Кышик кәрт вўт оӆӑӊӑн ай хотые омӑсӆ. Щӑта ухӆ вотум пирӑщ ики вәӆ. Кашӑӊ хӑтӆ аӆӑӊа ӆўв ким єтӆ па хот питӑрн пўн сэвты нармӑӆ. Муйсӑр щит ики… Вәйтман тӑяӆн, щит Мосумн мєт сыры коммуниста питум па ар ӛр мир вәӆупсы такамты пӑта миюм хә Кирилл Николаевич Харанзеев. 

– Нәмӆєм, хуты Сыӊ-Вар кәртӑн мўӊ оӆӑӊ пўш колхоз вєрсўв, – путӑртӑӆ Кирилл Николаевич, – вўтн вәӆум ёх амӑтман колхоза вўянтсӑт.

– Тәп вәсӑт па хурасуп вєрӑт, – еӆӆы пирӑщ коммунист путӑр тәӆ, – тәх ёх ӑнт кашащсӑт колхозн рәпитты. Щи ёх ӑнтә нєман щиты вєр­сӑт. Ӆыв хуӆна мӑс ӑнт нєрамтсэӆ колхоз юрӑӊ вәӆупсы. 

Харанзеев ар ӛр мӑс колхоз така вєрты, хӑн­ты мир йиӆуп социа­листической вәӆупсыя вәнӆтӑты пӑта.
Тәп юхтӑс щимӑщ пура, хән иса мир ӆаӆя мӑнсӑт. Кирилл Николаевич па сонтумӑс мўвев вуракӑт эвӑӆт ӆавӑӆты мӑнты. Тәп ӆўвеӆа лупса, мӑтты ӆўвеӆа юӆн рәпитты мосӆ. 
Юӆн хӑщсӑт имет па няврємӑт. Иса Сыӊ-Варн вәӆум мир аеӆ-вәнэӆн хўӆ, вәнт вой веӆсӑт.
– Интӑм ма щи оӆӑӊӑн нәмӑстємн, – ай павӑтӆ Харанзеев, – щирн ая вәӆум няврємӑт пєӆа вантӆум. Ӆыв вәна, ӛрӑӊа вмеӆ.
Щи няврємӑт ӑӊкиӆаӆн єнмӑӆсайт, ащиӆаӆ па ӆаӆь хӑрн вуракӑт сєӊксӑт. Тәп ма вәӆєм па вєр. Хӑнты нєӊӑт па рәпитты ӛр тӑюм кєм няврємӑт ищиты вуракӑт сєӊкты ӛр мӑсӑт. Ӆаӆь вәӆум артӑн шєӊк апрӑӊа рәпитсӑт хӑнты нєӊӑт Евдокия Ивановна Лозямова, Татьяна Ксенофонтовна Харанзеева, Екатерина Семёновна Тарлина па па ар хуят. 
Кирилл Николаевич мир оӆӑӊӑн путӑртӑӆ, тәп ӆўв вәӆупсэӆ оӆӑӊӑн шимӑӆ ясӑӊ лупӑӆ.
Ма щирємн, ӆўв оӆӊӑӆн ищиты ар амтӑӊ ясӑӊ лупты рӑхӆ. Щи хә оӆӑӊ Сыӊ-Вар колхоз тывум вўш эвӑӆт пенсияя питтаӆ вәнты кәщая вәс. Щи ар­тӑн Кирилл Николаевич нәптӑӆ вән кўш вәс, ар мәш тӑйс, тәп ӆўв иса ӛрӆ па нумсӑӆ колхоз ӛр нух аӆумты пӑта мӑсӆэ. Щи вән рәпатайӆ правительствайн ӑнт юрємӑсы. Ӆаӆь пӑрум пийн Харанзеев ма рәпитмаӆ пӑта медальн мойӆӑсы. 
Интӑм щи хә Мосумн мєт пирӑщ. Ӆўвеӆа 90 оӆ. Рәпитты ӛрӆ шимӆа йис. Тәп пирӑщ хә хуӆна пән сэвӑӆ, айӆта хўӆ веӆпӑсӆӑӆ. Мир вәӆупсы кєна вєрты нётӆ. Ӆавӑрта вәӆӆяӆ ӆўв эвӑӆтаӆа вўна яньщты па вевтама рәпитты ёха. Шєӊк мос­ман тӑйӆа ӆўв рәпата мирн.

Владимир Волдин
«Ленин пант хуват», 
№ 7 (835), 1965 оӆ, 22 май