Николай Фёдорович Сандыков 1932-мит оӆ ван хӑтӆуп тыӆӑщ 7-мит хӑтӑӆн Самаровской район Чубаково кәртӑн сєма питӑс. Тӑм ай кәртые Вән Ас кимӑӆн омсӑс. Николай Фёдорович аӊщащеӆ – Константин Сандыков – хӑнты хуят вәс. 

Щи пурайн ӆыв ар мис, ӆов, ош тӑй­сӑт. Аӊщащеӆ нӆ пух Фё­дор, Никита, Иван, Ефим тӑйс. Вуӆаӊ Отечест­вен­ной ӆаӆь пурайн 1941-мит оӆн пухӆаӆ хуӆыева щий тәсайт. Никита па Ефим пухӊӑӆ ӆаӆьн пӑр­сӑӊӑн. Николай ащеӆ – Фёдор Константи­нович – ӆаӆь хӑрн ӆавӑрта мәшмӑӆса, щирн 1943-мит оӆн ӆўв юхи юхтӑс. Ӑӊкеӆ – Анна Васильевна Яблонских – увӑс мўва китум ёх семья эӆты вәс. 

Николай Фёдорович 1940-мит оӆн ӑшколая оӆӑӊмит класса мӑнӑс.
Щи Вуӆаӊ ӆаӆь оӆӑӊӑн ӆўв тӑмиты путӑртӑс: 

- 1941-мит оӆн шєӊк вән йиӊк вәс. Кәртэв хо­тӑт ӆаӊӑӆӆаӆ иса йиӊкӑн вўйман вәсӑт. Мўӊева па войӆăва вәӆ­ты щир нюр ӑнтәм вәс. Щи пурайн уполномо­чен­ной юхтӑс, хә хуятӑт ӆаӆя имухты ӑн тәсайт. Мєт оӆӑӊ войӆаӆ мўвӑӊ вў­рамӑта тәты мо­сӑс. Кәртэв пўӊӑӆн ӛхум вў­рӑт вәсӑт. Щи мўвӑта войӆăв вән не­водник хо­па ӆєӆ­ман тәсайт.

Щи пийн 1941-мит оӆ васы пӑктӑт тыӆӑщ 20-мит хӑтӆӑн кәртэва вән тўтӑӊ хоп юхтӑс па хуӆыева хә хуятӑт ӆаӆь хӑра щи тәсайт. Кәртӑн нєӊӑт, ай няврє­мӑт па пирӑщ хуятӑт хоӆӆу­ман щиты щи хӑщсўв.

Щи ӆавӑрт пурайн ӑӊкиӆăв па мўӊ, ай няв­рємӑт, колхосн рәпитты хӑщсўв. Вән йиӊк вәс, мисӑт ӆапӑтты мосӑс, щирн мўӊ, няврємӑт, хӑш х лыпӑт мәрытсўв, щӑӆ­та па лыптӑт вән невод­ник хопн тәсайт па щитн мисӑт ӆапӑтсайт. Кашӑӊ хӑтӆ щи лыпӑт мунталэт сопаса вєрты ӊхсўв. Сўсн па тӑӆ хўват ӑӊкиӆăв щещ х сэвӑрӆӑт, мўӊ щещ вәшиӆўв, ӆәӆн мисӑт ӆапӑтты. Ма щи пурайн вәншӑк вәсум, щирн ӑӊ­кєм рәпатайн вәӆтаӆ мӑр апщиӆам пиӆа атэӆт вә­сўв. Ӑӊкємн ӆантӑн, кӑр­тәп­кайн хӑйӆаюв, ма ӆєтут вєрӆум, щиты щи вәсўв. Пирӑщ вән хуятӊӑн Катя ими па ӆўв Абрам икеӆ мўӊ хотэв пўӊӑӆн вәсӊӑн, ӆын мўӊев ван­кўтӆы вантыйӆсӑӆӑн. Мўӊ, няврємӑт, еша вәнашӑк вмев пурайн вән ёхӆăв пиӆа хўӆ веӆпӑсӆӑты питсўв. Пирӑщ Абрам икевн веӆпӑсӆӑты пищӑ­та вәнӆтӑсаюв. 1942-мит оӆн ар хўӆ вәс. Мин ӑӊкєм пиӆа ай тухӑӆ вєр­сумн. Вән Аса питты пусӆ овн тухӑӆ таӆсумн, ар хўӆ мущатсумн. Вән неводник хопа хўӆӆăв ӆєӆсӑӆ­ӆăв па пещавойн кәртэв вәнты хопев таӆ­сэв. Ӑӊкиӆăв аӆӑӊ-етн мисӑт пәсӆӑт па хӑтӆӑӆн турн хӑрн рәпитӆӑт.

Николай ащеӆ Вуӆаӊ ӆаӆь эӆты юхтӑс, ёшӆ мәшмӑӆтуман вәс. Ӆўв няврємӑт хуӆыева хўӆ веӆпӑсӆӑты щира брига­дая ӑкăтсӑӆӆэ. Щирн 1943-мит оӆн ӆыв ӆўӊ мӑр 150 тонна хўӆ пӑла­на мӑсӑт. Щи пурайн вухн ӑн сухуптӑсайт, «трудодни» сахăт рәпитсӑт.

Николай Фёдорович 1946-мит оӆн комсомола мӑнӑс. Ёмвошн фабрич­но-заводской училища хущи тракториста вәнӆ­тыйс. 1952-мит оӆн ар­мияя мӑнӑс. Щӑӆта юхтум пийн тўт мӑты хотн рә­питӑс па ар тӑхетн иса 43 оӆ хўват рәпит­ман вәс. Ольга Георгиевна имеӆ пиӆа 53 оӆ ха вәсӊӑн.  Кӑт эви па хиӆэт тӑйӆӑ­ӊӑн. 

Николай Фёдорович Вуӆаӊ Отече­ственной ӆаӆь ветеран па «Ветеран труда» нємӊӑн тӑйӆӑӆэ. Вуӆаӊ ӆаӆь пурайн така рәпитмаӆ щирн нӆ ме­дальн мевӆӑӆ хурамтса. 

Путӑр хӑншӑс: 
Наталья Морозова