2026-мит оӆ тәнӆуп тыӆӑщ 26-мит хӑтӆӑн Ёмвош округ Дума 54-мит мирхот вәс, хута округев пӑта мосты вєрӑт нух вантсыйт. 

Оӆӑӊӑн Югра мўв Дума кәща хә Бо­рис Хохряков мӑнум оӆ ӆэщӑтум рәпатаеӆ оӆӑ­ӊӑн путӑртӑс. Муй ӆыв оӆ мӑр вєрсӑт, ӆәӆн ӑӆ хӑннєхуятӑт вәӆупсы кєншӑка па ма вєрты. Мєт така ӆыв мӑнум оӆн социальной, мир мӑӆты па закон щирн вәӆупсы ӆэщӑтты вєрӑт тўӊщирӑӊа нух вантсӑт па тәсӑт.

2025-мит оӆн депутатӑт хӑннєхуятӑт эвӑӆт хӑншум нӆ щурӑс муӆтас вохты нєпек нух вантсӑт. м арат, щит мир вәӆты ар йитуп хотӑт тўӊщирӑӊа тӑйты па ӆэщӑтты оӆӑӊӑн па сыр-сыр социальной вє­рӑт оӆӑӊӑн иньщӑсупсэт вәсӑт. Ӆыв апрӑӊ рәпатаеӆ унтасн аршӑк вєр мосты щирн ӆэщӑтты рӑхӑс.

«Единая Россия» фрак­ция депутатӑт шєӊк мос­ты поступсэт ӆэщӑтсӑт. Щи поступсэт унтасн вән нєпекӑт хоӆумты айӆат хуятӑт, мӑта ёх ащиӆаӆ СВО тӑхийн ӆаӆясӆӑт муй па ӆаӆяссӑт, нётупсэт ёша павӑтӆӑт, ӆаӆь пурайн мәшмӑӆтум муй кӑши-мәш ёша павтум хӑннєхуятӑт ищи аршӑк нётупсыйн мӑӆыйт. Ищиты няврємӑт па айӆат ёх вәнӆтӑты тӑхетн рәпитты хуятӑт па правоохранительной тӑхетн рәпитты ёх нётты питӆыйт. 

Округ губернатор хә Руслан Кухарук Россия Минтруд тӑхия нєпек китӑс, ӆәӆн СВО тӑхийн ӆаӆясум хуятӑт айӆат ёх вәнӆтӑты вєра ат вўӆыйт, хута ӆыв безопасность па патриотической вос­питания вєра вәнӆтӑты питӆӑт. 

2025-мит оӆн Югра мўвн шуши мирӑт правайт вәньӆьты хуят пирисы. Мєт оӆӑӊ Уполномоченной хуята Людмила Алфёрова павӑтсы, ӆўв ар оӆ увӑс мир хуятӑт нўша вєрӑт тўӊматман вәс. Интӑм шуши мирӑт вәньӆьты щирн йиӆуп поступсэт вўсыйт. 

2026-2028-мит оӆӑтн округ бюджетн 70% арат вух мир мӑӆты, няврємӑт вәнӆтӑты, культура па ӛращты вєрӑта мӑнӆ. Щи унтасн округевн вәӆты мир пӑта социальной вєрӑт тўӊ­матӆыйт па ӆэщӑтӆыйт.  

Тәнӆуп тыӆӑщ 26-мит хӑтӆӑн Ёмвош округ Дума 54-мит мирхотн Люд­мила Низамова Югра мўвн няврємӑт правайт вәньӆьты хуята па еӆӆы пирисы. Мосӆ лупты, Л. Низамова тӑм рәпатайн 2021-мит оӆ тәнӆуп тыӆӑщ 21-мит хӑтӆ вўш эвӑӆт рәпитӑс. Мӑнум мирхотн Людмила Борисовна де­путатӑт ещаӆт путӑртӑс, хутыса ӆўв тӑм оӆӑт мӑр няврємӑта нётӑс, муйсӑр мосты вєрӑт ӆэщӑтӑс. Де­путатӑт хуӆыева ӆўв пӑ­тэӆа ёшӊӑӆаӆ нух аӆум­сӑт. Ӆўв нємӆ няврємӑт правайт вәньӆьты вєрн еӆ­ӆы рәпитты пӑта округев кәща хәйн мӑсы па Россия мўв Уполномоченной хуят щи пӑта мосты ясӑӊ мӑс.
Щӑӆта поступсы йиӆ­патсы, мӑта ут хўват инва­лидӑт па СВО ветеранӑт муӆтас нётупсы ёша па­вӑтты питӆӑт. Щит вәӆты хотӑта мӑты газ пӑта, пєӊ­кӑт лекщитты па вєрты, СВО тӑхийн ӆаӆясум хуя­тӑт пӑта кашӑӊ оӆ вухӑӊ нётупсы сухуптӑты. 

Шуши мирӑт 60 тӑӆа вум хә ёх па 55 тӑӆа вум имет, мӑта хуятӑт вәӆупсэӆ мӑр округевн рәт мўвӆаӆн вой-хўӆ веӆпӑсӆуман, вўӆэт тӑйман па увӑс мирӑт вә­ӆупсыйн вәӆӆӑт, ищи со­циальной нётупсэтн мӑ­ты питӆыйт.  
Округевн «Земский док­тор» па «Земский фельд­шер» вєр рәпитӆ, тӑм вєр еӆӆы 2026-мит оӆн па рәпитты питӆ. Мир мӑӆ­ты хуятӑта и пўш ву­хӑӊ нётупсы сухуптӑӆы. Щиты тохтурӑта, хуйтат кәрта вәӆты па рәпитты мӑнсӑт, кӑт миллион вух сухуптӑӆы, фельдшерӑта па пәӆьницайн рәпитты па хуятӑта – и миллион шойт вух .

Ӑӊкиӆы-ащиӆы хӑщум няврємӑт пӑта ӆэщӑтты нётупсэт оӆӑӊӑн поступ­сы йиӆпатсы. Щи нётупсы, мӑта ут хўват шәкащты няврємӑта вәӆты хот мӑ­ӆы, интӑм щив щи пушхӑт кӑрӑтӆыйт, хуйтат ӑӊкиӆаӆ-ащиӆаӆ СВО тӑхийн муй па Россия мўва нӑптум вуракӑт пиӆа ӆаӆясум пу­райн ӑнтәма йисӑт.

Ай кєр тыӆӑщ оӆӑӊмит хӑтӆ вўш эвӑӆт округевн вәнӆтӑты вєрӑт оӆӑӊӑн поступсы йиӆпатсы, щит бюджетной нётупсы ву­хӑт оӆӑӊӑн, мӑта утӑт «це­левое обучение» щирн сухуптӑӆыйт. Щиты йи­ӆуп щирн, хӑннєхә еӆӆы вәнӆтыйӆты ӑн ки вўть­щӑӆ муй па вәнӆтыӆум щирн рәпатая ӑн ки мӑнӆ, щи округ бюджет эвӑӆт сухуптум вухӑт ӆўв юхӆы мӑӆӆэ. Щит «компенса­ция за обучение» щирн нємӑтсы па муй арат вух ӆўв пӑтэӆа сухуптӑсы, щи арат юхӆы мӑты мосӆ. Оӆӑӊмит оӆ вәнӆтыйӆты тӑхеӆ ки вущкӑӆӆэ, юхӆы щи арат вух сухуптӑӆ, муй арат оӆ мӑр вәнӆтыйӆты вєр тынӆ вәӆ. Медицинс­кой па фармацевтической тӑхетн ки вәнӆтыӆӑс, щит вәнӆтыйӆты пӑта сухуптум вухӑт тумпи наклат вухӑт па сухуптӑты мосӆ, щит щи вәнӆтыйӆты вєр пӑта сухуптӑты вухӑт кӑт пўша вәна вєрӆыйт. 

Муй арат вух па хутыса ӆўв юхӆы сухуптӑты питӆ, щит округ Правительст­ва ёхн лупӆы. Щи вухӑт региональной казная юхӑтӆӑт. 

Щиты Югра мўв Дума ёхн мўӊ региональной законодательства вєрӆўв тўӊматӆыйт па тўӊщирӑӊа ӆэщӑтӆыйт, ӆәӆн ӑӆ мир ма еӆӆы ат вәсӑт.

Путӑр хӑншӑс: 
Надежда Вах