Тәняӆ ма рәт Ӆорвош районєм эвӑӆт вәнӆтыйӆты щира юхтум эви Алёна Аляба пиӆа вәтаӊа йисум. Ӆўв Югорской государственной университет «Физическая культура» факультетн 4-мит курсӑн вәнӆтыйӆ. Ӆўв мўӊ редакцияева мойӊа юхтыӆӑс, ма ӆўв пиӆэӆа путӑртсум. 

Алёна ястӑс, ӆўв 2002-мит оӆн Ас хӑӆты тыӆӑщ 10-мит хӑт­ӆӑн Ӆорвош район Му­жи кәртӑн Владимир Сте­панович па Татьяна Вла­димировна Аляба хотн сєма питӑс. Ӑӊкеӆ хӑнты Озелов рәт эвӑӆт йиӆ. Ащеӆ хўӆ веӆпӑсӆӑс, ӑӊкеӆ хӑтӆ мӑр ай няврємӑт тӑй­ты хотн ай воспитателя рәпитӆ. Ӆыв щемьяеӆн хәӆум няврєм сєма пит­сӑт: Алёна – мєт вән эви, щӑӆта Вадим пух па По­лина эви. Вадим Ёмвошн медколледж ет­шуптӑс, ин Пуӆӊавӑт вошн реа­билитационной тӑ­хийн рәпитӆ, Полина хәтмит классӑн вәнӆтыйӆ. Ащеӆ ӑнтәма йис, щирн няврє­мӑт айтєӆн ӑӊкеӆа нётсӑт.

Алёна Аляба рәтэӆ оӆӑ­ӊӑн ай тәс:

- Аляба рәтєм Ӆорвош район Вершина-Войкары кәрт эвӑӆт йиӆ. Щи кәрт Войкар Кев юхан хонӑ­ӊӑн омӑсӆ. 

Щатьщащєм вўӆы тащ ӆавӆӑс. Щӑӆта рўтьщӑты мӑнмаӆн ща­щєм пиӆа кәртӑн хўӆ веӆ­пӑсӆуман вәс. Ӆын ар няв­рєм тӑй­сӑӊӑн. Мўӊ ка­шӑӊ рўть­щӑты пурайн ӆыв пи­ӆэӆа Кев хуща па юхӆы касӑӆсўв, нётсўв, щирн вўӆэт ӆавӑӆты вєр ма тӑйӆўв. 

Ин мўӊ яев вўӆы тащ пиӆа касӆуптыйӆ. Мӑнє­ма айтєӆн ӆўӊ пурайн Кев шәпи касăӆты шєӊк әмӑщ вәс, вантэ, щи пурайн Ке­вев шєӊк хурамӑӊ!
Аляба рәтєм оӆӑӊӑн путӑртты ки, мўӊ тәс вє­рӑнтты ёх тӑйӆўв, и вә­таӊ хуят – щит Сергей Ва­лерьевич Аляба – ӆўвӑт эвӑӆт арсыр хурамӑӊ пур­мӑсӑт вєрты хә. Мўӊ Аля­ба рәтэв хуща хўӆ веӆ­пӑсӆӑты, вўӆы тащ ӆавӑӆты, вєрӑнтты па па хуятӑт вәӆӆӑт.

Алёна Восяхово (хӑнты щирн Ващ юхан) кәртӑн ӑш­колайн вәнӆтыӆӑс. Щӑта рәт хӑнты ясӑӊа Надежда Степановна Аляба вәнӆтӑс. Ӑшколайн ӆўв литература урок сӑмӑӊа тӑйс, хурамӑӊ путрӑт хӑншӑс. Щиты лупӆ:

- Рўщ ясӑӊа па лите­ратурая вәнӆтӑты нєӊємн ма ванкўтӆы ишӑксаюм, мӑтты ки, ма путрӑт тәса хӑншӆум па ӆәӆн еӆӆы щи вєра ат вәнӆтыйӆсум. Хәнты экономиста вәнӆ­тыйӆты нумӑс тӑйсум. Ма ным Елена Владимировна Сибарева (Озелова) – Ямал мўвн вәтаӊ тележурналист нє, ӆўв шєӊк ӆӑӊхас, ӆәӆн ма ищи айкеӆӑт ӑкӑтты нєӊа ат вәнӆтыйӆсум. Тәп ма ӛрӑӊа-щомӑӊа йи­ты вәнӆтӑты нєӊа вәнӆ­тыйӆӆум. Нєпекєм щирн, ма няврємӑт кӑсты туриз­ма вәнӆтӑты питӆум. 
Ма, вантэ, ӑшколайн ищи кӑсты туризм вєр мосман тӑйсум, ванкўтӆы Кева ӊхийӆсўв. Интӑм пура вәнты кӑсӆум. Щи тумпи ванкўтӆы ӆухн хӑтӑтьӆяӆум. 

Алёна хӑнты щемьяйн єнмӑс, вўӆы тащ пиӆа касӆӑс, щирн хӑнты мир вәӆупсы ма вәӆӆэ. Пу­тӑртӑӆ:

- Хӑнты щемьяйн єнум­сум, щирн вәӆум, муй рӑхӆ, муй ӑнтә. Тӑмхӑтӆ ӆәхӑсӆама мўӊ вәӆупсэв оӆӑӊӑн хурӆам муй па ай кинайт аӆьӆум, ӆывеӆа шєӊк әмӑщ, муй щирн мўӊ нюки хотн вәӆӆўв, муй щирн вўӆы тащ пиӆа касăӆӆўв, муй хурасуп ху­рамӑӊ ӑня лыптӑӊ Кев мўвєм ӆўӊ пурайн. 
Ма айтєӆн щащєма нётсум – хот рәпатайт вєрсум, кєпӆ тӑнӑӆсум, ёнтсум, сӑк эвӑӆт арсыр тўрлопсӑт вєрсум, ин кәм ӑн тӑйӆум, тәп щи вєрӑт нәмӆӑӆам – тәп оӆӊитӆум ки, ёшӊӑӆам имухты вєрты питӆӑӊӑн. Ёмвошн ма ванкўтӆы арсыр вєрӑнтты хӑрӑта ӊхийӆӆум. Тәняӆ сўсн «Торум Маа» музейн вәнӆтыйӆты хӑрн вәсум па Галина Токчевна Шиянова пиӆа вўӆы сух тӑнӑӆсум, щӑӆта ваньщӑссум па тўтщаӊ хир ёнтсум. Ма ӑӊкєм па ӆўв упиӆаӆ ищи хуӆыева ими вєрӑт вєрты хошӆӑт, ваньщӑс­ӆӑт, ёнтӆӑт, тыйӆӑт, сӑк кӑрӑтман арсыр хурамӑӊ тўрлопсӑт вєрӆӑт. 

Ёмвошев па вәнӆтыйӆ­ты тӑхеӆ оӆӑӊӑн Алёна щиты лупӆ:

- Ёмвоша вәнӆтыйӆты юхӑтмємн ма имухты уша вєрсум, муйсӑр хурамӑӊ па тӑм йис щирн вєрум вош, муйкєм вән Югорс­кой государственной университет. Мӑнєма тӑта шєӊк әмӑщ вәнӆтыйӆты. Ма ар йиӆуп пиӆнєӊӆам пиӆа вәтаӊа йисум. Еӆ­ӆы магистратура хуща вәнӆтыйӆты нумӑс тӑйӆум.  

Щимӑщ м хӑнты эви пиӆа вәйтантыйӆсум. Ӆў­веӆа м ясӊӑт китӆум – еӆ­ӆы ма па тәса ат вәнӆ­тыйӆ, муйсӑр м нумсӑт тайӆ – ӆўв вәӆупсэӆн ат тывӆӑт! Тӑӆаӊ ёш, тӑӆаӊ кўр нӑӊена, Алёна!  

Путӑр хӑншӑс: 
Людмила Шульгина