Тәняӆ сўсн Югра мўвевн вәӆты вошӑт ӆуватн Россия хон пєлӑк финно-угорской мўвтєӆ мир писателят мирхот мӑнӑс. 

Ай тӑхет потты тыӆӑщ 30-мит хӑтӑӆн Ём­вошн «Юг­ра-Классик» нємуп якты-ариты хотн иха ӑктӑщум финно-угорской мир пи­сателят кәща ёх мирхот вєрсӑт, хута литература вєрӑт оӆӑӊӑн айкеӆ тәсӑт па лупсӑт, муй пӑта тӑм юхи хӑщум оӆӑтн арсыр киникайт хӑншты мосӆ па муйсӑр унтас ӆыв финно-угорской мирӑтн вәӆты ӑӆ хӑннєхуятӑта еӆӆы тәты па вєритӆӑт.
Тӑм мирхот кәща хәя нємасыя ӆўӊтарӑт хӑншты хә Андрей Попов павӑт­сы, вантэ, ӆўв Коми мўвӑӊ Союз писателей тӑхи кә­щая тӑмхӑтӆ вәӆ.
Шєӊк тәса па әмща ӆўв иха ӑктӑщум хӑннєхуятӑт еӆпийн арсыр айкеӆӑт тәс.
Ӛхӑт мирхот пийн ма нємасыя ӆўв пиӆэӆа вәй­тантыйӆсум па путрємӑсум.

- Андрей Гельевич, нӑӊ оӆӊенӑн мўӊева мӑтты айкеӆ тӑмхӑтӆ еша тўва?

- Ма арсыр ӆўӊтарӑт иса рўщ ясӑӊӑн хӑншӆум. Ащєм, вантэ, щикўш сӑран ики па ӑӊкєм рўщ ими вәсӊӑн. Рәт мирєм ясӑӊӑн иса ӑн па хошӆум. Щимӑщ вєр пӑта сӑран мўвємн вәӆты поэтӑт ма нємасыя иса кашӑӊ пўш рўщ ясӑӊа шєӊк ма па тўӊщирӑӊа тулмащтӑӆум. Щи поэт нє-ӊӑт кўтн тӑмхӑтӆ вәӆӆӑт: Елена Афанасьева, Алёна Шомысова, Любовь Ануф­риева, Алёна Ельцова па Нина Обрезкова. Щи хуятӑт тумпи па хәйт-нєӊӑт ищиты тӑмхӑтӆ вәӆӆӑт.

- Андрей Гельевич, мӑта тӑхийн нӑӊ сєма пит­сӑн, єнумсӑн, муйсӑр вошн еӆӆы вәнӆтыйӆсӑн?

- Ма Воркута вошн сєма питсум, айтєӆн щӑта єнумсум па ӑшколая ӊхсум.
Щи киньща кўтуп ӑш­колам пийн еӆӆы Сык­тывкар вош государст­венной университетн няврємӑт рўщ ясӑӊа па литературая вәнӆтӑты хә щирн еӆӆы вәнӆтыйӆсум па 1982-мит оӆн щи тӑхи мсыева етшуптӑсум. Щӑӆта па юхи Воркута вошєма юхӑтсум. Сыры вошӑӊ 31-мит проф­тех­училища тӑхи хуща ма айӆат ёх рўщ ясӑӊа па литературая вәнӆ­тӑ­тыя питсум. Щи учи­ли­щамн па, вантэ, га­зоэлектросварщика па штукатур-маляр щирӑта пухӑт муй эвет иса вәнӆтуман тӑйсыйт. Шєӊк хўв щи тӑхийн ӑн па рә­питсум. Еша вәс па па рә­пата мӑнєма мущатсум. Щи киньща Воркута вошӑӊ «Дворец пионеров» хуща ӑшколайн вәнӆтыйӆты пухӑт па эвет пиӆа еӆӆы рәпитты питсум. Ӛхӑт 2000-мит оӆӑта юхтум пураитн ма иса Воркутинской филиал университетн Рос­сийской академия об­разованияйн рәпитты питсум. Вәнӆтыйӆты пу­хӑта па эвета арсыр ху­рамӑӊ лекцияйт иса ӆў­ӊӑтсум па кәща ӆӑӊкӑр хәя вәсум. 

- Хән па нӑӊ ӆўӊтарӑт хӑншты вўянтсӑн па сыр-сыр әмӑщ киникайт хӑн­нєхуятӑт ӆўӊӑтты пӑта єсӑӆты пит­сӑн?

- Ӆўӊтарӑт ма хуӆна кў­туп ӑшколайн вәнӆтыйӆты оӆӑтн хӑншсум. Тәп щи пу­ра оӆӑтн нємуӆты тӑхийн киникайт ӆэщӑтты иса ӑн па нәмӑссум. Еша ӛхӑт­шӑк, хән университетн вәнӆтыйӆсум, веӆщи ушӑӊа йисум па нумӑсн юхӑтсыюм, хуты киникайт мӑнєма еӆӆы ӆўӊтарӆам пӑта хӑнштыя рӑхӆ. Щи пурайн ма мєт оӆӑӊ стихӆам «Молодёжь Се­вера» журнала вўсыйт па нух хӑншсыйт. Ма нәмӑстємн, шєӊк ма па тўӊщирӑӊа хӑншум ӆўӊ­тарӆам ищипа ӛхӑтшӑк «Север» нємуп журнал хуща Петрозаводск вошн Карелия мўвн 1993-мит оӆн єсӑӆсыйт. 

- Муйсӑр вєрӑт оӆӑӊӑн нӑӊ ӆўӊ­тарӆӑн хуща вәӆты-хоӆ­ты хўваттыйн хӑншӆӑн?

- Ма щирємн, ма стих­ӆам хуща иса мўӊ вәӆупсы вєрӆўв оӆӑӊӑн ар щирӑтн хурамӑӊа па тәса хӑншӆум. Муй пӑта тӑм нуви тәрум иӆпийн вәӆӆўв па муй кашӑӊ йиӆпа юхӑтты хӑтӆӑн вєрӆўв, ӆәӆн мў­ӊева па хуятӑта кєншӑк ат вәс.
Щи пӑта ма тӑта нӑӊена «Уступай дорогу дуракам» нємуп путрєм ӆўӊӑтӆєм: 
Не смотри на встречных свысока.
Никого не задевай. Не трогай.
Уступай дорогу дуракам,
Пусть они идут своей дорогой.
Пусть шагают до любой звезды. 
Хоть куда. 
Окажется в итоге,
Как и прежде, только две беды – 
Это дураки и их дороги.

- Муй арат хӑннєхә Коми мўв эвӑӆт Финно-угорской мир писателят вәйтантупсыя тӑм пўш юхтӑс па муйсӑр унтас нынана тӑмӑщ вән мирхотӑт тәӆӑт, мосӆӑт ӆыв киникайт хӑншты ёхӆўва муй ӑнтә?

- Ма тӑмхӑтӆ ар пўш щи вєр оӆӑӊӑн иньщӑссыюм. Ма щирємн, тӑмӑщ вән Финно-угорской мир писателят вәйтантупсы шєӊк мосӆ. Вантэ, тӑта мўӊ арсыр ушӑӊ-сащӑӊ нєпекӑт хӑншты хәйт-нєӊӑт пиӆа вәйтантӆўв, сыр-сыр нумсӑт иха вєрӆўв. Щи пӑта еӆӆы мўӊева киникайт хӑншты кєншӑка йиӆ!

Путӑр хӑншӑс: 
Владимир Енов