Мӑнум оӆ ван хӑтӆуп тыӆӑщн Ёмвошн «Югра» нємуп тӑхийн айкеӆӑт ӑкӑтты хӑннєхуятӑт округев «Мўвев ӆавӑӆты ёх» тӑхи кәща хә Игорь Илык пиӆа вәйтантыйӆсӑт.

Игорь Илык лупӑс, муй щирн 2024-мит па юхи хӑщум 2023-мит оӆӑтн Югра мўвев ӆуваттыйн хӑннєхуятӑт вәсӑт, хуты «Мўвев ӆавӑӆты ёх» тӑхи арсыр рәпатайт ӆэщӑтӑс. Щиты ӆыв сыр-сыр вєрӑт вєрсӑт, ӆәӆн ӆаӆь хӑрӑтн вәӆум хә ёхӆўва мӑӆ­тыйӆты па рўтьщӑты щирӆаӆ тўӊматты. Щи тумпийн, вантэ, ӆаӆясум хӑннєхуятӑта тӑм нуви тәрум иӆпийн еӆӆы муӆты щирн ищи вәӆты мосӆ. Щимӑщ вєр пӑта ӆывеӆа ар нётупсы вєр «Мўвев ӆа­вӑӆты ёх» тӑхийн вєрӆы. И. Илык ясӊӑт щирн, тӑм оӆ 48-кєм щу­рӑс нєпек щи хӑннєхуятӑт па ӆыв хот­тєӆ ёхӆаӆ китсӑт. Ӆыв Юг­ра мўв па мўӊ Россия хон пєлкев эвӑӆт ӆаӆьн вәӆум пӑта ин вухӑт вохӆӑт. Щӑӆта ӆӑӊ­хаӆӑт, ӆәӆн ӆывеӆа рўтьщӑты щирӑт тәса ат вєрсыйт. Ӆа­ӆясум хӑннєхәйт хоттєӆ ёха ищиты законӑт щирн ӆэщӑтум нётупсэт мосӆӑт. Кашӑӊ хә па нє ӆӑӊхаӆ, ӆәӆн мәшӑӊ вєрӆаӆ лекщитты па мсыева рўтьщӑты щирн морты мўвӑта ӊх­ты щирӑтн ат мӑсыйт.
Няв­рємӆаӆа па ӆўӊ пурайн мӑтты тӑхийн рўтьщӑтыя мосӆ. 

Арсыр щимӑщ нётуп­сэт ӆаӆь хӑрн вәӆум хӑн­нєхәйт пӑта тӑм йисн «Мў­вев ӆавӑӆты ёх» тӑхи хуща рәпитты хӑннє­хуятӑт вєрӆӑт. Щи кинь­ща округевн вәӆты де­партаментӑт кәщайт и ясӑ­ӊа па и нумса юхӑтӆӑт, ӆәӆн СВО тӑхийн ӊхум ай­ӆат хӑннєхуятӑта па ӆыв хоттєӆ ёхӆаӆа ар щирн мсыева нёттыя. 

И. Илык ясӑӊ щирн, ӑнтә тәп Ёмвошн атэӆт щирн ӆаӆясум ёх нё­тупсыйн мӑӆыйт. Щи­мӑщ социальной вєрӑт ӆэщӑт­ты па тўӊматты хӑн­нєхуятӑт арсыр кәртӑтн па вән вошӑтн округев мўв ӆуваттыйн вәӆӆӑт па ищиты СВО эвӑӆт юхтум хә ёхӆўва сыр-сыр мосты вєрн Россия хон пєлӑк закон щирн нётӆӑт.
Кашӑӊ щимӑщ хӑннєхәя сырыя мәшмӑӆтум тӑхиӆаӆ мӑӆтыйӆты, рәпатайт муй йиӆпа вәнӆтыйӆты щирӑт ӆывеӆа арсыр тӑхетн кӑншӆӑт. Мўӊ округев  «Мў­вев ӆавӑӆты ёх» тӑхи хуятӑт вещката па шєӊк тәса вєрӑт вєрӆӑт.
Тӑта мосванӑн «Ярмар­ка вакансий» тӑхи нємасыя Югра мўв ӆуватн ӆэщӑтсӑт, ӆәӆн СВО эвӑӆт юхтум хә ёхӆўв рәпата мущатты ат вєритсӑт. Щи­мӑщ вуӆаӊ вєр тӑм юхи хӑщум 2024-мит оӆн араттєӆн иса хәӆум пўш ӆэщӑтыйӆса. Округев кәща хә Р. Кухарук щи пӑта шєӊк амтӑс  па ищиты ар щирн нётты питӑс. Щи киньща па ӆыв Югра ӆуватн тўӊщирӑӊа уша вєрсыйт па кашӑӊ тӑхийн ин тӑмхӑтӆ вән­ты ишӑкӆыйт. Ин мосӆ лупты, щимӑщ «Ярмарка вакансий» вәйтантупсэт тӑм оӆн кӑт пўш Ёмвошн па и пўш Сәрханӆ вош хуща па вәс. Щи пурайн ӆаӆь хӑр эвӑӆт юхи юхтум хәйт сырыя арсыр рәпата вєрӑт артаӆӑсӑт па ӛхӑт ищи кўрумн щив мӑнтыя каш вєрсӑт па мосты нєпекӑтн ёш пос пунсӑт. Кимит вєр – щит па, вантэ, мўв иӆпи тащ кӑншты хӑннєхәйт ар пєлӑк эвӑӆт нємасыя юхтыйӆсӑт, ӆәӆн ӆыв хущеӆа аршӑк айӆат па тумтак хуят рәпатая вўты. Хәӆмит вєр – щит, хән СВО хуща вәӆум ёх ӆӑӊхаӆӑт м тыӆӑщ вух вәӆты-хоӆты щиреӆн хоӆумты. м тыӆӑщ вухӑт, вантэ, ар пєлӑк тӑм йисн ищипа тәп нефть па газ пиӆа рәпитты хӑннєхуятӑт вўтыя вєритӆӑт. Щӑӆта И. Илык па путӑртӑс, мўв иӆпи тащ кӑншты тӑхетн рәпатайт мущатум айӆат хә ёхӆўв еӆӆы ар­сыр университетӑта па институтӑта вәнӆтыйӆтыя нумсӑт вєрӆӑт. Щит, ӆўв щирӑӆн, ищи шєӊк м па мосты вєр. Щи щирӑтн «Мўвев ӆавӑӆты ёх» тӑхи хуятӑт еӆӆы ищиты СВО эвӑӆт юхтум хуятӑта Югорской, Сәрханӆ, Нижневартовск университетӑта питты ар­сыр унтас ӆэщӑтӆӑт. Мєт оӆӑӊӑн щимӑщ хӑн­нє­хуятӑт нємасыя подго­то­вительной курсӑта ӊх­ӆӑт, хута тўӊщирӑӊа вәнӆ­тӑӆыйт, ӛхӑт веӆщи эк­заменӑт мӑтыя щи тӑ­хета еӆӆы китӆыйт.

Мєт юхи хӑщум путрӑӆн И. Илык айкеӆ тәс, муй щирн тӑмхӑтӆ округевн ӆаӆь хӑра мӑнум ёх рәт­ӆаӆ эвӑӆт ДНК вўты питӆы. Вантэ, СВО тӑхи хуща вәӆты арсыр хӑннєхәйт пу­ра-пурайн хуӆт пєӆы вәт­шӑӆыйт па ищи кў­румн кәщайт уша павӑт­ты ӑн вєритӆӑт, мӑта тӑхи хуща па хән хӑннєхә вәтшӑсы. Щи пӑта ӑнтәма вум хә ёх кўтн ДНК щирн мсыева артаӆӑты па вантты питӆӑт, мӑта хӑннєхә щит вәӆ. Хән па аршӑк щимӑщ ут экспертиза щирӑтн иха ӑкӑтӆы, щит ар ДНК 525-мит тӑхия Ростов вош пәӆьница хота тәӆыйт. Щи тӑхи хуща военно-следственной вєр щирн ӆаӆь хӑрн хуӆт пєӆы вәт­шум хуятӑт артаӆӑты еӆӆы питӆыйт. Щӑӆта тӑм кўтн 48-кєм щурӑс айкеӆӑӊ нєпек, мӑта утӑт СВО тӑхия ӊхум хуятӑт хӑншсӑт, округ «Мўвев ӆавӑӆты ёх» тӑхи хуща 90% арат мсыева нух вантсыйт па тўӊщирӑӊа ӆэщӑтсыйт. Кашӑӊ ай-вән нўша вєр иса тўӊщирӑӊа еӆӆы пєӆы вєрсы.

Путӑр хӑншӑс: 
Владимир Енов