Мӑнум оӆн Пуӆ­ӊавӑт воша вўӆєӊ ёх мӑӊхӑтӆа ӊхмємн юрн нє Любовь Ха­дычевна Куйбина пиӆа вәтаӊа йисум. Ӆўв юрн хотн мойӊ ёх пӑта шуши мир ӆєтутӑт кавӑртман рәпитӑс.

Любовь Хадычевна Байдарацкой нӛ­румн сєма питӑс па єнмӑс. Щи мўвн юрн ёх вўӆэт ӆавӑӆман вәӆӆӑт. Тови пурайн ӆыв Увӑс мўва Карской щорӑс пєлӑка муй па Полярной Урала касӑӆӆӑт, сўсн – морты мўв, вәнт пєлӑка, щӑта вўӆэт пӑта мосты вўӆы ӆант єнумӆ, щӑта шєӊк ищки тӑӆ пурайн ӆывеӆа кєншӑк вәӆты. Любовь Хадычевна ӑӊкеӆ-ащеӆ вўӆэт ӆавӑӆман рәпит­сӑӊӑн. Ащеӆ Хадыча Худи айӆат пураяӆн Вуӆаӊ Отечественной ӆаӆьн мў­вев ӆавӑӆман вәс. 

- Ӆўв ӆаӆьн Ленинград вош ӆавӑӆман вәс. Щӑӆта юхи юхтӑс. Ӑӊкєм нємӆ вәс Дарья Александровна Затруева. Оӆӊӑӆн ӑӊкєм-ащєм Аксарка вошн вәс­­ӊӑн па рәпитсӑӊӑн. Ӛхӑтшӑк нӛрума мӑнсӑ­ӊӑн, вў­ӆэт ӆавӑӆман вәӆ­ты питсӑӊӑн. Ӆын ӆапӑт няврєм єнмӑӆсӑӊӑн. Ай пура оӆӆам иса нӛрум мўвн мӑнсӑт. Ин упєм па яюм хотӑӊ ёхӆаӆ пиӆа ин вәнты нӛрумн вәӆӆӑт, вўӆэт ӆавӑӆман касӑӆӆӑт, – лупӑс Л.Х. Куйбина.

Айӆат пурайн Любовь Хадычевна Ямал мўвн Белоярск вошн «Бай­дарацкий» совхоз хуща вўӆэт тащн юрн хотн рәпитӑс. Щи оӆӑӊӑн ӆўв лупӑс:

- Щи пурайн ма айӆат вәсум. Тәп-тәп икия мӑн­сум. Икєм нємӆ Эдуард Николаевич Куйбин. Мин нӆ няврєм єнмӑӆсумн. Веткєм оӆ вўӆы ӆавӑӆман вәсмӑн, оӆӊӑӆн 10-мит пиркатайн рәпитсумн, щӑӆта – 14-митн. Икєм вў­ӆэт ӆавӑӆман вәс, ма юрн хотн иса вєрӑт вєрсум, ӆєтут кавӑртсум, ёнтсум. Щӑӆта пухєм кӑшитты пи­тӑс, леккарн операцияйн вєрсы. Щи пийн мўӊева кәртӑн вәӆты мосӑс. Мўӊ Ямальской район Са­лемал кәрта мӑнсўв. Щӑта ма хўӆ веӆпӑсӆӑты па щит эвӑӆт ӆєтут ӆэщӑтты тӑхийн рәпитты питсум. Пенсия вўша юхӑтсум, тәп ин вәнты щи завод хущи рәпитӆум. Тӑта мўӊ сорт, мевты, паннє па па хўӆ сыстамӆўв, щӑӆта хирӑта пунӆўв, щӑта хӑншӆўв, муйсӑр хӑтӆӑн щи хўӆ тыв тәсы, па потӑӆтӑӆўв.  

Любовь Хадычевна 40 оӆ мӑр Салемальской хўӆзаводӑн рәпитӆ. 2025-мит оӆн хўӆ веӆпӑсӆӑты ёх мӑӊхӑтӆ пурайн ӆўв «Заслуженный работник рыбного хозяйства Ямала» вуӆаӊ нємн мӑсы. 

Щи мӑӊхӑтӆ Са­лемал кәрт хонӑӊӑн хўӆ веӆпӑсӆӑты панӑн постӑсы, щӑта хўӆ веӆ­пӑсӆӑты ар хуятӑт па кә­ща ёх ӑктӑщийӆсӑт. 
Щӑта Ямал мўв зако­но­датель­ной собрания депутат хә Андрей Ку­гаевский Лю­бовь Хады­чевная щи мевӆ пос кат­ӆуптӑс па м па хошум ясӊӑт лупӑс. Ӆўв щирӑӆн, Любовь Ха­дычевна Куй­бина рәпата пєӆы сӑ­мӑӊ нє, ар оӆ хўӆ веӆ­пӑс­ӆӑ­ты тӑхийн ма па тә­са рә­питӆ, айӆат ёха ӆўв пє­ӆэ­ӆа вантман вәнӆ­тыйӆты мосӆ. 

Любовь Хадычевна эвеӆ нємӆ Зинаида Эдуардовна Куйбина. Ӆўв Тюмень вошн университетн юриста вәнӆтыӆӑс, интӑм вәнты щӑта вәӆ па рәпитӆ.
Роман Эдуардович Куйбин – мєт ай пухӑӆ. Ӆўв Салемальской ӑш­кола-интернат хущи вәнӆ­тыӆӑс, щӑӆта Санкт-Пе­тербург вошн А.И. Гер­цен нємпи институт ет­шуптӑс. Ямал мўва кєр­ӆӑс, ӆўв Пуӆӊа­вӑт вошн 3-мит ӑшколайн ртъяӊ оӆ няврємӑт ис­торияя вәнӆтӑӆ. 

Роман Куйбин айтєӆн ван­тӑс, хутыса ӑӊкеӆ-ащеӆ хўӆ веӆпӑсӆуман вәӆӆӑт, щирн Пуӆӊавӑт вош пи­тӑрн нёрум кўтупн юрн хот омсӑс. Щӑта Любовь Хадычевна пиӆа юрн хот вєрсӑӊӑн. Мойӊ ёх щив юхтыйӆӆӑт па уша павӑтӆӑт, хутыса юрн ёх нёрумн вәӆӆӑт. 

Ин имет мӑӊхӑтӆ вў­раӊӑн Любовь Хады­чев­ная тӛпӑӊ ясӊӑт лупӆўв. Тӑӆаӊа, ма хотӑӊ ёхӆаӆ пиӆа ат вәӆ! 

Путӑр хӑншӑс: 
Надежда Рагимова