Вотас тыӆӑщ 24-25-мит хӑтӆӊӑнӑн Сәрханӆ вошн Россия мўвтєӆ Увӑс мирӑт рәт ясӊӑта па литературая вәнӆтӑты ёх IV-мит вән мирхот вәс. Тыв Россия 28 увӑс мўв эвӑӆт 500-кєм вәнӆтӑты хӑннєхә, ясӊӑт ӆєрамтты, вәнӆтӑты нєпекӑт єсӑӆты хуятӑт, вәнӆтӑты вєр тәты кәщайт па оса рәпата тәты хӑннєхәйт юхтыйӆсӑт.

Мирхот пўншты ёх лупсӑт, тӑта иха ӑк­мум мир и нумса юхӑт­ӆӑт, хутыса йиӆуп щирн няврємӑт рәт ясӊӑ­та вәнӆтӑты мосӆ. Тӑм 2026-мит оӆ Россия мў­вев президент хәйн «Год единства народов Рос­сии», вәнӆтӑты вєрӑт тәты министерства ёх «Год дошкольного обра­зования» нємӊӑнӑн мӑ­сыйӊӑн. Щиты щи вәӆ, ай­тєӆн, юӆн, щӑӆта хӑтӆ мӑр ай няврємӑт тӑйты хотн, ай классӑт вўш эвӑӆт няв­рємӑт рәт ясӊӑт сӑмӑ­ӊа тӑйты вәнӆтыйӆӆӑт. 

Тӑм мирхота юхтум мир рәт ясӊӑта йиӆуп щирн вәнӆтӑты вєр оӆӑӊӑн пу­тӑртты питӆӑт. 

Муй Югра мўвн рәт ясӊӑт ӆавӑӆты пӑта вєрӆы

Щи оӆӑӊӑн округ кәща ӆӑӊкӑр нє Елена Майер лупӑс:

- Мўӊ округевн увӑс мир рәт ясӊӑт ӆавӑӆты оӆӑӊӑн нємасыя поступсэт вўй­ман вәӆӆӑт. 2024-мит оӆн Сәрханӆ госуниверситет хуща нємасыя институт пўншсы. Тӑта айӆат ёх шу­ши мир арсыр вєрӑта вәнӆтӑты питӆыйт па рәт ясӑӊа вәнӆтӑты хуятӑт ӆэщӑтты. Ин айӆат ёх ок­ругевн муй Россия мўвев па вошӑтн вәнӆтыйӆӆӑт ки, ӆыв округ вәнӆтӑты вєрӑт тәты департамент ёх пиӆа кашащты нєпекӑтн ёш посӑт пунӆӑт, ӆәӆн нєпекӑӊа вум пийн тыв рәпитты кєрӆӑты.
2024-2025-мит оӆ­ӊӑнӑн Сәрханӆ па Ниж­невартовской пед­уни­верситетӊӑнӑн рәт ясӑӊа па литературая вәнӆтӑты ёх ӆэщӑтты питсыйт.
Округ вәнӆтӑты вєрӑт тәты департамент ёх шуши мира вухӑӊ нётупсэтн нётӆӑт. Щиты рәт ясӑӊа па литературая вәнӆтӑты вєра вәнӆтыйӆты айӆат ёх кашӑӊ тыӆӑщ 22 щурӑс шойт вух ёша хоӆумӆӑт. 400 студент вухӑӊ нётупсэт ёша хоӆумӆӑт. Рәт ясӑӊа вәнӆтӑты хуятӑт пӑта «Оп­ращев ясӑӊ ӆавӑӆӆўв» нємасыя вухӑӊ премия вєрсўв. 2019-мит оӆ вўш эвӑӆт округ кәщайт мўв иӆпи питы вуй вўты ёх пиӆа иха «IT-вўт кәрт», 2020-мит оӆ вўш эвӑӆт «Хӑтӆ мӑр ай няврємӑт тӑйты вўт хот – ӑшкола» вєр тәӆӑт. 

Рәт ясӊӑт Интернета пунты – щит йиӆуп щирн рәт ясӑӊ ӆавӑӆты вєр

Щи оӆӑӊӑн Россия мўвев арсыр мирӑт вє­рӑт тәты федеральной агентствайн рәпитты хә Тимур Цыбиков путӑртӑс:

- Интӑм Россия мўвев кәщайт тәса нух вантӆӑт, муй щирн мўӊ хущева рәт ясӊӑт Интернета пунты вєр мӑнӆ. Ин циф­ровой нәпӑтн вәӆӆўв, щирн йиӆуп щирн ясӊӑт ӆавӑӆты мосӆ. Мєт вуӆаӊ – щитӑт Увӑс шуши мирӑт ясӊӑт пӑта вєрты, вантэ, кашӑӊ пурайн рәт ясӑӊӑн путӑртты хуят шимӆа йиӆ, оцифрованной путӑр шимӆ, рәт ясӊӑт ӆєрамтты ёх шимӆ, нємасыя ин­формационной техноло­гияйт вәты хуят ищи шимӆ.
Рәт ясӊӑт Интернета пунты ки, айӆат ёх па няврємӑт щи утӑт хўват рәт ясӊӑта вәнӆтыйӆты вєритӆӑт. Щит пӑта мо­бильной приложенияйт, электронной киникайт ӆўӊӑтты утӑт па арсыр мультимедийной утӑт вєрты мосӆ. Тәняӆ вухаӆь ясӑӊ Интернета пунсы, ин вепской, юрн, чукотской па хӑнты ясӊӑт ӆэщӑтӆыйт. Тӑм вєра мосты рәпата иха вєрты мосӆ.

Рәт ясӊӑта вәнӆтӑты вєр

Еӆӆы вәнӆтӑты ёх хәт секцияйтн рәпитсӑт, хута ӆыв йиӆуп щирн ӆэщӑтум рәпатайӆаӆ, вәнӆтӑты нєпекӑт єсӑӆты ёх йиӆуп учебникӑт оӆӑӊӑн путӑрт­сӑт.

Карелия мўвн вепской ясӑӊа вәнӆтӑты нє А.Н. Анушенкова лупӑс, мєт сыры рәт мўв сӑмӑӊа тӑйты вәнӆтӑты мосӆ. «Ма рәт мўвєм» хӑншум поступсы хўват няврємӑт айтєӆн рәт мўв оӆӑӊӑн уша вєрӆӑт, мӑӊхӑтӆӑт вантӆӑт, вепской ясӑӊӑн арӑт хәӆӑнтӆӑт, музея ӊхӆӑт. Мўӊ ӑшколаевн «Родники живой памя­ти» научной мирхот, «Пе­сенный клубок» фес­тиваль ӆэщӑтӆўв. Щи тумпи няврємӑт нємасыя кружок хуща рәт мир арсыр пурмӑсӑт вєрты вәнӆтыйӆӆӑт», – лупӑс вәнӆтӑты нє.

Забайкальской мўв шуши мир ассоциация кәща нє, эвенкийской ясӑӊа вәнӆтӑты ими В.А. Дармаева лупӑс, ӆыв ху­щеӆа тәп вўӆы тащ ӆа­вӑӆты ёх рәт ясӑӊӑн пу­тӑртӆӑт, щирн рўтьщӑты пурайн ӆыв няврємӑт пиӆа щив ӊхийӆӆӑт, щӑта эвет-пухӑт рәт ясӑӊ хәӆӑнтӆӑт, путӑртты вәнӆтыйӆӆӑт. Эвенкийской ясӑӊ вәнӆ­тӑты ёх ӑн тӑрмӑӆ, щирн онлайн щирн урокӑт ӆэщӑтты питсыйт. 

Кӑт хӑтӆ мӑр рәпитман учителят и нумса юхӑтсӑт – щиты вєрты мосӆ, ӆәӆн няв­рєм айтєӆн юӆн рәт ясӑӊ ат хәӆӑс, еӆӆы хӑтӆ мӑр тӑйты хотн па ӑшколайн ат вәнӆтыйс. Щи тумпи рәт ясӊӑт Интернета пун­ты мосӆ. «Просвещение» киникайт єсӑӆты ёх йиӆуп нєпекӑӊ па электронной учебникӑт ӆэщӑтты вєр оӆӑӊӑн путӑртсӑт. Ин 25 рәт ясӑӊ вәнӆтӑты пӑта киникайт єсӑӆӆыйт.

Юхи хӑщум артӑн ӑк­мум мир лупсӑт, ясӑӊ ӆыӆӑӊ, хән няврємӑт рәт ясӑӊӑн путӑртӆӑт, щирн вән ёха щиты мосӆ вєрты, ӆәӆн няврємӑт айтєӆн рәт ясӑӊа ат вәнӆтыйӆсӑт.

Путӑр хӑншӑс: 
Людмила Гурьева