Ёмвошн оӊӑт питты тыӆӑщн мир ӆўӊӑтты хотн мойӊ хуятӑт вәй­тантупсыя юхтыӆысӑт. Алла Иштимирова-Посохова «Обь|Чай» нємуп вәйтантупсы хотн Увӑс мирӆ вохыӆыӆӆэ па ӆыв вәӆупсы оӆӑӊӑн путрємӑӆӑт. 

Тӑм хӑтӆ Татьяна Ер­миловна Тарасова ӆўв рәт ӆєрӆаӆ па вєрăнт­ты пищӑт оӆӑӊӑн путӑр­тӑс. Татьяна Ермиловна – маньщи нєӊие, ӆўв Нуви сӑӊхум вошн вәӆ. Сангилев  ащеӆ пєлӑк йис маньщи рәт эӆты вәӆ. 

Ӆўв Сўмӑтвош райо­н Кимкъясуй кәртӑн сєма питӑс. Щӑта ӑӊ­кеӆ-ащеӆ пиӆа вәс, ни­вӑӆ класс ет­шуптӑс. Ӆўв ӑӊкеӆ Мария Дмитриевна Сангилева (Сайнахова) ищи йис маньщи рәт ӆє­рӑт тӑйс. Ӑӊкеӆ тәсыева вєрăнтты хуят вәс. Тӑтьяна щи ястӑӆ: 

- Ма ая вәӆмєм пурайн аӆӑӊӑн нух вєрӆӑтємн вантӆєм, ӑӊким хотхӑ­рыйн ӆампа нувийн ён­тӑсман омӑсӆ. Ма ӆўв хущеӆа вана омсумӆум па мсыева ӑӊкєм ёнтӑсты вєрӆаӆ пєӆы вантӆум па нумса пунӆум. Ӑӊкємн уӆты партӆаюм: «Айе, няв­рємӑт хуӆна уӆӆӑт, нӑӊ па муя тӑта омӑсӆӑн?». Щиты айтэӆн ушӑӊа вантман ёнтӑсты па сӑк кӑрӑтты щи вәнӆтыйӆсум. 

Татьяна Тарасова ăш­кола етшуптумаӆ пийн Пуӆӊавӑт воша ГПТУ хущи еӆӆы вәнӆтыйӆты мӑнӑс. Вәнӆтыйӆты тӑхеӆ етшуптумаӆ пийн «Су­до­вой радиоператор река-море смешанное плавание» щимӑщ нєпек мущатӑс. Азбука Морзе пищӑт щира телеграф хўват тўтӑӊ хопӑта ясӑӊ тәс. Щи пийн рәпитты щира Нуви сӑӊхум район Сәрум кәрта китса. Щӑта икия мӑнӑс, кӑт няврєм тӑйсӑӊӑн. Эвеӆ па пухӑӆ вәна йисӊӑн, вәнӆтыйӆты тӑхиӆаӆ етшуптӑсӊӑн па ин рәпитман ӆыв ухэӆ сахат тўӊа щирӑӊа вәӆӆӑӊăн. 

Татьяна Ермиловна пень­щияя мӑнмаӆ пийн икеӆ пиӆа Нуви сӑӊ­хум воша вәӆты щи­ра мӑн­сӑӊӑн. Ӆўв иса вәӆ­маӆ хўват вєрăнтман вәӆ­ты нєӊие, юӆн хән омӑсӆ. Нуви сӑӊхум вошн «Увӑс хурамӑт» кты хота мӑнӑс. Щӑта хӑнты нєӊӆаӆ пиӆа иса округ хўват якты хо­тэӆн ӊхӆӑт. Щи тумпи Татьяна Ермиловна мўӊ округев хўват ар вєрăнт­ты хӑрӑта ӊхӑс. Тәхӑӆ тӑхетн вәнӆтыӆӑс сыр-сыр пурмӑс вєрты, тәхӑӆ вєрăнтты хӑрӑтн па ӆўв мир вәнӆтӑс. Щиты йис пурмӑсӑт шавиты «Торум Маа» музей хущи па ар пўш вәнӆтӑты хӑрӑта юх­тыӆӑс. И вєрăнтты хӑрн ӆўв пӑӆ сӑк кӑрӑтты вәнӆтӑс. Ӆўв вєрум пур­мӑсӆаӆ «Торум Маа» музея шавиты щира вўсайт. 

Татьяна Ермиловна тәняӆ ван хӑтӆуп тыӆӑщн  Ляпин маньщет хущи вохиӆыса. Щит «Юрты Лопаевых» община ёх Свердловской область Лоб­ва кәртӑн вәӆӆӑт. Проект «Наследие корен­ных на­родов Урала» вет хӑтӆ мӑр Татьяна Ер­ми­ловна шуши ёх мань­щи рнас ваньщты щирӑта па хӑншийн ёнтты пищӑта вәнӆтӑс. Щи тумпи па нәй посӑт хӑншиӆаӆ муйӆаӆн ёнтты вәнӆтӑс. Тӑм оӆ па щий вохӆа. Юхӑттаӆ пурайн нәй сӑх ёнтты вәнӆтӑты питӆӑт. Шуши мира шєӊк әмӑщ вәс ёнтӑсты вәнӆтыйӆты па маньщи ясӑӊ хәӆӑнт­ты. Интернет хўват щи вєр оӆӑӊӑн ӆыв вән пәмащи­па ясӑӊ Татьяна Ермилов­ная китсӑт.

Щи тумпи ӆўв Екате­ринбург воша «Центр тра­диционной народной культуры среднего Ура­ла» тăхия вохиӆыса. Щӑта «Ман­сийские сказки. Зимние праздники в тради­цион­ной культуре ман­си» ванӆ­тупсыйн ӆўв вєрăнт­ты хӑрн хўӆ сух эӆ­ты ай тўт­щаӊӑт ёнтӑс па ёхӆа­ӆа мойӆӑсӆэ.

Ин тӑм вәӆум вәйтан­тупсыйн Татьяна Ерми­ловна маньщи ясӑӊӑн па рўщ ясӑӊӑн Мария Тихоновна Двинянинова хӑншум ван путрӑт мўӊева ӆўӊтӑс. Шєӊк әмӑщ вәс ӆўвеӆ хәӆӑнтты. Тӑмӑщ әмӑщ маньщи нєӊие пиӆа вәйтантупсы вәс.

Путӑр хӑншӑс: 
Наталья Краснопеева