Ас хӑӆты тыӆӑщн 7-мит хӑтӆӑн Касум вошн «Нумсӑӊ ёх» нємпи Ресурсной центр тӑхийн «Пространство перемен» нємпи хот пўншсы. Мосӆ лупты, «Нумсӑӊ ёх» тӑхи хуятӑт щит пўншты пӑта хўвн рәпитты оӆӊитсӑт, тәп тӑм ванӑн хот ӆэщӑтсӑт. Сырыя тӑм хотн катра ӑшкола ӆєтут хот вәс, щи катра хот нух вєрсӑт, интӑм хўрамӑӊ па ӆӑщкам йиӆуп хота тывӑс, хот ӆыпийн арсыр хӑрӑт рәпитты питӆӑт. 

Щи хот ӆэщӑтты «Пўпи» тӑхи кәща нє Марина Кабакова, «Нумсӑӊ ёх» нємпи тӑхи кәща нэ Елена Федотова па «Люкан» тӑхи кәща нє Татьяна Любавина нумса вєрсӑт. Елена Терентьевна путӑртӑс:

- Щимӑщ хот мосӆ, щит иха ӑктӑщийӆтты хӑр. Щит общинаит ёх, некоммерческой тӑхи хуща вәӆты ёх, шуши мирӑт па иса хуятӑт и тӑхийн иха ӑктӑщийӆты питӆӑт. Ӆыв шуши мирӑт вәӆупсы, культура вєрӑт нух тўӊматты питӆӑт, щӑта рәт ясӑӊ вәнӆтӑты рӑхӆ. Муй мирхот, муй ӊта пӑ­сана муй мӑӊхӑтӆа тӑта ӑктӑщийӆты питӆўв. Кашӑӊ оӆ мўӊ Россия мўвев, округ мўвев хўваттыйн вухӑӊ нётупсы вўты щира арсыр кӑсупсэт вәӆӆӑт. Шуши мира нётты мосӆ, муй вўрн ӆыв м нумӑсӆаӆ нємасыя нєпека хӑншты, муйсӑр нєпекӑт ӑкӑтты па муй вўрн щи кӑсупсэт хуща нух питты. Мўӊ тӑта пищ тӑйӆўв иха вәйтантты, ӆәӆн шуши мирӑт па кашӑӊ хӑннєхуята проект нєпека хӑншты вәнӆтӑты па нётты. Щи пӑта мўӊ семинарӑт, онлайн вәнӆтӑты вєрӑт, вәнӆтӑты хӑрӑт тӑм центр хуща ӆэщӑтты питӆўв. Проект нєпек ки тывӑӆ, нётупсы вух ёша павӑтты пӑкӆӑт, ӆәӆн шуши мира, вўӆы тӑйты ёха, вой-хўӆ веӆпӑсӆӑты ёха вәӆупсэӆ ма вєрты.  

Тӑм хот ӆыпийн м па хурамӑӊ ӆєтут хӑр вєрса, йиӆуп нуви хӑрєп пӑсанӑт, омӑсты пӑсанӑт омсӑӆсыйт.  

Марина Викторовна Кабакова «Шайная лавка» нємпи проектӑӆ олӑӊӑн ясӑӊ тәс:

- 2024-мит оӆн «Шайная лавка» нємпи вєр «Грант губернатора» кӑсупсы хуща нух питӑс. Тӑта вошӑӊ па мойӊ ёх ӑктӑщийӆты питӆӑт, ӆәӆн хӑнты ясӑӊ вәнӆтӑты, єпӆӑӊ хӑнты нянь пиӆа шай яньщты. Вантэ, мўӊ хӑнты мирев иса щиты вәӆ, мойӊ ёха ки юхӑтӆ, шай яньщты пийн тәп путӑр оӆӊитты мосӆ. Ар м вєр тӑта вєрты питӆӑт: хӑнты якӑт якты, ӑрӑт ариты муй ӑӆ путӑртты. Хӑнты ясӑӊ ӑн вәты хӑннєхуята нємасыя щимӑщ ай путӑртты ки­ника ӆэщӑтӆа, ӆәӆн ӆўв хӑнты ясӑӊ ат вәнӆтӑс. Щи­мӑщ м вәнӆтӑты хӑр тӑта питӆ.
Тӑм етн центр хуща няврємӑт па юхтум мира арсыр юнтупсэт па әмӑщ ванӆтупсэт ӆэщӑтсыйт. Ӆыв хӑнты па юрн юн­тутӑтн юнтсӑт. Елена Куз­нецова юхтум мир кўтн кӑсупсы ӆэщӑтӑс, щит «Тепко» нємпи юрн юн­тут. Мария Михайловна Канева сырыя питӑс, щит ӆув сохӆӑӆ ит картӆўӊк хӑщӑс.  
Па исхур (теневой) театр ёхн вєрум «Ими хилы», «Ӆон вєрты ими» хӑнты моньщӑт вантсўв. «Нумсӑӊ ёх» няврємӑт рўтьщӑты тӑхи хӑр тӑта рәпитты питӆ, ӆәӆн айӆат ёх хӑнты мир вәӆупсэв оӆӑӊӑн уша ат вєрсӑт.   
Кашӑӊ хӑннєхә әмӑщ муӆты вєр вєрты тыв юхтыйӆты питӆӑт. 

Елена Терентьевна «Казым за наших» нємпи проектӑӆ оӆӑӊӑн ясӑӊ тәс:

- 2023-мит оӆн мўӊ вєрев округ кәща грант кӑсупсы хуща нух питӑс. Щи проект ӆаӆя мӑнум ёха нётӑсты пӑта. Щи еӆ­пийн мўӊ иха ӑктӑщсўв па путӑртсўв, муй вєрты питӆўв щимӑщ ӆавӑрт пурайн, мўӊ ӆаӆясты хуятӆўва нётты мосӆ. Сух эвӑтты щўӊк вєрсўв, карты панка эвӑӆт окопӑт тӑйты ӑсвеча, «Сухой душ» нємпи ут, щит сора ӆюхӑтыйӆты утӑт.  
Касум вошн вәӆты мир – щит сӑмӑң мир, иса ӆаӆя мӑнум ёха нётӑсӆӑт.  Вәна пєлка вум имет иса ма нётӆӑт, хошум носкэт тыйӆӑт, мосты ӆәмӑтсухӑт, милӑт па арсыр сухӑт ёнтӆӑт. Кашӑӊ мӑӊхӑтӆӑн тынєсты хӑрӑт ӆэщӑтман вәӆӆӑт, щӑта арсыр ӆєтут муй ёнтум пурмӑсӑт, ӆә­мӑтсухӑт па арсыр су­венирӑт тыныӆӑт, щӑӆта щи ӑктум вухӑт ӆаӆясты хәята нётты щира мӑӆыйт. Тӑм центр тӑхийн вошӑӊ мир, няврємӑт солдатӑт пӑта хоӆпӑт тыйты питӆӑт.  

Хуйтат ӆӑӊхаӆӑт муӆ­ты вєр тўӊматты, проект оӆӑӊӑн иньщӑсты, Елена Тереньевная карты кєӆ хўват путӑртаты: 89088846023.

Мосӆ лупты, тӑм йиӆуп хот хуща мўӊ шуши мир оӆӑӊӑн йиӆуп айкеӆӑт уша вєрты питӆўв. Щимӑщ нумсӑӊ па каркам нєӊие­та вән пәмащипа па вўща ясӊӑт китӆўв, еӆӆы вўтьщӑты вєрӑт ма ат мӑнӆӑт. 

Путӑр хӑншӑс: 
Светлана Рандымова