊк мәстӑс,  – ин мўӊ м нумӑсн еӆӆы ищиты щи тәса рәпитты, мўӊ хӑнты па вухаӆь мирӊӑӆўв пӑта м айкеӆӑт па путрӑт хӑншты питӆўв.

Путӑр хӑншӑс: 
Людмила Гурьева