Шуши мирев культура - Культура обско-угорских народов

Ас потты тыӆӑщ оӆӊитумн народной творчества хотн «Ём­вош ёх» ариты-якты тӑхи хуятӑт оса мир етнхота ӑкӑтсӑт. Тәняӆ, ай тӑхет потты тыӆӑщн, хӑнты имет ариты-якты тӑхи ӆэщӑтты нумӑс вєрсӑт, хута катра па тӑм йис хӑнты арӑт ариты па якӑт якты питӆӑт. Мєт оӆӑӊ пўш ӆыв «Югра ӆыӆӊуптӑты» оса тӑхийн арисӑт. Щӑӆта айӆ­тыева-айӆтыева арсыр етнхо­тӑтн, вәйтантупсэтн па вән мӑӊхӑтӆӑтн ариты питсӑт.

м арат оӆ юхӆы ма Сәрханӆ вошн Увӑс мир кӑсупсыя ӊхсум па шуши мир няврємӑт пиӆа еша путӑртсум. Ин ӆўӊтаты, муй оӆӑӊӑн ӆыв путӑртсӑт:

«Хӑнты ясӑң» газетаевн Ас потты тыӆӑщ 21-мит номерн ма Россия мўвевн вәӆты арсыр мирӑт «День народного единства» нємуп мӑӊхӑтӆ пӑта  Нягань вошн «Мўӊ и мир» нємпи ариты-якты хӑр оӆӑӊӑн ай павӑтсум. Интӑм щи мӑӊхӑтӆ оӆӑӊӑн еша па хӑншӆум.

«Мўӊ и мир» нємпи арӑӊ-якӑӊ якты хӑр ок­руг ӆуваттыйн няврє­мӑт кўтн 15 пўш вєрӆы. Вантэ, айтєӆн пушхӑт вәнӆтӑты мосӆ, ӆәӆн ӆәхсӑӊа па сӑмӑӊа иха катӆӑсман, и нумӑсн шәк вєр ӑн вантман еӆӆы вәӆты.

Ас потты тыӑщ 29-мит хӑт вўш эвӑт ван хӑтуп тыӑщ 2-мит хӑт вәнты Ёмвош округ мир творчества хотн «Пўпи якты хота – йиуп вәупсы» нємпи вәнтӑты хӑр вәс.

Щит йис вәупсы єрамтты хә Тимофей Молданов па округ мир творчества хотн шуши мир культура тәты ёх эщӑтсӑт. Тыв Сәрхан, Нижневартовской, Ну­ви сӑңхум, Сўмӑтвош районӑт эвӑт 40-кєм хуят юхтыӑс.

Нӆмет хӑтӆӑн Ас потты тыӑщн емӑӊхӑтӆ вус, рўщ щирн ки ӆўв нэмӆ «День народного единства». Щи хӑтӆ щира мўң ха ӑктӑщийӆсўв, катра кўлуплэӊкевн иха пӑсaн верыӆысўв па шай еньщсўв, умӑщ птӑр птӑртсўв. 

Ас потты тыӆӑщ 3-мит хӑтӆӑн округев ӆуваттыйн арсыр культура тӑхетн мӑӊхӑтӆӑт вєрӑнтсыйт. Щит «ночь искусств» щирн нємӑтсы. Йис пурмӑсӑт ӆавӑӆты па шавиты «Торум Маа» тӑхийн щи хӑтӆ вўраӊӑн «Хошум хот» етнхот вәс. 

Тӑм оӆ «Торум Маа» тӑхев йиӆуп хота касӆӑс. Па щи вєр пӑта щӑта вән мӑӊхӑтӆ вєрӑнтсы. Ар мойӊ мир щив ӑктӑщ­сӑт, сыр-сыр хошум яс­ӊӑт путӑртсӑт па мой­ӆупсэт мойӆӑсӑт. «То­рум Маа» тӑхи ёх, вантэ, вәӆтэӆ мӑр ӆапӑтмит тӑхия щи касӑӆсӑт. Мєт вән ванӆтупсы хӑрэӆ Ёмвош ӆапӑт вән пайт кўтн и пайн вәӆ. Щӑта рәпитты ёхӆаӆ хот йитӑт па тӑхийн вәӆӆӑт. 

Ас потты тыӆӑщ 4-митн Россия мўвевн «День народного един­ства» нємуп мӑӊхӑтӆ постӑӆы, ӆәӆн иха ӆәхсӑӊа, и нумӑсн шәк вєр ӑн вантман еӆӆы вәӆты.

Округев ӆуваттыйн тӑм мӑӊхӑтӆ постӑ­ты пӑта арсыр вәйтан­тупсэт, якты хӑрӑт, ванӆ­тупсэт ӆэщӑтӆыйт. Югра мўв социаль­ной вєрӑт әхтыйн департамент ёх партупсы щирн Нягань вошн «Мўӊ и мир» нємпи мӑӊхӑтӆ 15 пўш вєрӆы. Тӑм арӑӊ-якӑӊ хӑр па хурамӑӊ ванӆтупсы Нях вош хоттєӆ ёха па няврємӑта нётты тӑхи ёх унтасн ӆэщӑтсы.

«Российской Север» нємпи Увӑс мўв па Дальний Восток айӆат ёх V-мит мирхот мӑнум пурайн мойӊа юхтум нєӊӑт па хәйт «Торум Маа» йис пурмӑсӑт ӑкӑтты па шавиман тӑй­ты хота тәтьӆя­сыйт. Ванӆтупсы тум­пийн айӆат ёх пӑта шуши мир ӛращты кӑсупсэт эщӑтсыйт. Итәх апрӑң, савр-вавр хуятӑт пиӆа путрє­мӑсум.

2019-мит оӆ округевн «Хоттєӆ ёх оӆа» нємӑтсы. Па ай тӑхет потты тыӆӑщ оӆӑӊмит хӑтӆӑн Россия мўв ӆуваттыйн вәнӆа­та вум хуятӑт хӑтӆ постӑӆы. Ёмвошн щи оӆ па щи хӑтӆ вў­раӊӑн пирӑщ хуятӑт пӑта «Ём­вош мєт апраӊ аӊканки муй па щащи» кӑсупсы вєрӑнтсы. 

Мєт оӆӑӊ щимӑщ кӑсупсы 2010-мит оӆн вєрсы. Ӛхӑт па щатьщащет па аӊщащет кўтэӆн кӑссӑт. Щи пийн «Суперба­бушка и Супердедушка Ханты-Мансийска» кӑсты щирӑт вє­рӑнтсыйт. 

Лыпӑт хойты тыӆӑщ 27-митн Ёмвошн вухаӆь нє Маргарита Фёдоровна Рябова (Яркина) мирхот ӆэщӑтӑс. Ӆўв ӑктӑщум мир хӑнты па вухаӆь якӑт тәса якты вәнӆтӑс.

Щӑта Ёмвошӑӊ ёх тум­пи Сәрханӆ, Югорск, Варъюхан кәрт Ниж­невартовской район, Шапша кәрт, Салым кәрт Нефтеюганской район эвӑӆт мир юх­тыйӆсӑт. Маргарита Фёдоровна ӑктӑщум мир «Хә як», «Вухаӆь як», «Куренька» па па якӑт тәса якты вәнӆтӑс. Ӆўв лупӑс, хуты вухаӆь щирн якты ӆўв Мария Сергеевна Меровайн тә­са вәнӆтӑсы. Щит пӑта ӆўвеӆа вән пәмащипа ясӑӊ лупӆ.