Ёмвошн оӊӑт пит­ты тыӆӑщн «Ма рәт мирєм ясӑӊ» Мўвтєӆ шуши мирӑт рәт ясӑӊ хӑтӆ па Россия мўвн арсыр мирӑт ӆәхсӑӊа вәӆты щира ӊта пӑсан вєрса. Няврємӑт вәнӆтӑты «Этнокультурно-об­разовательной тӑхи» хущи ясӑӊ тәты хуя­тӑт юхтыӆысӑт.

Ирина Максимовна Молданова, фи­ло­ло­ги­ческой наукайт кандидат, Ас-угорской мирӑт инсти­тутн па технолого-пе­да­гогической колледжӑн рәпитты нє, ясӑӊ тәс. Ӆўв щӑта няврємӑт шуши мир ясӑӊ па культура вєрӑт ёха тәтыя вәнӆтӑӆ. Вәнӆтыйӆты айӆат ёх «Детский этнокультурно-образовательный центр» хущи юхтыӆыӆӑт па вән­ӆум пищӆаӆа тӑта ай няв­рємӑт вәнӆтӑӆăт. Щи пийн докладӑт хӑншӆӑт па конференцияйн тӑм оӆӑ­ӊӑн путӑртӆӑт. Ирина Максимовна центр кә­щаята пәмащипа ясӑӊ ястӑс. м щи тӑмӑщ тӑхи вәӆ, хута шуши мир ясӊӑ­та па вәӆты пищӑта няврє­мӑт вәнӆтӑӆыйт.

Наталья Ивановна Величко, культурология наукайт кандидат нє, ар оӆ «Институт развития образования» хущи рә­питӆ. Ӆўв ясӊӑӆ мӑнӑс, муйсӑр вәнӆтӑты пищӑт шуши мир вәӆупсы оӆӑӊӑн ай няврємӑт вәнӆтӑты ёха мосӆ путӑртты па ванӆ­тӑты. Ӆыв округев ӆуваттыйн шуши мир «Рәт ясӑӊа вәнӆтӑты ёх кӑсупсы» вєрӆӑт. 2023-мит оӆ вўш эӆты «Школа Министерства просвещения» йиӆуп прог­рамма тәӆӑт. Наталья Ивановна лекцияйт шуши мир вєрăнтты па йис пу­райн вәӆум оӆӑӊӑн хӑн­шӑс па ин тӑта ай няв­рє­мӑт вәнӆтӑты ёха ӆў­ӊӑт­ӆӑӆэ. 2025-мит оӆн ӆыв «Семьеведение» прог­рамма хӑншсӑт па ӑш­колаята китсӑт.  

Софья Максимовна Каксина, ӑшколайн ай няврємӑт вәнӆтӑты нє, «Почётный работник сферы образования РФ» нєм тӑйты хуят, тӑмхӑтӆ ӊта пӑсанӑн ясӑӊ тәты щира Касум кәрт Нуви сӑӊхум район эӆты юхтӑс.

Ма ӆўвеӆ иньщӑссєм, муй оӆӑӊӑн путӑртты питӆ, па ӆўв ястӑс: 

- Ма Касум кәрт ӑш­ко­лайн ай няврємӑт вәнӆ­туман 37 оӆа щи йис. Хӑн­ты ясӑӊ тәты вет оӆ мӑр рәпитсум. Щӑӆта хӑнты ясӊев па ин тӑм хӑтӆ вән­ты щи лӑп тәхӑрса.
Тӑмхӑтӆ еша путӑрт­ӆум, муй иты ма няврємӆам хӑнты ясӑӊа вәнӆтӑӆӆам. Сыры оӆӊитӆўв ясӊӑт вәнӆтӑты: хотн тӑйты войт, вәнт войт оӆӑӊӑн, щӑӆта яӊ вәнта ӆўӊӑтты вәнӆтыйӆӆўв, хот пур­мӑсӑт, ӆәмӑтсухӑт па па ясӊӑт вәнӆтӑӆўв. Щит­ӆўв вәнӆтӑӆўв, щӑӆта айӆтыева щи сӑӊӆўв глагол пиӆа, при­ла­га­тельной пиӆа ха кӑрт­ӆӑӆўв. Ищиты айӆ­тыева путӑртты вәнӆ­тыйӆӆўв. Щӑӆта предло­женияйт вєрӆўв. Ху­рӑтн ванӆтӑӆ­ӆам, арсыр пур­мӑсӑт уро­ка тәть­ӆийӆӆум. Щит­ӆўв вантӆўв, мсыева вәнӆ­тӑӆўв. Щӑӆта кӑт хуят и ещаӆт путӑртӆӑӊӑн, вўща вєрӆӑӊӑн, муӆты вохӆӑӊӑн, муӆты мӑӆӊӑн, пәмащипа лупӆӑӊӑн. Щӑӆта оӆӑӊмит-кимит классӑн, хәӆмит классӑн еша ай путрыет вєрӆўв, хән нӆмит класса юхӑтӆўв, щӑта ай моньщӑт хўватн сценкайт вєрӆўв. Щиты айӆтыева хӑнты ясӑӊ щи вәнӆтӑӆўв. Хәнты и ӆапӑтмитн хәӆум щос вәс, ин тәп и щос тӑйӆўв. И що­сэв оӆăӊмит ăсмена пийн, хуй­тат веӆщи ӑш­колая юхӑтӆӑт? Хәнты щи­ты вәс, ин и щос мӑр няврємӆўв хӑнты ясӑӊа муй щирн вәнӆтӑӆӆўв? Ма классємн 14 няврєм вәӆ. Юрнӑт, хӑнтэт, и рўщ ай ики, эви аршӑк. Щатьщащиӆаӆ хӑнты ясӑӊӑн путӑртӆӑт, ӑӊкиӆаӆ-ащиӆаӆ ӑнтә. Юрн ясӑӊӑн ёхӆўв ӑӊкиӆаӆ-ащиӆаӆ ма путӑртӆӑт. Мўӊ хӑнты ёхӆўв па рўщ пєлка иса щи питсӑт.

Еӆӆы па Ёмвошӑӊ вәнӆтыйӆты вєрӑт тәты институт, ай няврємӑт ӆа­вӑӆты па вәнӆтӑты хуя­тӑт, няврємӑт вәнӆтӑты хуятӑт, Сўмӑтвош район Саранпауль вош эӆты шуши мир пурмӑсӑт вєрты па ёнтты хот ёх па путӑр тәсӑт.

Щи пийн ӆыв кўтэӆн ясӑӊ мӑнӑс, муй щирн мсыева шуши мир рәт ясӊӑт па вәӆупсы пищӑт нух аӆумты.

Путӑр хӑншăс: 
Наталья Краснопеева