Юӆн шитам, тәп носки тыйты сый сащӆ, щит ӑнтә тәп ӆәмӑтсух, щит хӑннєхә ӆыӆ ӆавӑӆты ут. Ваньщавӑт, Поӆнавӑт кәртӊӑн па Нуви сӑӊхум вош эвӑӆт вєрӑнтты нєӊӑт сот муӆтас пўнӑӊ носки тыйсӑт. «Ӑӊкет хошум ёш рўв» вєр – тӑм ӑнтә тәп оса вєр, щит Россия ӆуваттыйн ӆыӆ шәп, кашӑӊ ут – сӑмӆўв сый, кашӑӊ вєрум ӆәмӑтсух – щит ӆаӆясты хуят оӆӑӊӑн ӆавӑӆты ар. 

Мєт оӆӑӊ пўш солда­тӑт пӑта ӑӊкиӆаӆ, аӊкаӊкиӆаӆ, щащиӆаӆ, имиӆаӆ хошум ӆәмӑтсу­хӑт тыйты вўянтсӑт. Ӆәӆн рәт хуятӆаӆ хошум щирн ат ӊхсӑт, кўрӊӑӆаӆ па ешӊӑӆаӆ аӆ потсыйт. Па ӆәӆн ат вәйтсӑт, хуты юӆн рәт ёхӆаӆ ӆыв оӆӊеӆн нәмӑсӆӑт. 
Айкємн тӑм мосты вєра аршӑк хуят катӆӑсыйӆты питӑс, во­лонтёрской тӑхет тывты питсӑт, кәща хуятӑт ищи нётты вўянтсӑт. 

Тӑмхӑтӆ «Ӑӊкет хошум ёш рўв» – щит Россия мўвев ӆуваттыйн ар щу­рӑс ими. Муй мєт мосӆ ӆаӆясты ёхӆўв пӑта, ӆыв щит вєрӆӑт:

- балаклавайт, подшлем­никӑт, маскайт – щит ищки па вот эвӑӆт ӆавӑӆты утӑт;
- тыюм хошум пўнӑӊ носкет – щӑта мєт мосты ут;
- посӑт, ӆўяӊ посӑт –ӆәӆн ёшӊӑӆ хошум ат вәсӑт;
- тыюм ван сухӑт, жиле­тӑт – ӆәӆн ищкийн аӆ потсыйт;
- сыр-сыр лаӊкупӑт – госпиталят пӑта.

Иса кўӆ пўнуп похлӑт мосӆӑт па носкет так щирн тыйты мосӆ. Кашӑӊ китум ӆараща имет ай пищмайт пунӆӑт, хута хӑншӆӑт: «Пухие, ӆавӆӑсман вәӆа!», «Ӆыӆӑӊа юхи юхта!», «Мўӊ нӑӊ пиӆэна!».
Ма пухєм ищи щӑта вәӆ, хән тыйӆум, нәмӑсӆум, мосӑӊ, тӑм щирн ма ӆўвеӆ хошмӑӆӆєм, ӆавӑӆӆєм. Ма ӑнтә тәп ӆўв пӑтэӆа тыйӆум, па ёхӆаӆ пӑта ищи вєрӆум. Ӆыв ма пӑтєма пух кана вәӆӆӑт.

Ваньщавӑт ӑшкола кәща нє Наталья Евгеньевна Бусыгина пухӆ ищи щӑта ӆаӆясӆ, ӆўв лупӑӆ:

- Хән тыйӆум, мӑнєма кєнашӑк йиӆ. Хән те­ле­визор хўват ӆаӆь оӆӑӊӑн айкеӆӑт вантӆум, имухты тыйты йинтпӑт ёша вўӆӆам. Айӆтыева нумӑсӆам щи роммумӆӑт – ма вәӆєм, м па мосты вєр вєрӆум. Щиты ма нух питты вєра нётӆум, ӆәӆн еӆӆы ӆаӆьӆы па ма ат вәсўв.

Сӑм вўш эвӑӆт тыюм па китум пурмӑс, солдатӑт пӑта ӆавӑӆты ута вәӆ. Ӆыв вәӆэӆ, юӆн ӆавӑӆӆыйт па нәмӆыйт, ӆыв пиӆэӆа Россия мўвеӆ ӆоӆь.

«Ӑӊкет хошум ёш рўв» вєра кашӑӊ хуята кат­ӆӑсыйӆты рӑхӆ. XXI-мит йисн мўӊ ӑнтә тәп пушкан унтасн нух питӆўв, сӑмӆўв вўш эвӑӆт йиты вєрӑтн ищи нётӆўв. Иса Россия мўвев ӆуваттыйн имет мўӊ рәт мўвев нух питты вєр ёшӊӑӆаӆн тыйӆӑт. Ӆыв ёшӊӑӆаӆ вевн ӑнт юхӑтӆыйт. Ёшӊӑӆаӆ эвӑӆт йиты хошум ӆаӆь хӑрӑта, пухӆаӆ хущи юхӑтӆ. Щит ӑӊкиӆаӆ ёшӑт хошум рўв!

Ирина Фирсова китум айкеӆ 
хӑнты ясӑӊа тулмащтӑс: Надежда Вах