Тӑм оӆ тәнӆуп тыӆӑщ хӑтӆӑтн Россия мўвевн оӆӑӊмит хӑннєхә хущи щи ӆавӑрт мәш вәйтсы. Кӑтԯєм тыӆӑщ мӑнӑс, интӑм мўӊ мўвевн 58 щурӑс муӆтас хӑннєхә щи мәшн хойсы. Мосӆ лупты, COVID-19 мәш па хон пєлӑк 185 мўвн вәӆ. Ай кєр тыӆӑщ 11-мит хӑтӆӑн «Всемирная организация здравоохранения» тӑхи ёхн щи мәшн питум вєр пандемияя аӆьщӑсы. Щи пурайн Россия мўвевн 28 хуят щи утн мәшмӑӆман вәс.

Пандемия – щит щи­мӑщ пура, хән мўв хў­ваттыйн ӆавӑрт мәш сора ара йиӆ.
Хӑннєхәя мосӆ вәты, хутыса щи мәш уша вєрты рӑхӆ: єӆ тем­пература вәна єнумӆ; хӑннєхә хәӆӑн питԯа; ӆўвеӆа ӆаӆты ӆавӑрт; ӆонӑт кӑшитӆӑт; хӑн­нєхә сорашӑк тәймийӆ. Мәшӑӊ хуят пиӆа пу­тӑртум пийн хӑн­нєхә 14 хӑтӆ мӑр мәша пит­ты щир тӑйӆ, щирн тә­са вантты мосӆ, ван­тэ, щи йиӆуп мәш грипп хурасуп оӆӊитӆ.      
Хутыса щи мәш и хӑн­нєхә эвӑӆт па хуята йиӆ:
– мәшӑӊ хуят хәӆӆя­ты эвӑӆт;
– автобусӑн муй муӆты хотн ов муй па па утӑт ёшн катӑӆмаӆ пийн.
Щирн кашӑӊ хуята интӑм щи вєрӑт ма вәты мосӆ:
– вән ӆапкаята, ӛращ­ты хотӑта аӆ ӊхаты;
– хәлєӊ ёшн сємӊӑ­ӆӑн, вєншӑн па уӊӆӑн аӆ кетматы;
– хәӆӑн питум хуятӑт хуща ванашӑк аӆ ӆоӆяты;
– ёшӊӑӆӑн ма па тә­са ӆюхитаты;
– телефонӆӑн па па щўӊкӑт ванкўтӆы нух мәӊхаты.
Уша йис, хуты мєт оӆӑӊӑн Россия мўвевн тәнӆуп тыӆӑщ 27-мит хӑтӆӑн 40 оӆ ӆуват хӑн­нєхә коронавирус мәшн хойсы, ӆўв щи еӆпийн Милан мўва ӊхӑс. Па ӆўв мєт оӆӑӊмит мўӊ мўвевн тӑӆаӊа йис. 
Мосӆ лупты, вән кєр тыӆӑщ 22-мит хӑтӆӑн Россия мўвевн 57999 хӑннєхә щи коронави­рус утн мәшӑӊа йис, щи­тӑт кўтн 4420 хӑннєхә мӑӆтсы, 513 хуят мәш эвӑӆт ӑнтәма йис. Ӛхӑт хӑтӆӑн Россияев хущи 5236 хуят мәшн питсы.

Надежда Рагимова