Тӑм оӆ Вуӆаӊ ӆаӆьн нух питум хӑтӆ вўш эвӑӆт 80 оӆ постӑӆўв, ӆаӆясум хә Егор Ефи­мович Тарлин оӆӑӊӑн вутщӑӆум хӑншты. 

Егор Ефимович 1911-мит оӆн Помут вошн сєма питӑс. Ӆўв колхозн рәпитӑс па Помут кәрт эвӑӆт 1942-мит оӆн ӆаӆя мӑнӑс. Имеӆ Анастасия Ивановна пиӆа хәт эви па и пух єнмӑӆсӑӊӑн, щит Нина, Маша, Галя Люда, Валентина, Катя, Петя. Вән хот тӑйсӑӊӑн, сыры щăта пәщта хот вәс.  

Валентина Егоровна эвеӆ путӑртас:

- Ӑӊкєм Анастасия Ивановна Вўтвошн кол­хосн арсыр рәпатайт вєрӑс, хуӆта китыйӆсы, щив мӑнӑс. Ащєм пиӆа вәнта ӊхиӆӑс, ӆаӊки кӑншман, юхи юхӑтӆӑт, колхоза мӑты щира ар ӆаӊки сух тәӆӑт. Ащєм гос­питальн вәс, ӆаӆьн ёшӆ мәшмӑӆтум, юхи юхăтмаӆ пийн ёшӆ ма ӑн питӑс. Мәшмӑӆтум тӑхиӆаӆ ай ӆўв, йинтуп хурасуп, лы­паща вәс, щитӆ нух вўсы, щӑӆта еша машӑк йис. Иса рәпитӑс, кашӑӊ хӑтӆ тўт х сэвӑрман вәс, ӑш­колая муй пәӆьницая. Мўӊ ай пурайн нӆ класс вәнта Вўтвошн ӑшколайн вәнӆтыйлсўв. Максим Ти­мофеевич Молданов ӑш­колайн рәпитӑс, щӑӆта Касум интернатн вәсум. 
Ащєм мўӊ пиӆєва иса ма путӑртӑс, тәп шәкӑӊ ӆаӆь оӆӑт оӆӑӊӑн мўӊева ӑн путӑртӑс. 1956-мит оӆн пенсияя мӑнӑс, ӑӊкєм пиӆа вәнтӑн вәсӊӑн. Ӆын хўӆ веӆпӑсӆăсӊӑн, воньщумут ӑкӑтсӑӊӑн. Няврємӑт рўтьщӑты пу­райн мўӊ кәрта ӆын ху­щана ӊхсўв, кәрт вәнта кўрн ӊхийӆсўв. 

Валентина Егоровна ащеӆ па ӑӊкеӆ мевӆ посӑт, нєпекӑт шавиман тӑйӆӑӆэ, щит профсоюзной нєпекӑт, вой веӆпӑсӆӑты ёх нєпекӑт.

Мєт вуӆаӊ нєпек – щит красногвардейской ки­ниш­ка, хута хӑншман вәӆ, хута ӆаӆясты ӊхӑс, муйсӑр ротайн вәс, муй­сӑр ӆәмӑтсухӑтн мӑсы. 

Мўӊ Егор Ефимович оӆӑӊӑн мосты нєпекӑт, извещенияйт интернет хуща, «Память народа» портал хуща уша вєрсўв, тӑм сайт хуща ӆаӆясум ёх оӆӑӊӑн арсыр мосты нєпекӑт иха ӑкӑтман вәӆӆӑт. 

Вәна пєлка вмаӆн, вош мир нәмӆӑт, кашӑӊ хӑтӆ хотэӆ пўӊӑлн няврємӆаӆ пиӆа путӑртман муӆты вєрман омсӑс. Вош мирн ипўша сӑмӑӊа тӑй­са, ӆўв хущеӆа ӊхсӑт. 
Вуӆаӊ ӆаӆьн ӆаӆяс­маӆ пӑта «Орден Оте­чест­венной войны II сте­пени» мевӆ посн пос­тӑ­сы па ма рәпитмаӆ пӑта Победа мӑӊхӑтӆ юбилейной мевӆ посӑт тӑйс, щит «20 лет Победы в Великой Отечественной войне», «30 лет Победы в Великой Отечественной войне», «40 лет Великой Отечественной войне», «50 лет Вооруженных сил СССР».

Тӑм хурӑт па нєпекӑт Валентина Егоровна киника хота вӑнӆ­тупсыя мӑсӆэ, ӆәӆн вош мирӑт ат вӑнтсӑт па ӆыв тарум вєрӆаӆ нәмман ат тӑйсўв па ӑнт юрємӑсӆўв, муйсӑр тынӑн мўвев па мирев ӆыӆ хоӆумса! Мўӊ ӆыв тарум вєрӆаӆ нәмман тӑйӆӑ­ӆўв, еӆӆы щи оӆӑӊӑн мўӊ ми­ра, няврємӆўва па хиӆыӆў­ва путӑртты питӆўв.

Путӑр хӑншӑс: 
Светлана Рандымова