«Хӑнты ясӑӊ» газетаев ӆўӊӑтты ёх!
Ин мўӊ «И рәт – и рәпата» кӑсупсыйн нух питум ёх путрӑт хӑншты питӆўв. Касум кәртӑӊ пух Данил Белкин (11 оӆ ӆуват) йис хӑнты Рандымовӑт рәтэӆ оӆӑӊӑн путӑр хӑншӑс па китӑс. Ӆўв 6-13 оӆ ӆуват кӑсум няврємӑт кўтн оӆӑӊмит тӑхия питӑс. Ин ӆўв путрӑӆ ӆўӊтаӆн!

Йис пура вўш эвӑӆт Ильпикәртӑн Хар­сурт рәт ёх вәсӑт, вўӆы тащ тӑйсӑт, вой-хўӆ веӆ­пӑсӆӑсӑт. Щи пурайн ар хӑнты хуят вәнт кәртӑтн вўӆы ӆавӑӆман, вой па хўӆ веӆпӑсӆуман вәсӑт.

Ма аӊщащєм Иван Павлович Рандымов Помут кәртӑн сєма пи­тӑс. Ӆўв ащеӆ Павел Яков­левич Рандымов, ӑӊкеӆ – Пелагея Ивановна Ран­дымова. Ӆыв семьяеӆн ӆапӑт няврєм вәс – Да­нил, Андрей, Анастасия, Татьяна, Илья, Иван па Александр. Ӑшкола па армия пийн рәпитты питсӑт.

Щи рәт хӑннєхуятӑт – ма па тәса рәпитты ёх, м хўӆ па вой веӆпӑсӆӑты ёх вәсӑт. Пурмӑсӑт па ӆәмӑтсухӑт шєӊк тәса па хурамӑӊа вєрсӑт. Вўт­вошн вўӆы тащӑтн рә­питты оӆӊитсӑт, вой-хўӆ веӆпӑсӆӑсӑт, ӆаӊки па нюхӑс вой сухӑт совхоза мийӆясӑт. Кашӑӊ ӆўӊ нуви хўӆ веӆпӑсӆӑты щира Вән Аса ӊхсӑт. Хоттєӆ ёха хӑр эвӑӆт пищмайт хӑншсӑт, хутыса вәсӑт, муй вєрсӑт. Щи ӆӑварт пурайн щи рәт хӑннєхуятӑт арсыр рәпатайт рәпитсӑт, тәп хӑнты мир йис вәӆупсэӆ ӆавӑӆман тӑйсӑт.

Щӑӆта Касум вошн «Казымской» совхозн рәпитсӑт. Хән пенсия пу­рая йис, ӆын рўтьщӑты пенсияя мӑнсӑӊӑн. Щи рәт хӑннєхуятӑт щиты вәсӑт.

Вўтвош кәртӑн ма аӊщащєм совхоз дирек­тора рәпитӑс. Ёмвошн  вәнӆтыӆӑс, щӑта 1968-мит оӆн вән нєпек ёша павтӑс па имухты Касум воша рәпитты мӑнӑс. Ар оӆ тўтӑӊ хопн капитана рәпитӑс, кашӑӊ ӆўӊ ай кәртӑт па вошӑт хўват араттєӆн мосты ӆєтутӑт-пурмӑсӑт тәтьӆюман ӊхиӆӑс, тӑӆн вой веӆпӑсӆӑты па совхоз бригада ёха нётӑс.    

Ма ӆын вәӆупсэн оӆӑ­ӊӑн еша хӑншсум, тӑм йисн мўӊева нәмман тӑйты мосӆ, муйсӑр рәт хӑннєхуят вәсӑт – вєра каркам па вєрӑӊ ёх. Ӆўӊӑн мўӊ Помут воша па сўс кәрта ӊхӆўв – вонь­щумутӑт ӑкӑтӆўв па хўӆ веӆпӑсӆӑӆўв. 

2024-мит оӆ Хоттєӆ ёх оӆ нємн пунсы. Опращ, ӑӊкаӊки, щащи, аӊщащи, щатьщащи, ӑӊки-ащи, хоттєӆ ёх – щит кашӑӊ хӑннєхә пӑта мєт мосты хуятӑт, иха хоттєӆ ёх вєрӑт ӆавӑӆман тӑйӆӑт па еӆӆы тәӆӑт.

Путӑр хӑншӑс: 
Данил Белкин