Тӑта мосванӑн, Ас потты тыӆӑщ 21-мит хӑтӑӆн, «Ёмвош ёх» хӑнты арӑт ариты тӑхи Ёмвошн округ мир творчества хотн 7 оӆа вум мӑӊхӑт­ӆӑӆ постӑс. Тӑмӑщ әмӑщ па хурамӑӊ нєм тӑм ариты тӑхия ӊхты нєӊӑт нєма­сыя ӆывеӆа вўсӑт. Вантэ, ӆыв иса хуӆы­ева Ёмвошн вәӆӆӑт, щӑӆта па Ёмвош ок­ругев хон воша ин тӑмхӑтӆ вәнты ӆўӊ­тӑсӆ. 

«Ёмвош ёх» хӑнты арӑт ариты тӑхийн тӑмхӑтӆ араттєӆн 10 нє вәӆ, мӑта хӑннєхуятӑт тўӊщирӑӊа па тәса шуши ёхӆўв вәӆ­ты-хоӆты щирӆўв, арсыр пориты вєрӑт ушӑӊа-са­щӑӊа па рәт миреӆ ясӑӊ ищиты ма вәйтӆэӆ.

Ӆыв тӑмхӑтӆ, мӑтты ки и пўӆяӊа вәӆты хоттєӆ ёх, хуӆыева и тӑхия ӑктӑщ­сӑт, ӆәӆн хӑнты мирев йис арӑт еӆӆы тӑйты па мосты пурайн юхӑтты кємн щи утӑт сыр-сыр вошӑӊ мир еӆпийн м­сыева ариты па ванӆтӑты.

Мосӆ лупты, хуты «Ём­вош ёх» хӑнты мир арӑт ариты хота арсыр тӑхет хуща Ёмвош ӆуваттыйн рәпитты муй пенсия вўша юхтум имет иха юхӑтсӑт, ӆәӆн иса васы мăнты тыӆӑщ 2018-мит оӆ вўш эвӑӆт хӑнты арӑт ма еӆӆы тәты.

«Ёмвош ёх» ариты тӑхи кәщая Фаина Иштими­рова вәӆ. Ӆўв ар оӆ мӑр «Хӑтӆые» театр хуща Ёмвошн рәпитӑс, Ханты-Мансийской автономной округ – Югра культура заслуженной деятель нєм тӑйӆ. Ма ӆўв пиӆэӆа тӑта вәйтантыйӆсум па уша павӑтсум, хутыса па хән ӆыв «Ёмвош ёх» ариты тӑхи ӆэщӑтты нумӑсн юхӑтсыйт. Фаина Ишти­мирова щи оӆӑӊӑн тӑми­ты мӑнєма путӑртӑс: 

-  Сыры ма 19 оӆ мӑр Ас-угорской «Хӑтӆые» нємуп театр тӑхи хуща вәсум па рәпитсум. Щи пурайн нәмӑсты питсум, муй пӑта мўӊ щимӑщ тӑхи ӑн тӑй­ӆўв, хута ӆәӆн рәт ясӑӊӑн хӑнты арӑт мсыева ари­ты вєритсўв. Щи киньща Ас хӑӆты тыӆӑщн 2018-мит оӆн ма па Людмила Гурьева иха нәмӑссумн, муй щирн щимӑщ ариты тӑхи пўнш­ты рӑхӆ. Щӑӆта хӑнты арӑт ариты каш тӑйты нєӊӑт иха ӑкӑтсумн, ӆыв пиӆэӆа мсыева па пу­тӑртсумн, айӆтыева арсыр хӑнты арӑт Ёмвош твор­чества хот йитн вәнӆтӑты питсўв.  Щи вўшӑт эвӑӆт па ин тӑмхӑтӆ вәнты «Ёмвош ёх» ариты тӑхи нєӊ­ӆўв арсыр вәйтантуп­сэта кәща ёхӆўвн вохты питсыйт. 
Юхи хӑщум пураитн округев  хуща постӑты мӑӊхӑтӆӑтн, щит «Тыӆӑщ поры», «Вўӆєӊ, вой па хўӆ веӆпӑс ёх» муй «Вурӊа хӑтӆ», «Ай хопӑӊ кӑсупсэтн», «Мўвтєӆ шуши мир хӑтӆӑн» па па утӑтн вәӆӆӑт, әмӑщ якты муй ариты хотӑт хӑннєхуятӑт еӆпийн ӆэщӑтӆӑт. 

Щи киньща «Ёмвош ёх» нєӊӑт 7-мит оӆа вум мӑӊхӑтӆэӆ пӑта ариты-якты хотэӆ иха ӑктӑщум вошӑӊ хӑннє­хуя­тӑт еӆ­пийн вєрсӑт. Сыры тӑта ӆыв «Ван рәтӑт» нємпи хӑнты ареӆ тәса арисӑт. Вантэ, увӑс мирев ай па щимӑщ вєрӑт пӑта кашӑӊ хӑнты хә па нє ӆыв кўтэӆн ищипа ван рәтӑта-щирӑ­та ӆўӊтӑсӆӑт.
Щи тәс ареӆ етшум пийн етнхот вєрум нє­ӊӑт округ мир творчества хот кәща ӆӑӊкӑр хәя И. Билаша ясӑӊ мӑсӑт. Иха юхтум хӑннєхуятӑт еӆ­пийн ӆўв тӑмиты щи лупӑс:
- Мӑнєма тӑмхӑтӆ шєӊк әмӑщ, хуты тӑм етнхота «Ёмвош ёх» ариты тӑхи мӑӊхӑтӆ постӑты пӑта ар хӑннєхә иха ӑктӑщ­сӑт. Ӆӑӊхаӆум лупты, ӆәӆн ариты тӑхи нєӊӆўв еӆӆы ищиты тумтака, тӑӆаӊа ат вәсӑт па еӆӆы мўӊев хӑнты мирев әмӑщ арӑтн ат амӑтсӑт! 

Ясӊӑӆ вєрмаӆ пийн Ёмвошӑӊ творчества хот кәща ӆӑӊкӑр хә И. Билаш «Ёмвош ёх» хӑнты арӑт ариты тӑхи кәща нєӊа Ф. Иштимировая ишӑкты нєпек катӆуптӑс.
Мосӆ лупты, етнхотн пурайн «Ёмвош ёх» тӑхи нєӊӑт араттєӆн ӆапӑт ар мӑӊхӑтӆэӆ пӑта арисӑт. Вантэ, хӑнты мирев ӆапӑт тәрум тӑйӆ, Ёмвошев па ӆапӑт мӑӊ рєп ӆаӊӆӑтн йис пурайт вўш эвӑӆт омӑсӆ! Щӑӆта «Ёмвош ёх» нємуп ариты тӑхев ӆапӑт оӆ ӆувата йис! 

Путӑр хӑншӑс: Владимир Енов