Тӑм оӆ товийн Русскинской кәртӑн Сәрханӆ районӑн «Вўӆєӊ па вой-хўӆ веӆпӑсӆӑты ёхӆўв» мӑӊхӑтӆ вәс. Щи хӑтӑӆн ма рәпатам щирн арсыр хәйт-нєӊӑт пиӆа вәйтантыйӆсум па сыр-сыр айкеӆӑт ӆыв вәӆты-хоӆты щирӆаӆ оӆӑӊӑн уша вєрсум.  

Щиты тывеӆт-тухеӆт ӊхман, мăнєм вәйт­ты хӑннєхә пиӆа вәйтан­тыйӆсум, ӆўвеӆ путрє­мӑты хущсєм, м­сыева вәӆты-хоӆты щирӆ оӆӑӊӑн щӑта инь­щӑссєм.

- Ма опращ нємєм Ста­ни­слав Семёнович Сопо­чин. Ма вой-хўӆ веӆпӑс ёх хоттєӆ хуща сєма питсум. Катра шєӊк сӑмӑӊа вәнт пєлӑкн арсыр вой веӆты ӊхсум па Тәрум юханэвн вәӆты хўӆӑт веӆпӑсӆӑсум. Тӑм йисн, вантэ, вой па хўӆ шимӑӆшӑка йис. Щи пӑта ар пєлӑк вәнт кәртымн кан вўӆыӆам пиӆа еӆӆы вулкємӑӆум. 

- Муйсӑр рәт щирн ӆўӊтӑс­ты тӑхийн нӑӊ иса хот­тєӆ ёхӆан пиӆа тӑмхӑтӆ вәӆӆӑн па муй арат кан вўӆы тӑйӆӑн?

- Тӑмхӑтӆ ма ӆапӑтмит рәт щирн ӆўӊтӑсты вән кәртємн хоттєӆ ёхӆам пиӆа вәӆӆум. Мўӊ вәӆты тӑхев Тәрум юхан хўватн нухӆы пєӆы омӑсӆ. Щи унтасн мўӊева еша кєн­шӑк, вантэ, хўвӑншӑкн мўв иӆпи тащ кӑншты рўщӑт эвӑӆт ин вўӆэт тӑйӆўв. Тӑм юхи хӑщум кўтӑтн 80-кєм вўӆылэӊкие, аӆпа, ма хущєма араттєӆн вәӆ. Щӑӆта ин щиты лупты вўтьщӑӆум, хуты кашӑӊ йиӆпа юхӑтты оӆ мўӊева иса ӆавӑртӑӊа кан вўӆэт ӆавӑӆты па еӆӆы тӑйты. Вантэ, нёта єнумты тӑхи­ӆўв, хута вўӆыӆўв ӊхӆӑт па ӆєтут кӑншӆӑт, кашӑӊ пўш шимӆа йиӆӑт. Ма кўшкєпа мкєм вән вәнт щўняӊ тӑхи тӑйӆум, хута вўӆэт ӆапӑтты вєритӆум. Итәх хӑнты хуятӆўв иса щимӑщ тӑхет такӆы тӑм хӑтӆӑтн хӑщсӑт.

- Муй пӑта щи вєр нын рәт мўвн па вән кәртӑтн вәӆ­ты хӑнтэт хуща питӑс? 

- Па, вантэ, мўӊ рәт щирн тӑйты мўвӆўв кєрӑтман тӑмхӑтӆ мўв иӆпи тащӑт  кӑншты рўщӑт вәӆӆӑт па рәпитӆӑт. Кашӑӊ оӆ мӑр ӆыв мўӊ хущева ванашӑк хӑтӆӑт. Щиты ин Тэвлин­ско-Когалымской тӑхи и пєлӑк эвӑӆт па Тяновской тӑхи кимит пєлӑк эвӑӆт «Сургутнефтегаз» мўв иӆпи тащ кӑншты ёх мўӊ хущева еша вәӆ щи юхӑт­ӆӑт. Мўӊ па щи пураитн хуӆта мӑнты вєритӆўв?

- Муй арат няврєм нӑӊ тӑй­ӆӑн, аӆпа, вәна ӆыв йисӑт?

- Мин имисӑӊӑн няврєм ӑн тӑйӆумн. Щи кана яюм ики шәӊӑт хәӆум пух вәӆупсы хўватн иимєм пиӆа єнмӑӆӆумн. Кӑтӊӑн тӑм оӆ мӑр хуӆна еӆӆы ӑш­колайн вәнӆтыйӆăӊӑн. Вән пєӆы яйӆ па ӆаӆя мӑнӑс па щӑта ин вәӆ. 

- Нӑӊ щиренӑн, тӑмӑщ «Вў­ӆєӊ па вой-хўӆ веӆпӑс­ӆӑты ёхӆўв» мӑӊхӑтӆӑт ма муй вевтама тӑм юхи хӑщум оӆӑтн Русскинской кәртӑн вєрты питсыйт? 

- Ма нәмӑстємн, тӑмӑщ мӑӊхӑтӆӑт мєт ма, ху­рамӑӊа юхи хӑщум пу­раитн ӆэщӑтӆыйт. Катра ма тӑм мӑӊ­хӑтӆӑ­та юхтыйӆсум па сыр-сыр кӑсты вєрӑта ӊхсум па итәх щосн хуӆна оӆӑӊ тӑхет хоӆумсум. Ин еша вәншӑка йисум па ӑӆ щиты рәт ёхӆам пиӆа вәй­тантыйӆты тыв ӊхӆум. м вєр, хуты «Вўӆєӊ па вой-хўӆ веӆпӑсӆӑты ёх­ӆўв» мӑӊхӑтӆ ма, тўӊ­щирӑӊа постӑӆы!

Путӑр хӑншӑс: 
Владимир Енов